唔怕話你知，我老婆係貞子: 第一章：愛情降臨

果晚有一個朋友聚會，地點選擇左係某朋友屋企。
都係啲普通聚會，幾個朋友圍埋劈下酒食下零食吹兩嘴睇下電影咁。
由於幾個朋友都係恐怖片發燒友，所以每次聚會都會揀恐怖類既電影係電視播。
而果晚佢地選擇左一套經典恐怖日本電影【貞子】。
其實果晚咁岩撞正我失戀，所以我順便上去買醉，唔洗好快已經飲醉左。
當套電影播到一半既時候，我已經醉到頂唔順，所以決定同佢地講聲要走先。
阿文：【阿景~咁快走啦？仲好早渣啵，睇多陣先啦。】
我：【唔啦~有啲醉啦，我返屋企休息先】
阿文：【咁唔比面貞子？因住佢今晚搵你阿~】
我：【黎咪黎~未驚過！】




然後我就轉身行出左朋友屋企，回家去。
返到樓下間CD鋪，我決定問老闆租隻【貞子】睇埋佢。
我：【老闆~有無果套叫做【貞子】既電影租呀？】
老闆：【都唔知話你好彩定唔好彩，原本有一隻既，不過咁岩租左出去，我呢度有餅錄影帶以前人地錄低送比我既~我自己都無睇過，你岩睇既話就索性送比你啦。】
我：【哇~咁多謝曬啦！】
老闆：【客咩氣~大家街坊街里幫到就幫，況且我都就黎執笠，多謝你一路以黎既支持就真。】
聽完我都眼濕濕，眼見既CD鋪真係買少見少。
返到屋企後，我第一時間搵返部封塵已久既舊式電視機出黎，將餅錄影帶放入去播。
奇怪既係播左一陣都係無畫面出，正當我行過去伸手熄部舊式電視機，以為佢已經壞左既時候。
突然電視機有返畫面，畫面影住一個井，我等左佢幾十秒都無換過其他畫面，以為餅帶有事所以決定熄左佢唔睇。




正當我轉身行左幾步，忽然聽到後面發出【呃...呃...呃】既聲音，我寧轉身睇下發生咩事。
大叫左一聲：【唔那係掛！！！】
眼望著電視機入面有隻貞子爬緊出黎，一邊心入面自言自語：【肯定係我飲大左！幻覺黎架啫！嚇我唔到既！】
我嚇到腳仔都軟埋連企既力都無，一路嚇到講唔到野一路縮，驚到連我都唔知已經到左牆角，心知自己死期到。
而貞子亦都已經爬到我既面前，我閉上雙眼完全唔敢望佢。
我低著頭好驚咁講左句：【你除左識嚇人之外仲識啲咩呀！拍拖你又識唔識呀！....嗚嗚....嗚】
講完之後我喊到收唔到聲，而貞子見到我呢個情況頓時呆左。
【嘿...嘿...嘿】貞子發出低聲既笑聲。
我撐開雙眼望見佢嘴角向上揚，似乎係度嘲笑緊我失戀既事實。
我：【笑咩阿~笑！你又未拍過拖點會明我感受！要殺就殺啦！反正我都唔想繼續活啦！】




貞子：【拍拖？係咩黎？影響力可以大到連命都唔要？】
我：【你試過就知！】
貞子：【咁請你同我拍拖，拜託了。】
我驚呆地說：【下？...】
我地既愛情故事就係咁而開始左。