[甜]人妻食用手冊 II: 第五十二回 分歧

第五十二回 分歧

呢排心情好差乜人都唔相見.

放工就返屋企打機,
連公園都無落.

今日如常返屋企,
一開門我以為自己入錯屋.



立即行返出去望一望,
無入錯呀.

再入返去,
幾乎連行都行唔到,
成個廳放滿晒一個個紙箱.

[老婆!!]
結果無人應.



行去叩一叩門,
[仔!!]

亞仔打開門望一望我.
[乜事呀?]

[個廳D乜野呢架?]

[點知.....]



[你亞媽呢?]

[唔知......]
唉,問佢都係晒氣.

正當我想出返去事,
[老豆.....]

[乜事呀?]
佢無出聲,
唉,都估到係乜啦.

[早排先比完錢你咋喎.]

[咁用晒丫嗎.]



[你又科金呀?]

[少少啫.]

[亞仔....你唔係唔知我.]
都未講完佢已經好大反應.

[唔比就算啦!!]

[等等....]
我係銀包攞咗D錢比佢.

[唔好科得咁狼呀.]



[得啦.]
收咗錢之後即刻閂返門.
雖然知道唔應該但係每次都心軟.

到咗夜晚,老婆終於返呢.
[老婆,呢D野妳架?]

[係呀.]

[乜呢架?]

[貨囉.]
真係比佢激死,好似聽唔明中文咁.
[咁係乜野貨呀?]



[我做傳銷D貨囉.]

[吓!!傳銷?]

[係呀,師傅話我啱做呢一行呀,咁啱有個師兄做所以咪跟佢囉.]

[老婆....妳講笑乍,今時今日重有人做傳銷咩?]

[我啱啱去上堂都唔知幾多人做呀.]

[老婆....妳可唔可以做人腳踏實地架?]

[做傳鎖有乜問題呀?]

[無問題,我咪睇下妳幾多親朋戚友比妳出賣囉.]



[係呀,我就出賣朋友,好似你咁呀?腳踏實地....窮死一世就有你份.]
一個人蠢唔緊要,但係一個人又貪錢又蠢就真大鑊.

[係呀,我窮,我又唔識炒呢樣炒嗰樣.]

[我無叫你學咩?叫你你就懶清高.]

[我根本唔鍾意做呢D投機野,我叫妳買收息股妳又話無出色.]

[依加七老八十呀?收息?玩股票梗係要搵大錢啦.]

[OK,人各有智,既然妳咁勁咁妳繼續做妳想做嘅野,我唔阻妳亦無資格阻妳.]
同佢講道理真係晒氣,
咪放長對眼睇下幾時燒晒D錢囉.

就係呢個時候,我收到一個電話.
居然係亞Cat搵我.