【奇珍異獸：愛情飲食系列】: 002 文學少女Beckie（中）

其實Beckie喺我以前嘅一個女朋友。當時嘅我覺得好耐，我而家緊係耐到唔記得真喺有幾耐啦。當個個都睇張小嫻嘅時候，佢睇張愛玲，我已經覺得佢係與別不同。佢會同我分享偉大嘅祖師奶奶嘅金句，雖然我無興趣。當然，以前嘅我其實咩都無聽入耳，只係久唔久事事旦旦咁應吓「哦」或者「原來喺咁」就過骨。而Beckie，佢都算喺一個由得你一邊打機一邊聽講完故事情節而唔駛你答番幾句咀都肯收貨嘅女仔，我甚至乎因為咁而唔捨得歸納佢為港女。不過，佢都有一種個個港女都會有嘅特質，就喺講嘢一舊舊唔清唔楚，要你喺咁估落去。當然，我知道好大部分時間嘅佢都喺有心想要講得唔清唔楚，只喺佢嘅大腦唔將啲嘢記實，又唔知自己想點，先會出現呢個講嘢一舊舊叫你估生估死的情況（叫你估佢想點同想去邊度食嘢果啲就例外啦，果啲直情喺叫你求生不得求死不能嘅例外）。

當年我記得有一次佢同我講話想睇齣舊舊地嘅港產片。我問佢套戲叫咩名，佢話：「唔記得。」。我心諗「（屌）咁你即喺想點呢。」
然後佢自己依依哦哦咁講落去。

「套戲個名喺兩個字嘅，男人為主，有警察，有賊，喺果個專拍男人戲嘅導演拍嘅呢」死啦唔記得咩名添，有任達華架。」

個樣仲開始有啲尷尬feel，但其實而家諗返都幾可愛（回憶總係美好）。

我睇住佢，佢繼續講嘢，佢真係幾靚。





「警匪片啊即喺？」我嘗試引導佢。

「唔喺啊好似，因為我諗無鎗戰連連果啲畫面架。」

你喺咪又想同我玩猜猜畫畫？點解無睇過你又知道佢無鎗戰連連呢？

第二日，我經過碟舖，買左隻《文雀》。當年無得Netflix & Chill，我地唯有匿喺屋企睇碟。點知睇完後佢好似忽然清醒咁同我講，佢終於醒起佢想睇果套叫咩名喇，喺《跟蹤》。

我屌。





但喺我當時緊係無屌出聲。