[甜]人妻食用手冊 II: 第四回 日常

第四回 日常

見亞仔咬牙切齒咁對住個mon打字,
望都無望我一眼.

唉...十成又喺網上同人嘈.
[仔...今次又乜事呀?]

[個版主鎖我AC呀.]



[咁你做咗乜事比人鎖丫?]

[我只係開幾個分身之嗎.]
唔洗問又係開呢圍人呢.

[咁人地有人地嘅規矩,唔係你話咁就咁架嗎.]

[佢開得個討論區就預咗架啦,我理得佢乜規矩丫,我現在就同佢地玩,不停開分身.]
有時真係唔明現在D細路係自我中心定係無視規則.



佢間房陣味真係好勁吓,
[仔...你有幾多日無離開過間房?]

[你...唔好煩我呢,你地講呢講去都係嗰幾句!!.]

[亞爸唔想見到你咁呀.]

[我呢D垃圾係咁架啦,唔係房重可以做乜.]

聽到呢句我又有D慶,


[我地邊個話過你係垃圾呀.]

[我同其他人比根本就係垃圾.....你出去啦,我唔想再講呀.]
我同老婆都係從來無比壓力佢,
同佢改個名叫子樂都只係希望佢開開心心做人就得.

點知現實啱啱相反,
佢越大就越唔開心,
成日同人比.
睇見佢咁樣真係唔知點算.

閂返門後就聽到老婆講咗句好難聽嘅說話.
[一日最衰都係你,好教唔教,教個仔打機,
攪到佢書又唔讀,工又唔搵,日日就只係識係房打機!!]
我無聲出因為呢個的而且確係事實.



咁我都打咗幾十年機啦,
點戒啫.

[老婆,妳夠日日係屋企啦,又唔見妳理下個仔?唔好成日掛住做埋D神神化化野好唔好呀.]

[唔係我日日諗經你有咁平安.]

[咁叫妳個神送幾球比我洗囉.]

[你等錢洗就搵個份好D嘅工,叫咗你唔好做D咁無出色嘅工架啦.]

[老婆,妳唔係唔知我乜野學歷架,妳估我想做苦力架?.]

[我叫你跟我去上股票班上投資班你又唔肯去.]


聽到呢句我真係扯火.

[妳重好意思講炒股?妳有無計過妳輸咗幾多錢呀!!]

[喂.....,投資有輸有贏好正常啫.]

[正常!?成層樓呀,如果唔係妳炒燶股要攪到要賣樓我地洗攪成咁!]

[你現在係唔係怨我呀!]
見到老婆紮恆晒馬準備開拖個樣,
佢次次一鬧就鬧到停唔到口.

[算啦...無野啦當我無講過,我瞓先.]

[次次話你你就走去瞓,我未話完呀...]


我走返入房大被冚過頭瞓,
佢有佢鬧就我有我瞓,
又唔係第一次都慣啦.

係呀,呢個就係我每日面對緊嘅情況.
一個宅都無論嘅隱青,
同埋一個有正經野唔做,
有工又唔返,
成日掛住炒呢樣炒嗰樣,
神神化化嘅老婆.

我每日都唔想入呢個家,
但係無法只可以硬食,
離不開,留不底,
還好玩app搵到一絲人生樂趣.