死後百日: 第一日 平行時空的引力
--死亡倒數十天前--
「求下你，我一時三刻真係攞唔到十幾萬出嚟，我知係我唔啱，你如果肯嘅，我搵相熟車房幫你整，噴返油，一樣可以整得好好睇睇，你當做下好心，我都係失業先至揸Uber，我真係無晒錢，係你話大家私下解決，唔會報警我先至無報保險，而家你check完話要大拿拿十幾萬，我真係賠唔到俾你呀。」 對住呢個年紀應該仲要比我細幾年嘅西裝友，我講下講下，眼淚都滴埋出嚟。
呢件事發生喺上星期，我開工揸uber嘅一個晚上，我揸車去到貝沙灣接order，就喺停低嗰陣，唔為意前面部瑪莎拉蒂啱啱好褪緊後，我一轉彎就撞咗去佢車尾泵把，留低一個大約五毫子咁大嘅凹痕。當時著住T裇短褲嘅呢個男人，就同一個十零二十歲嘅女仔一齊行咗落車。
「你咁唔小心嘅，你飲完酒呀? 」
「唔..唔係呀，我真係睇唔到。」
「唔洗緊張，好小事啫，我哋自己傾掂佢，你留個電話，俾我影一影你身分證同車牌，等檢查完，報個價俾你，到時你俾錢整返就算啦，我趕時間返上樓，我到時安排好會通知你。」
當時嘅我又點會估到，原廠報價返嚟，一條花痕承惠十三萬呢。
「喂，部玩具我隨便揩揩碰碰返一返原廠保養最基本檢查維修都十萬啦，我仲未計你嘥我咁多時間，仲要約我出嚟同你呢啲人講嘢，Uber吖嘛，你唔想賠，我跟返程序而家報警囉，你驚咩啫?」 「你報警我都賠唔到俾你架，你當做下好心，我真係無咁多錢呀。」
「我唔志在錢，十幾萬我跌都跌咗，要唔要你賠我睇心情，車我仲有大把，不過我係要玩你，你吹咩窮X? 你搞到我心情唔好，你死都要死掂佢，你點樣賠唔關我事，總之下星期前，我要部車喺原廠攞得返出嚟，我唔理價錢，總之你揩到我部車，你去埋單，我講完，唔好同我求情，fuck off, you idiot 」
三十幾歲人失業，揸車搵食都咁唔小心，我都覺得自己好無用，只係估唔到自己會因為十幾萬，跪喺條街度喊。
十幾萬都賠唔起，呢個就係人生失敗嘅我。
講咗咁耐，學sales話齋--「同你介紹返」，我叫徐子豐，未死嘅話下個月就三十四歲，唔好睇我咁折墮，我大學讀嘅係新聞系，當年實習嘅時候就已經知道自己唔係做記者嘅材料，畢業之後就一直喺報館做排版校對，一做就做咗十三年。喺一個人人上網睇新聞嘅年代，排版校對簡直係夕陽工業，只係無諗到，轉變話嚟就嚟。就喺舊年年尾，我俾公司人事部叫咗上去，話咩「配合資源調配，閣下職位已經被取消」喎。
「咁係咪即係裁員呀?」
「公司多謝你嘅付出，麻煩你今日內交接好工作，清返好你而家個位，下晝5點前交返職員證同所有鎖匙返嚟人事部，到時我哋就會俾埋人工同代通知金嘅支票你，長期服務金方面，希望你明白，公司係對沖強積金供款嘅，咁喺度祝你前程前錦先。」
就係咁，我就無咗份工，不過「多謝我付出」嘅唔止香城日報，原來仲有我拍咗拖七年嘅女朋友。
「你而家話俾人炒，我點同我阿爸阿媽交代呀? 你叫我同佢哋講你工都無埋，層樓又要留俾你阿媽住，買多層樓你又未夠錢俾首期，所以唔結得婚住，係咪咁呀?」
「唔係，只係postpone到下年啫，我哋儲落啲錢又唔會郁嘅。」
「如果係咁，我哋都係冷靜下先啦，我等都等咗咁多年，其實你份人太軟弱啦，我唔係要你發達，你又唔係叻，又唔係上進，但至少唔係做份咁嘅工都仲要俾人炒囉，我要嘅係安全感呀，如果結唔到婚，樓又買唔到，我都睇唔到我哋仲有咩將來可言。」
佢講得無錯，我由細到大份人都係咁軟弱，有親咩事我都係先諗自己有咩唔啱、有咩做錯，就連Cathy攞埋我地儲落結婚嗰五十萬一齊離我而去，我都仲係覺得係我嘅錯。
Cathy本身係做財務顧問，我哋儲落嘅錢一直都係擺喺佢度，我從來都無過問。
到而家過咗大半年，揾工都搵足大半年，全部石沉大海、音訊全無。原本諗住賣埋部車，但係聽講揸Uber收入都唔錯，又點會諗到，到頭來錢又賺唔到，仲要賠十幾萬俾人呢，唉。 就喺我最失意嘅時候，我終於鼓起勇氣打俾我大學時代最老友嘅莊員Johnny。
「咁嘅環境，大家都捱緊呀，唔係唔借俾你，但係呢排我都真係好手緊呀，你知我老婆同個仔都仲要靠我養架啦。」
「我都明嘅，唔緊要喎，我諗我搞得掂嘅。」
「我都好擔心你架兄弟，一早就話你知你條女唔係善男信女，你又唔聽，你諗下點追返筆數先啦，我唔講住啦做嘢呀，得閒再食飯傾啦」
以我性格，我又點有可能喺Cathy手上攞得返啲錢吖，而家仲要為賠十幾萬，搞到我頭都大埋。
-死前一小時-
「你部車又殘又舊，咁都攞得出嚟做Uber，泥頭車都得啦」
送走個醉酒大叔，收到佢一星評分，如果個評分再跌，我連uber都唔駛揸。
好多人都話，你要學識反抗，遇到唔合理嘅事，唔應該逆來順受。但係我好攰，我嘅性格根本唔適合喺呢個社會生存，我就連做人嘅資格都無。
沿住新娘潭路，嚟到一個四野無人嘅燒烤場。
我已經決定好，既然我嘅失敗係由我自己造成，咁就由我親手做個了結。
呢一刻我不停同自己講，「好快，好快就會過去」
周圍安靜到連自己嘅心跳都聽得到，「卜通卜通...」聲音一直加快。
準備好晒之後，我拎出紙同筆，寫低最後幾句說話。
「對唔住，我真係唔適合喺呢個世界生存，原諒我。」
---------------------------------------------------------------------
之後發生嘅事，大家都知道啦。
---------------------------------------------------------------------
當我再有「意識」嘅時候，我已經唔再係我。
呢一刻我好似升咗上半空咁，見到兩個唔同既結局，但係所講嘅「見到」，又唔係肉體上，雙眼視覺嘅感觀。而係感知到眼前，有兩個唔到嘅結果出現。
「時空因為事件分歧而產生分裂，係自然嘅法則。」
有一把聲音，傳入我嘅意識。因為同樣地，佢並唔係真正發出嘅聲音，而係直接印入我嘅意識內。
「我係咪已經死咗? 眼前呢一切又係咩一回事? 你又係邊個?」
「生與死係肉體上嘅意義，呢一刻，作為「你」嘅意識，已經唔再係透過肉體上大腦思考而產生嘅意識，呢一刻嘅「你」，亦唔係你哋各種信仰當中嘅靈魂。而係透過三維世界以外既宇宙記憶而存在，所謂嘅「你」並無任何物理形態，「你」係一個量子單位，你呢一刻嘅感知，源自四維空間內宇宙萬物記憶的儲存庫，透過量子聯動，再產生「你」嘅意識反應。而呢個同你聯動嘅「我」，就係嚟自四維空間，我係量子，亦係波幅，喺呢度，時間唔係單線流動，亦都無始無終，而「你」係時間嘅某一個維度當中，一次生物自毀事件而產生，你本來唔應該再存在，但係喺生與死之間，你成為咗一個非死非生嘅疊加狀態。」
「Sorry，我真係聽唔明，我以前讀文科，你既然無所不知嘅話，都知香港教育有幾廢，我只係想請問一聲，我到底而家死咗未...」
「呢度無生亦無死，因為無時間嘅直線流動，你既生，亦死，又因為一切巧合，喺生死之間產生分歧，令時空出現一個「你」仍然存在於其中一個平行時空內，而既生非死嘅你，因為同肉體分離，而回復成為一個量子單位，用你能夠理解嘅說話去講，你正係透過一個好似電腦數據庫嘅備份嚟思考，從而產生「意識」，你已經再無肉軀。透過量子聯動產生反應同感知。量子聯動嘅特性，就係無論兩粒量子相距幾遠，就算係百萬光年，乃至無限遠，量子糾纏所產生嘅聯動，仍然係即時同步，即係話處於數據庫內嘅「你」點樣思考，同時就會傳送到呢個處於兩個平行時空狹縫之內嘅「你」。我作為量子引流既存在，係嚟協助你離開呢個狹縫，令兩個平行時空繼續自由發展。」
「喺直線流動嘅三維空間入面，地球人類所理解嘅一日，可以有幾億個平行時空分歧出現，佢地各自發展、互不相干，但係三維空間內嘅意識，亦即係識子，只能夠依存於肉體，一旦好似你咁脫離而出，就會回歸到四維空間，我嚟係要引領你回歸宇宙，將識子能量脫離聯動，重新置入另一個生命當中，呢樣就係人類所講嘅輪迴。」
「嗯，我放棄。總之有一個我死咗，另一個又未死，兩個平行時空，而呢一個我，就要去投胎，係咪咁?」
「隨便你點理解。咁而家你將會同我聯動，返到宇宙記憶當中。」
「我成世人都無做咩壞事，咁下一世會做咩?」
「我唔判斷咩係壊咩係好，好與壞係生物系統當中行為嘅法則，至於你會做咩，我答唔到你，你可能喺其他時空、其他星球重新投入，成為意識，又有可能喺宇宙意識當中消失，但即使係一粒識子，我哋都要引領你返去能量嘅核心。」
「有無話好似啲咩回魂呀咁架?等多七日返一返屋企咁之類」
「我想引用一句你哋人類意識嘅反應: 你好煩，你講完未?」
「對唔住...咁我哋行啦...」對住一個連人都唔係嘅「物體」，我竟然都仲要道歉。
但就正當我感知到我正係離緊開呢個時空嘅時候，突然有一股力量將我拉返住。
「你被時空困住，拉返去線性流動嘅時間上，我仲未知道係咩原因。」量子引流說。
待續