今日我開始左對公司啲同事進行復仇大計: 第二十八節
「其實聽朝我仲要返工，我都唔慣玩到咁夜……不如你放我走啦。」我對住眼前一身Biker打扮嘅Jasmine講。「後生仔洗乜訓架，你陣間喺度訓陣，我再車你返工啦。Come on，陪我玩多陣啦。」「哦……咁你點話點好啦。」呢啲對話係發生喺星期日晚嘅同盟會秘密基地度。話說Jasmine喺星期日突然whatsapp我話Evans見悶悶地叫埋我上同盟會度飲嘢傾計，為左刺探一下軍情，我當然即刻應承啦。但點知我喺大約十點度上到去同盟會度，已經見Evans醉倒左喺一角不省人事，而佢身邊亦都有幾個醉漢同醉娃訓晒喺度。剩返坐左喺電腦面前上網嘅Jasmine係仲清醒嘅，我見狀即時喺心入面暗駡左幾句粗口，而且打算轉身就走。點知Jasmine即刻拉住我唔畀我走，要我陪佢玩。眼前嘅Jasmine一身Biker皮褸加埋對窄身牛仔褲長Boot，同上次嘅文藝少女look截然不同，由於佢一身衣物都相當貼身，顯我佢身段玲瓏浮突，喺佢哄埋黎唔畀我走果陣，我都不敢吞一吞口水。既然唔想都上左黎，我決定試下喺Jasmine口中探聽多啲關於Evans嘅事，佢拉左我去單位一角席地以坐，喺坐低左之後佢順勢挨左落我度，從佢髮端傳黎嘅香氣令我有啲心神蕩樣。為怕令佢發現我褲檔間預計可能會有嘅生理反現，我開始問佢嘢黎轉移佢嘅注意力：「你同Evans咁熟咁親密，唔知真係以為你地有路。」Jasmine聽到之後甜笑起上黎，佢話：「你唔似咁老土，會用呢啲旁敲側擊黎試探我同Evans係咪有路架喎。你想追我定追Evans呀？」我聽到之後只可以笑掩飾我嘅尷尬，我苦笑道：「唔係……即係我想了解你地兩個多啲，可以早日融入你地個圈子姐。」「我同Evans有時玩到大，我地之間乜都會講，撻唔著架。我連佢幾時失身，同當中嘅詳情都一清二楚，無晒fantasy，點可能會一齊到呢。」既然佢都聲稱自己對Evans嘅嘢一清二楚，我立刻打蛇隨棍上問佢：「話時話，我公司有個女仔叫Miki，佢好似係Evans喺美國果陣識嘅朋友，你會唔會又識呢。」「Miki……嗯，等我諗下先……我印象中Laura個roommate好似叫做Miki，我去美國果陣好似都同佢玩過幾次…..」「咁請問Laura又係咩人呢？」Jasmine聽到我問呢個問題之後，意味深長咁笑一笑，之後再答：「Laura咪係Evans個ex girlfirend囉，即係佢成日提住果個呢。」「即係做過stripper果個？」「係呀，咪就係人稱Laura Viagra果個Laura囉。」
「叫得Viagra，我未見其人，都已經想像到佢有幾咁索。」我一路問一路起身行左去開左支啤酒黎飲，暗自慶祝我又向真相埋進左一步。Jasmine繼續講個故事：「佢直頭Hot到連我係女仔都對佢著迷囉，佢係香港人同拉丁人嘅mix黎，佢遺傳左佢媽媽嘅東方人標緻面孔，又選左佢爸爸果邊嘅拉丁人火辣身段。當年Evans同佢行出街果陣，應該有好多男人想打Evans一身囉。」「難怪Evans成日提住佢啦，咁佢地點解會分手嘅？」「Laura嫌Evans悶呀嘛，你知啦Evans就算點反叛極，本質上都係個溫室長大嘅少爺仔。但Laura不嬲追求刺激架嘛，你見佢為左達到目前連stripper都唔介意做，佢平時去示威果陣次次都要企到最前架，Evans點會啱佢呀。」我聽完之後嘗試將Laura同曾經係佢roommate嘅Miki聯想埋一齊，不過就咁聽落佢地實在太南轅北轍，我諗唔到Miki同Laura之間有咩共通點。「咁Evans同Laura散左之後仲有無聯絡？」「無啦Laura喺分左手之後好拒絕地無再搵Evans，反而我同Laura就仲有聯絡。講開Laura，佢早幾日好似黎左香港探朋友。」早幾日返左黎探朋友？巧合地情人節同之後果日Miki都攞左大假，我估好有可能佢係攞假黎陪Laura。「咁你有無話畀Evans知Laura黎左香港？」「我頭先話左畀佢知，佢就係聽到Laura返黎都唔搵佢，佢先飲到醉左咋嘛。不過算啦，Laura而家同左個澳洲surfer喺埋一齊，睇怕應該都忘記左Evans架啦。好啦唔好再講Evans啲舊情人啦，乜你無興趣知下我啲嘢架咩。」說罷Jasmine起左身行埋黎我度，搶走左我手上支啤酒黎飲，而且飲之前佢仲故意用脷喺酒樽口打左個圈，情景香豔誘惑得令我血脈賁張。為免自己會做錯事，我即刻托詞話屋企唔記得熄燈，諗住轉身奪門而出，點知Jasmine堅持要車我返屋企，我唯有死死地氣跟佢落去。
一落到去見到佢架車真係嚇親，原來佢嘅座駕係一架紅色Ducati電單車，一個女仔揸架咁大馬力嘅電單車真係好少見，難怪今日佢一身Biker造型啦。Jasmine拋左個粉紅色嘅頭盔畀我之後就上左車等我，而一臉尷尬嘅我上到車之後唔知隻手應該擺喺邊。Jasmine捉住我對手一野攬左落佢條腰條，唔等我反應就踩油門開車。嘩仆你個街，而家天若有情咩。佢一路揸車將我由港島車到我去荃灣，但問題就係我屋企根本唔喺果邊。佢一直不停周圍兜，好似無想停車嘅意識。一直到五點幾佢先肯停落黎，不過佢停嘅地方係大帽山，嘩佢唔係咁老土想同我睇日出呀？點知真係畀我估中，佢真係想同我睇日出。佢揀左撻空地就捉住我坐低落黎，挨住喺我膊頭度等日出。此情此景其實真係幾浪漫，一向都唔鍾意呢啲花臣嘢嘅我都不忍破壞呢個氣氛，我選擇左唔出聲陪佢睇日出。
到大約七點，佢先肯車我返公司。又一個巧合，喺佢停車喺我公司門口果陣，我撞正啱啱返到公司嘅Daisy。佢見係個女仔一早車我返黎，而且衣衫不整，佢即刻對我怒目而視。喺我想上前向佢解釋之際，唔知點解我心入面有把聲音阻止我咁做，連我自己都無察覺，經過呢個多月嘅相處，Daisy已經成為左我心目中嘅天使。喺佢身邊留得越耐，我就越意識到自己係有幾污穢。而且我嘅任務一日未成功，我都唔應該同佢發展出咩感情。所以喺果一刻，我選擇呆呆地目送住Daisy入電梯，而無走上前去解釋啲咩。喺我身後嘅Jasmine上前喺我面上輕吻，之後就揸車絕塵而去。