【奇珍異獸：愛情飲食系列】: 002 文學少女Beckie（上）

002 文學少女Beckie
＠天后祥利冰室

點講好呢？我剩係想講，其實我好鍾意睇Game of Thrones嘅女仔。而我講嘅呢個睇，喺識得睇果個睇。總之，簡單啲講，我鍾意啲睇有腦劇嘅女仔。果啲鍾意睇韓劇睇到喊晒口嘅，真喺返屋企等從天而降嘅愛情好喇，現實世界會將你迫死，你唔駛諗喇。

我有時覺得自己都有啲變態，因為我搭車嘅時候都會裝吓人地睇咩劇。有時喺街度見到啲女仔挨喺車廂門邊睇劇，我都會不經意咁望吓佢、望吓佢部電話，再望吓佢睇緊咩。睇膠劇果啲真喺唔駛拎出黎講，睇到眼濕濕嘅話我建議快啲返屋企；因為作為男仔，我見到你因為濕鳩劇情喊苦喊忽，只係會覺得好趕客。女仔唔駛一定喺Game of Thrones，只要你有睇過Legion、12 Moneys，或者你肯睇啲燒腦劇情片，例如會睇Dark但喺又唔會睇到戇鳩鳩一舊飯咁就得喇。深奧嘅劇情就算我唔識得即時解說過你聽，我都會先扮晒嘢，丙用心爬文、睇埋reddit之後mansplaining過你知。所以你唔駛擔心，只要你有心睇，我都會對你另眼相看。

睇到有女仔睇緊用腦嘅劇集，都可以稱為為返工放工搭車見到最優越嘅畫面（喂，點都好過見到人死衝爛衝爭位又或者無知男女唔讓比阿伯阿婆同大肚婆卦）。甚至我睇到你睇爆晒頭嘅The Walking Dead，我都會覺得你呢種女仔喺純情又純真嘅；因為我知道點都好過你同我講你好迷50 Shades of Grey或者Twilight。

我知道Beckie一定仲有睇The Walking Dead；雖然，我已經無再follow佢嘅任何soical media戶口，無機會睇到佢嘅updates。The Walking Dead第十季喺已經無晒吸引力，但為左果份感情，我諗我同佢都會各自繼續追落去，至少我當佢同我樣都有繼續睇落去。





Beckie喺一個點嘅人？當年嘅我以為自己一世都唔會唔記得，但係六年之後嘅我，我發現我嘅印象好似隔左幾層灰塵咁，變得好模糊。佢鍾意啲咩，其實我心裡有數，但佢有無變，我真係唔敢講。當然，佢可能已經變左都唔定，變到成個唔同晒有可能。但係，就算而家嘅佢會睇降魔的都唔緊要，只要佢有睇The Walking Dead，佢都仲喺我心裡面嘅Beckie。