今日我開始左對公司啲同事進行復仇大計: 第三十八節
我同Miki決定喺週末度制訂左對付Valarie嘅全盤作戰計劃，雖然我同Miki都唔好明顯對對方抱有好多保留，但係當Miki係企喺我果邊嘅時候，我的確對佢有種如魚得水，如虎添翼嘅感覺。雖然我同佢遲早有一日要一決雌雄，但呢一刻我係真心當佢係我嘅戰友。
由於我同佢之間嘅事需要對其他人絕對保密，特別係對阿油。所以我同佢都有共識我地都係唔好可以靠高科技去通訊，所以我同佢約左面對面去傾。而喺細心考慮之下，我同佢約左喺我嘅屋企度共商大事。Miki知道阿油好有可能會跟蹤佢，所以我提議佢先下手為強，主動清除左阿油呢個障礙先。喺我嘅提議之下，Miki主動話約阿油出街，而為左將佢洗到有咁遠得咁遠，我提議Miki索性約阿油喺澳門等。而當阿油聽到Miki約佢去澳門，佢已經開心到失晒理智，連點解Miki要約佢去到澳門等，而唔一齊出發都唔感到奇怪。喺我嘅提議之下，我建議Miki約阿油星期六喺澳門等，但到時就同佢講臨時有事，要星期日先可以過去join佢，就叫阿油星期六喺澳門住一晚。喺咁嘅情況之下，我地就可以確保到阿油喺成個週末都唔喺香港，令佢無可能跟蹤到Miki。亦因為我覺得對付任何人都唔可以掉以輕心，我亦吩咐左Miki要小心阿油嘅老表阿虎。我覺得如果星期六突然之間Miki放阿油飛機，佢好可能會派阿虎去搵Miki。
到左星期六，Miki喺make sure左阿油上左船，亦都睇清楚無人跟蹤住之後，喺大約中午時份佢上左我屋企。好衰唔衰我果個平時什少喺屋企出現，特別係星期六日多數去左男朋友屋企嘅細妹，唔知痴左邊條根喺星期六佢竟然無出去。當Miki上到黎嘅時候，原本喺房度唔知搞緊咩嘅佢突然撲左出黎，喺三唔識七嘅情況下，我阿妹毫無顧忌咁指住Miki問：「嘩呢個靚女係你女朋友呀阿哥？」Miki聽到即刻一面尷尬，而我就即刻答：「唔係呀，佢係我喺啲New Age活動度識返黎架，我同佢唔係男女朋友，不過喺上一世佢係個樵夫，而我就係畀佢劈果棵樹。」我阿妹完全無視我嘅解釋，自己行左上前指住Miki個手袋講：「嘩姐姐你都好有錢喎，用Birkin袋咁富貴。」Miki聽到呢個問題唔多識反應，而我就幫佢答：「係呀，佢仲援交架嘛，不過唔係援助交際喎，佢係做援膠，靠援助啲有膠人黎賺錢架，係咪好盞鬼呢，佢而家咪係專程上黎授助我啦。」我阿妹聽到我呢番胡言亂語之後，冷冷地拋低句：「你條粉腸有X錢畀人買Birkin袋咩。」就揚長而去。我擰轉頭問Miki：「你個乜春Beacon袋好貴架咩？下次早啲出聲呀嘛，我帶你去羅湖買返十個八個都唔怕啦。」而Miki亦都無視左我問題，自己行左去我間房度坐低左。
「嘩，你個電話用緊咩地圖架，你未黎過都知我係邊間房咁巴閉，乜你唔驚入錯房見到我老豆老母敦倫緊架咩？」「段估你爸爸媽媽間房門口都唔會貼住張蝙蝠俠poster掛，估唔到你過幾年都三十歲啦，仲鍾意埋蝙蝠俠咁幼稚。」「挑你呢啲妖婦識條春咩，我呢啲kidult就算活到幾多歲都仲有赤子之心，都依然會崇拜蝙蝠俠呢啲正義嘅象徵。妳份人咁鬼奸險，我肯定妳細蚊仔果陣做話劇一定未做過公主，次次都畀人叫左去做鴉烏婆啦。」「係呀喺你地啲男人心目中，Daisy呢啲先係白雪公主呀嘛。」「咁喺你地啲女人心目中，咪一樣剩係當Evans呢類係白馬王子。」講完呢句說話之後，我對佢都突然靜左一靜，我喺近排成日刻意去迫自己忘記Daisy嘅存在，我什至無再去理佢嘅近況係點，但咁唔代表我唔對佢無感覺。而我眼前嘅Miki，喺聽到Evans呢個名之後，佢都顯露左一剎那嘅哀傷。唔知點解，喺果一刻，我突然覺得我同佢其實都係同是天涯淪落人，所以我忍唔住唱左出聲：「同是天涯淪落人，在這傷心者通道上同行，也許不必知道我是誰……」而我呢個突如其來嘅白痴舉動亦令到Miki忍唔住笑左出聲。我突然好認真咁問佢：「其實你係咪好想同Evans一齊？」
Miki諗左一陣，佢答我：「可能同你講都唔信，到左呢一刻，就算我變左幾多都好，Evans都未試過正眼咁望我。我同佢識左咁耐，不過你對我嘅了解都一定多過佢。」同平時唔同，Miki喺答我呢個問題果陣好認真，我相信佢唔係講緊大話。由於氣氛突然變得凝重，我亦都唔識得點應對一臉愁容嘅Miki，我故意用恥笑嘅聲線話：「所以我咪話你真係傻豬黎，本身都叫靚女一名呀，洗乜為左一條仔搞咁多嘢呀。而家你快啲轉投去我身邊，你乖乖地服侍得本大爺舒舒服服的話，我一定會好好打賞你，等你可以早日唔洗再喺啲風月之地度一片朱唇萬人嘗咁陰公豬啦。」Miki聽到我呢一串廢話之後又再次笑左出聲，其實我發覺自己真係好唔鍾意見到Miki為左Evans而糾結，我覺得自己係因為嬲Miki只係為一個男人而令到我之前所有嘢都諸事不順。但喺今次我又突然發現自己好似仲有其他異樣嘅感覺…..
Miki坐喺我張床上面，一邊搞我床邊啲雜物一邊聽我分析Valarie。「喂我堆雜誌你真係唔好亂掂呀，一陣掂到啲嘢痴立立你真係唔好問我係咩黎。」Miki無視我嘅說話，繼續搞我啲嘢，佢突然之間反問我：「其實你唔覺得好危險架咩，畀我上埋你屋企，一陣我襯你行開搵到你啲咩秘密你就死硬，我到時對付你一定唔會手軟架。」「咁你而家同我孤男寡女共處一室你又唔驚架咩？一陣我獸性大發將你就地正法果陣，我都唔會手軟架，我係驚到時你腳軟咋。」Miki聽到之後只係冷笑左一聲。又隔左一陣，我同Miki都無出聲喺度苦思緊有咩方法可以對付到Valarie，Miki突然問我：「其實你係咪真係好似Valarie咁講，真係成日去騷擾呀Sophia姐？」Miki唔提起我都唔記得左呢件事，Valarie喺星期五作左個故仔黎對付我，成功令到Evans同Daisy信以為真。本身散播虛假消息呢啲技倆明明係我強項，但點知又畀Valarie早我一步用左呢招。我突然靈機一觸，決定又學佢咁用一啲半真半假嘅嘢黎作故仔，以彼之道還施彼身。而我喺諗左一陣，決定用我果晚見到佢同佢個醫生前夫一齊食飯嘅事，作到有咁大得咁大，而Miki聽到我呢條計之後，都應承肯配合我……
正當我同Miki因為終於諗到一條計而開心之際，我無意識地同佢越哄越埋，原本係我坐喺櫈而佢坐喺我張床，但喺我越講越興奮果陣我亦唔覺意坐埋落張床度。同樣聽我講述計劃聽得入神嘅Miki亦無介意我坐到咁埋，如果有旁人見到我地兩個呢一刻嘅舉動，好可能會誤會我同Miki有咩親密關係。其實都唔洗如果，因為正當我同佢喺床上傾得興高彩烈嘅時候，我阿妹門都無敲門就衝左入黎。畀我嚇左一嚇嘅我即時從Miki身旁彈開，指住我阿妹大駡：「喂你有無老豆老母教你架，連敲門呢啲基本禮貌都無……」我阿妹只係答左句：「我老豆老母咪即係你老豆老母囉低B仔。」之後就坐左喺我張櫈度，望住Miki問：「係呢姐姐，你同我阿哥都行埋左啦，大家都叫一家人。我想問你係咪喺Hermes買嘢有折呀？如果係下次不如你帶埋我去呀……」我即時代Miki答：「我買棺材山地都有折呀，要唔要去帶你買埋呀，快啲出返去唔好阻住我同佢做正經嘢啦。」我阿妹聽到之後非但無意欲出去，佢仲指住我話：「阿哥好心你就唔好咁猴擒啦，日光日白都諗住同人搞嘢。係呢姐姐，你叫咩名呀？」畀我阿妹搞到有啲不知所措嘅Miki苦笑道：「我叫Miki，不過我同你哥哥只係朋友黎架咋……」我知我個妹突然走入黎坐埋喺度，係明顯地因為無所事事所以入黎搵人傾下計，如果我唔趕佢佢一定唔會走。最後我拎左兩舊水畀佢叫佢落街食個tea，最好就睇埋場戲先返黎。我阿妹喺收到兩舊水之後話：「其實我本身都就黎出街搵我男朋友，多謝你畀兩百蚊我坐車喎，放心啦我識做架啦，不過你地搞還搞唔好搞到入我間房就得啦。」我答佢：「唔係呀，呢兩舊水其實係畀你乾洗用架，陣間你一出門口我就叫隔離屋隻旺財喺你張床上面屙屎。」順帶一提，旺財唔係一隻狗，佢係我幫隔離屋個百厭細蚊仔改嘅花名，我間唔中經過佢屋企門口都會對住個細蚊仔講：「旺財，hand hand。」但隔離屋阿張師奶應該無教旺財英文，我次次叫親佢畀hand hand我佢都剩係識得怪叫。
阿妹走左之後，剩返我同Miki兩個喺度。本身Miki同我一樣無咩意識我同佢係坐得咁近咁易惹人誤會，不過畀我阿妹講一講之後，我同佢開始有啲尷尬。不過竟然屋企無晒人，我就主動提出帶佢參觀下我間屋。雖然我間屋細到一眼睇得晒，不過其實都係想同佢行出我間房，再係同佢哄到咁埋我怕我自己會把持唔住。喺呢個時候，喺澳門度一直都等唔到Miki嘅阿油打電話黎搵Miki，而Miki可以眼都唔眨下就三言兩語之間打發左阿油，要佢繼續痴痴的等佢。作為旁觀者我除左覺得心寒之外，仲有啲佩服。而阿油喺畀Miki打發完之後，佢突然打電話畀我，喺為免令阿油生疑之下我唯有聽電話，我一聽電話就聽到阿油講：「今次仆街啦，我懷疑Miki畀人脅持住呀，佢明明約左我黎澳門點知又話遲啲先黎到，我頭先打畀佢果陣佢又好似欲言又止咁，你估會唔會係大明捉左Miki呀拿？唔係啦，我都係叫阿虎去搵下Miki穩陣啲。」「咁請問你打黎同我講做乜呢？」「無呀我睇下你會唔會知道Miki下落咋嘛。」「我知呀，佢而家唔著衫訓左喺我隔離呀，要唔要開個facetime畀你一路睇住一路劣下賓周呀？」「仆街啦你，Miki邊有可能肯同你呢條柒頭共處一室呀，唔好發夢啦。」唉，講真話畀佢聽佢又唔信，啲毒男真係自以為是。不過為免佢真係叫阿虎去搵Miki，我叫佢再打多次畀Miki，詳細咁問下Miki點解暫時過唔到澳門住。而之後佢打畀Miki果陣，Miki講到非常誠懇，而且佢講大話真係有一手，講左大約十分鐘之後佢終於講掂左阿油。喺收線果陣，我對佢忍唔住相視而笑。一諗到阿油喺澳門度獨自陶醉同期待Miki嘅來臨，我就忍唔住笑左出黎。過左一陣，我同Miki都覺得有啲肚餓，我就提議不如搵啲嘢食。為怕出到去食嘢果陣畀人撞到，我都打算叫外賣算數，但Miki突然行去開左我個雪櫃望左兩眼之後，佢就話：「不如等我煮啲嘢食啦。」
「估唔到你呢啲死港女都入得下廚房架喎。」喺一邊睇住佢煮嘢食嘅我，望住眼前嘅Miki純熟地斬爪切菜，我突然之間果啲呢條女其實都叫娶得過呀，Evans條友真係走寶呀。Miki答我：「我喺美國讀書果陣咩都要焗住自己做架啦，好似你咁有阿爸阿媽照顧周到咩。再加上Laura又係完全唔識煮嘢食，好多時都係我煮埋畀佢同Evans食……」「嘩有無咁大方呀你，幫情敵煮埋燭光晚餐，咁平時佢地用晒condom你有無幫佢地買埋呀？」Miki提起Evans同Laura之後突然靜左，佢之後一直再無出聲，佢只係默默地咁煮餐飯畀我食。而由於氣氛又開始變得凝重，我偷左阿爸嘅一支紅酒偷偷地開左，諗住一陣食飯果陣有酒飲下可以緩和一下氣氛。Miki煮完出黎之後，一開始佢都唔多出聲咁喺度食，到飲左兩杯酒，我又不斷賣口乖讚佢煮啲嘢食好味之後，佢終於肯講多兩句嘢。酒過三巡之後，佢開始有啲醉意，不過佢應該仲係清醒，佢不經意地喺酒後吐真言，佢同我講：「其實我入呢間公司係因為知道Evans遲早都會入黎做，我知佢份人天真，咪一心諗住入黎幫佢鋪好條路，同幫佢對付啲小人囉，我都無諗過件事會變到更複雜。我更加估唔到係就算我變到幾靚，吸引到幾多男人都好，但我始終引唔到Evans去注意我…..」面對住佢呢啲真心話，我無安慰佢，亦都無挖苦佢，我只係靜靜咁聽佢講佢之前對Evans點好，而Evans又係完全發現唔到。喺一路講又一路飲酒之下，好快佢開始真係醉，我見佢有啲睡意之後，我就帶佢入我間房度……不過我無打算乘人之危，我將佢安置喺我張床之後，我就出左廳訓。喺梳化度我一直喺度諗，如果無左Evans同Daisy，我同Miki之間又有無可能呢？不過喺眼光光望住天花板苦思左一晚之後，我都係無答案。
一覺醒來，望下窗口原來已經天光。我行返入房度，見Miki仲係熟睡緊，心入面仲猶豫左一陣應唔應該叫醒佢。呢個時候我望一望自己個電話，發覺有幾十個miss call，而呢啲電話全部都係黎自阿油嘅，我立刻心知不妙。我再望一望個whatsapp，我見到幾十個黎自阿油嘅message，入面嘅內容全部都係叫話有急事叫我救佢。睇返啲message同miss call嘅時間，佢對上一次試圖聯絡我已經係兩個鐘之前。我心諗如果佢要有咩事，呢兩個鐘入面佢死左都唔定啦，既然都急唔黎，我就決定慢慢叫醒Miki去食個早餐之後，先再搵阿油探個究竟。當我入準備入廁所刷牙洗面之後先叫醒Miki之後，突然我屋企個門鐘響起，我即刻行出去透過防盜眼望一望究竟係邊個契弟一早搵上門。當我見到個契弟係阿油個老表阿虎之時，我當堂大吃一驚，佢唔係咁犀利搵Miki搵到上我屋企呀。由於佢不斷咁撳門鐘，Miki都畀啲門鐘聲嘈醒左，睡眼惺忪嘅佢衣衫不整咁行出黎，我諗佢自己都無意識到呢一刻嘅佢啲衫鈕又扣剩幾粒，條裙腳又攝左一半入去咁。不過由於門屋面係阿虎，我都無心情去睇下走晒光嘅Miki，我用手勢即刻示意叫Miki匿返入房，之後入廚房拎起把菜刀，諗住開門之後阿虎想做咩我都仲有把刀頂一頂。當一切準備就緒之時我開左度木門，隔住鐵閘講：「先生呢度無小姐呀，你去搵一樓一要過幾條街先有喎。」阿虎聞言之後一腳踢落我度鐵閘度，我都畀佢嚇左一嚇，我即時舉起把刀話：「唔好以為你惡我就會驚你呀，我有武器架。」阿虎見到我拎住把菜刀即刻呆左一呆，佢之後用啲有十隻字有九隻字我聽唔明嘅廣東話講：「不是啦，是我的表弟在澳門給人捉了呀，要錢去救他呀，你也知道我沒什麼錢，他叫我找你幫幫他……」我聽到佢唔係上黎搵Miki之後，即刻鬆左一口氣，我之後同阿虎講：「佢要錢咋嘛，唔洗怕喎，即係一日未有錢到手，捉你表弟啲人都唔會殺左佢啦。你唔洗發晒矛咁喎，呢度有一百蚊，你坐的士返去等消息啦，我會幫佢諗方法架啦。」阿虎隔左鐵閘一手扯左果二十蚊走之後，其實已經無聽我講落去，佢轉身就走左。
喺阿虎走左之後，Miki喺我間房行返出黎，佢出黎果陣已經整理好自己儀容。佢之後拎左部電話出黎，話原來佢尋晚部電話無電熄左，佢頭先換左電開返部電話之後，發覺全部都係阿油send message畀佢。我同佢將阿油所有message睇左一次，大約重組左個案情。阿油尋晚喺澳門無所事事，所以就自己走左去觀光，佢每去到一個地方都影一幅相，再加段深情說話send畀Miki。就以大三巴為例，佢喺大三巴幅相度加左句：「我對你的愛就和大三巴一樣，就算歷盡苦難之後，仍會屹立不倒。」我見到呢句忍唔住大笑左出黎，我同Miki講：「咩愛會屹立不倒呀，九唔搶八，佢平時諗起你果陣條賓周就真係屹立不們倒啦。」Miki唔理我繼續睇落去，去到佢觀完光之後，佢發覺Miki都係唔覆佢果陣，佢就開始借酒消愁，當佢入左五支Jolly Sandy之後，係我無寫錯，佢真係飲左五支Jolly Sandy，我諗佢係因為唔飲得又要學人飲所以剩係係咁飲Jolly Sandy打算博Miki可憐啦，但當時Miki電話都熄埋又點會理到佢。Anyway佢喺飲左五支jolly Sandy之後，佢竟然真係飲到醉醉地，佢開始將Miki唔理佢歸咎於Evans，佢覺得Miki係睇唔起佢唔夠Evans有錢，有幾分醉意嘅佢一怒之下就決定左去賭場博一鋪。當然之後嘅劇情一啲都唔出人意表，唔識賭又學人賭嘅佢，輸到差唔多要當底褲都係意料中事。可能因為受到酒精，雖然果度都係得少少嘅酒精影響，阿油又竟然當場問啲貴利度水，咁無錢還人地就緊係唔畀佢走架啦。就係咁，佢之後就搵我求救啦。
睇到呢一度，我除左笑之外唔識畀反應，而我身邊嘅Miki有小小擔心，佢問我要唔要即刻拎錢過去救佢。我同Miki講；「唔洗擔心喎，都係果句啦，班友一日未收到錢一日都唔會殺左佢架，就算畀人斬幾刀都唔怕啦，最緊要留返隻手畀佢用黎打飛機咪得囉。」其實突然之間叫我拎一大筆錢出黎我都無計，仲要今日係星期日銀行唔開門。因為呢個原因我決定都係食個早餐，嘆杯茶先再想辦法。而Miki見我懶懶閒咁，佢就坐埋左一邊諗辦法去救阿油。我頭先喺阿油send畀我啲message入面，見到佢大約好似要我拎十萬八萬去贖佢返黎，我相信阿油事後都一定會即刻還到錢畀我，我仲可以座地起價收佢幾多息都得，不過我又唔想為左阿油呢條傻仔去搞到我星期日都要周圍撲錢，而且我覺得佢都抵畀人折磨下先。無耐Miki同我講：「我決定話呢件事畀Evans聽，問佢借錢去救阿油……」我聽到Miki竟然會提議到去搵Evans，就知佢應該都真係認真想去救阿油，可能佢係覺得搞到阿油咁佢自己都要負責任。不過佢竟然唔理之後Evans會點諗佢同阿油，而去選擇負呢個責任嘅時候，呢一刻我有啲欣賞Miki嘅承擔。不過欣賞還欣賞，我都係唔會去幫阿油去籌旗嘅。我諗左一陣之後做出左一個決定，我行開拎起個電話打返畀阿油，阿油一聽電話之後即刻大叫救命，但好快我就聽到佢畀人搶左部電話，而且佢仲慘叫左佢幾聲，佢應該畀人打左幾下。之後係一個粗聲粗氣嘅男人聽，佢只係喂左一聲我就搶住同佢講：「拿呢位兄台，老老實實啦，我就真係無錢嘅，不過你手上呢條契弟其實都有錢架，不過佢而家身在澳門就梗係拎唔到錢畀你啦，而且今日係星期日銀行又無開門喎，不如我斗膽畀個建議你啦，你就留佢喺度玩多一日啦。你陣間畀個戶口number我，我過住幾百蚊做佢今日喺你度嘅食宿費，不過果幾百蚊你唔洗用晒畀佢食架喎，求其買兩盒燒味飯畀佢ok架啦，有剩果啲你同班手足去happy下啦，到左聽日星期一，你咪挾佢過黎香港去銀行要佢畀錢囉。」
拎住電話個大漢應該估唔到我會有此一著，佢呆左一陣之後問我：「你真係唔打算贖返佢？」我聽到之後裝作無奈咁答：「又唔係話唔想贖返佢嘅，不過我真係無錢呀嘛，一係你如果肯收住兩千都放人嘅話我就即刻過數畀你。但你叫我一時三刻拎十皮八皮畀你我又真係無能為力喎，我又無理由要你地做蝕本生意架，所以先諗左個方法大家兩全其美。諗下諗下都我係唔好過啲伙食費畀你地啦，你地聽日直接記埋落佢筆帳上面咪得囉，到時你地想claim幾多都得啦，就咁話啦兄台。」大漢聽到我呢番話又呆左一呆，佢之後應該係行左去同阿油講：「喂呢條友係咪真係你朋友黎架，睇佢個款佢根本唔理你死活架喎。」而之後我隔住個電話都聽到阿油嘅喊聲，無幾耐之後個大漢應該放低個電話喺一邊但又無收線，我聽到佢開始安慰喊到收唔到聲嘅阿油，話見佢無人理咁可憐，話陣間請佢食餐好，等到聽日先再同佢過黎香港拎錢。聽到呢度我知阿油無生命危險之後就收左線，喺一邊嘅Miki好焦急咁望住我，我三番四次向佢保證阿油會自己解決到個問題之後，佢先好似放下左心頭大石。
喺處理左阿油件事之後，我同Miki都覺得係時候準備一下黎緊同Valarie之間嘅大戰。Miki佢打算約Daisy同Evans出黎食tea，佢打算話畀佢地聽Valarie係衰人，佢為左升職會不擇手段咁對付我，由Miki出面同佢地講應該會有好說服力。而我就打算去搵下Valarie究竟仲有咩唔見得光嘅嘢可以畀我利用，雖然我都預左佢應該唔會好似Judy咁無腦，咁易畀人斷正。但以佢行事咁狠辣，我相信佢無理由無利用過份工去攞著數。再加上我手上仲Judy呢張牌，我打算襯Miki去搵Evans同Daisy果陣我就去搵Judy黎解下悶，順手睇下佢有咩幫到手。喺Miki出左去搵Evans同Daisy之後，我就打左畀Judy。Judy一聽到我個電話之後應該好驚，佢隔左個電話細細聲咁問：「你又想點呀？」聽到佢咁嘅反應，我即時隔左個電話大喝：「八婆，而家係咪好怕聽到我把聲呀。枉我仲處處為你著想，諗住幫你剷除Valarie呢個大敵，點知你一黎就問我想點？做咩呀，而家無事我唔可以搵你咩？」佢聽完之後即刻問：「你係咪想對付Valarie？」「你知道仲唔快啲死上黎，睇下有咩幫到我手？仲有呀，我肚餓呀，順手買啲嘢上黎畀我食啦。」佢聽完之後靜左一陣，之後答：「嗯，咁你等我一陣啦。」講完之後佢就拿拿臨收左線，相信Judy作為Valarie曾經嘅好友，佢點都會提供到少少料畀我掛。
隔左大約個幾鐘，Judy終於上到黎。可能佢怕畀人見到上黎我屋企，佢除左包到實一實之外，仲又戴帽又戴黑超咁。我一見到佢即刻指住佢話：「你著到咁做咩呀？當自己係大明星呀？一陣啲人見到你仲以啲七十年代歌手出巡呀。」佢無出聲反擊我，佢默默放低左手上拎住個膠袋，入面好似有啲食物。見到佢咁順攤買左嘢食上黎畀我，我覺得啲嘢食應該有古怪，唔知佢係咪暗中想報仇喺入面加左料。有見及此，我同Judy講：「好啦唔笑你啦，見你買左嘢食上黎畀我咁乖，我都唔想你剩係望住我食，好啦我拎個碗出黎，你同我一齊食啦。」Judy聽到之後即刻耍手擰頭，定又故作鎮定咁話：「唔洗啦，我頭先食飽左啦，你食啦，我等下你都無所謂。」見到佢咁嘅反應我就知我無估錯，我哦左一聲，行左入廚房度拎左個碗出黎，之後將啲食物倒晒落個碗度。當Judy以為我中計打算開始食嘅時候，我將個碗遞埋去，之後向佢大喝：「我叫你食你就食啦，你而家即係敬酒唔飲飲罰酒，係要同我作對啦。」Judy見到我咁嘅反應開始驚起上黎，佢把聲震晒咁講：「唔係呀……我真係飽架啦，你都知我食得唔多嘢架啦……」「你係咪唔識聽廣東話呀，我叫你食左碗嘢呀，快啲食啦。」Judy被我咁樣迫法，無奈地拎起左隻匙，喺天人交戰左一陣之後，佢最後都係無食得啲嘢。佢淚眼汪汪咁望住我話：「好啦，你贏左啦，碗嘢我係叫廚房佬同侍應特別加左料落去……」我聽佢咁講之後好滿意地笑左出聲，我指住佢話：「所以話你呀，幾十歲人都唔化架，係我面前出埋呢啲術？而家就教識你一個成語呀，班門弄斧呀。」
喺事敗左仲要畀我笑，偷雞唔成仲要蝕渣米嘅Judy即時發爛，佢反過黎指住我黎鬧：「我受夠啦，你仲想玩我玩到幾時呀？你一直唔話畀我知你點先肯收手，你係咪想迫死我先安樂呀仆街？你再係咁玩我，我大不了同你一拍兩散囉。」「所以話你呀，上次見色誘我都無功而回，今次就諗住用玉石俱焚黎威脅我。乜你唔識用下你個死人腦去諗下點製造雙贏局面架咩？我都叫得你上黎幫我手對付Valarie啦，你應該諗下有咩可以offer畀我，等自己有啲籌碼喺手可以同我bargain下呀嘛。你覺得發我爛渣有用咩，你覺得我會畀你大到咩？都幾十歲人，你食鹽多過我食米啦，仲要我呢啲後生仔調轉頭去教你點做人處世，你慚唔慚愧架。」Judy聽到我咁講之後，即刻收起佢本身發緊爛渣嘅猙獰面孔，坐左埋一邊去諗下有咩可以offer畀我。其實我覺得Judy之後食公司夾棍果陣，Valarie好大可能係同謀，不過就算係Judy都唔會話畀我知，因為如果我利用呢樣嘢去對付Valarie咪即係篤爆埋佢。喺諗左一陣之後，Judy同我講：「有樣嘢我唔知幫唔幫到你手啦，不過佢而家果個鬼佬未婚夫有啲奇怪嘢。我一直都唔知佢正職係做咩，不過佢好似成日都會做啲買賣咁，但佢又唔肯講佢啲買賣究竟係做咩……」「咁你有無聽過Valarie有兩個黑人大漢朋友，仲要好熟？」「呢樣嘢我就唔知啦，不過Valarie件鬼佬身邊有好多古怪朋友，就係因為佢身邊啲人都唔三唔四，我先覺得佢有古惑……」聽完Valarie咁講之後我心底一寒，一陣佢條洋腸原來係國際罪犯，咁我咪仆街？不過有危就有機，睇黎呢樣嘢我可以拎黎大造文章。
喺呢個時候，尋晚唔知去左邊嘅阿妹突然返返黎屋企。佢一開門見到Judy之後即刻大吃一驚，佢指住Judy話：「嘩阿哥我估唔到你都有返兩手架喎，咁快又有第二個……」我聽到佢咁講之後即刻否認：「你都痴孖根架，你覺得你大佬我似鍾意掏古井咩？呢個婆婆係我喺老人中心做義工果陣識返黎架。」我阿妹又係好似平時咁完全無視左我講嘅嘢，佢將Judy從頭到腳打量左一番之後，就望住我講：「估唔到阿哥你都幾識食架喎。」我指住枱面上Judy拎黎果碗嘢同我個妹講：「既然你都覺得我係識食之人，我又真係有好嘢益你，枱面碗嘢好嘢黎架，一場兄妹我請你食啦。」做左咁多年兄妹，我阿妹知道我唔會咁好死突然請佢食嘢，所以佢都係無視左我呢個offer，我身邊嘅Judy一臉無奈，不過佢都係無出聲。喺臨行返入自己房之前，我阿妹畀左個公文袋我，佢話：「頭先我開信箱果陣見到呢袋嘢，上面寫住你個名架」「其實我有讀書識字，我都知個紙袋上面寫住啲字係我個名黎。」我阿妹聞言之後只係應左句粗口就走左去。當我打開個公文袋嘅時候，我見到入面係一張A4紙，而張紙上面係啲用電腦打出黎嘅字，大意係叫我小心啲，下次唔係淋尿咁簡單。我見到之後心頭一震，不過我唔想畀身邊嘅Judy知道發生左件咁嘅事。我唔知呢封係Valarie畀我嘅警告信，定係大明畀我嘅犯罪預告，又抑或係仲有其他人想對付我。不過我呢個時候突然擔心Daisy可能會有危險，我本身想即刻打畀Daisy睇下佢有無事，不過又諗起呢一刻佢應該同緊Evans同Miki一齊，如果有事佢地會通知我架啦，更何況我打畀Daisy都唔知應該同佢點講好，就係咁，我喺打發左Judy走之後，一直喺度諗究竟係咩人想對我不利，我又要點提防。