死後百日: 第零日 終結是另一個世界的開始

香港地，要死可以好簡單，又可以好難，視乎你會唔會好似我咁，考慮得太多。

跳樓就驚層樓賣唔出，累埋屋企人，去第二度跳，又驚累街坊。

再者，我都係有啲畏高。

(吓?! 自殺呀，仲畏高?! 要死就快啦)

咁我唔想血肉模糊咁死得唔得先！





由大尾篤揸車去到新娘潭附近一個燒烤場停低，四野無人，最好就係一個人諗下點死。

 一個鐘頭前，我做埋最後一張單。係一個成身酒味煙味嘅阿叔，凌晨一點幾，喺大埔墟call uber返大尾篤。

「你好、晚安、 多謝、拜拜」，我唔係熱情多嘢講嘅司機，但係自問一定比的士佬有禮貌。

沿住汀角路，經過咗圍封住嘅龍尾灘，阿叔指住左邊，「前面村屋度停啦。」

「好，多謝你」我停低，然後又係公式回答。





「你部車真係又舊又殘，咁都開工做UBER，泥頭車都得啦。」阿叔臨落車，拋低呢一句說話。

「多謝你意見，拜拜。」我望住佢一路行一路撳住電話嘅身影離開。然後，我就收到一個一星評分。

由武漢肺炎開始，短短幾個月，我經歷左失業、失戀、一路周圍搵工send CV，一路揸Uber搵兩餐，不過早排一件平凡不過嘅小事，就成為咗打沉我嘅最後一根稻草。呢件事就留返我死咗之後回魂返嚟先再講啦。

我望住個燒烤場，回想啱啱發生嘅事，只係覺得有啲悲哀。

BBQ? ...係喎，點解唔喺車燒炭? 但係無買炭，咁點燒呀?





google下，廢事死唔去要人救就核突。

[[燒炭自殺方法--搜尋]]  

[[約有 250000個結果]]

[[用喉管接駁汽車廢氣，於車廂內製造一氧化碳中毒，效果比燒炭更佳]]

咦，可以試下喎，車尾箱有條平時洗車駁水龍頭用嘅膠喉，幼就幼啲，都應該夠。好彩仲有卷封箱膠紙喺車度，係公司裁員嗰陣，用嚟pack嘢走用剩嘅。

一邊行去車尾駁好死氣喉，心喺度諗，唔知咁樣死會係點樣嘅呢? 平時聞人車啲廢氣都會咳兩聲，會唔會難聞得滯捱唔到最後?

一路諗但又一路繼續做，好嘞，到駁埋個車窗就大功告成。

癡唔穩嘅?! 仲搞到成身汗... 會唔會到最後死唔去? 到時上埋新聞仲好笑





「用最蠢自殺方法失敗 送院救治 警察都忍唔住笑」

唉，唔理得咁多，用咗成卷膠紙，癡晒所有窗隙，掂啦啩，總算可以去死啦。

我坐返上車，抹一抹汗，撻匙著車、開大冷氣、較低張櫈，心諗其實訓著死都幾好吖。


[[播放中:鋼琴演奏專輯 04. 蕭邦--夜曲 Nocturnes, op.9 No.2]


我依稀仲記得我聽到最尾突然升高既八度音，之後無幾耐我就已經慢慢失去知覺。

我唔係因為無錢，唔係因為際遇、係我真係好攰，好想抖下，永遠咁抖下。





如果話死左之後仲有靈魂，我諗我都仲可以理解到，但我勢估唔到嘅係，件事唔係咁簡單。

我唔知道隔左幾耐，但睇黎天都已經開始光，就喺我完全瞓著之後，我就好似飄喺半空中一樣。

...........我似乎同時睇到兩樣唔同嘅嘢。

一個軍裝警竟然若無其事穿過咗幾個抬我出黎嘅消防員。佢哋就好似兩個影像疊埋一齊咁。

一邊係死左嘅我，仵工用屍袋將我入住，送咗上黑箱車，周圍仲有好多警察；但係同時另一個疊影，有另一個我，戴住氧氣罩，抬上咗救護車。

同一個場景，但係兩個結果出現喺我面前，而眼前嘅兩批人，佢哋完全唔知有另一邊嘅存在。

我喺兩個平行時空之間，一個我死咗，另一個我無死到，咁無死到嘅「我」，入面嘅靈魂同意識，仲係唔係「我」？

我諗唔明，完全，唔明。





待續