求神畀我出一次Pool，點知畀埋個偶像男朋友我: 113

「家姐啊，你覺得網上識人係咩一回事啊？」我如常幫姐姐按摩小腿時問。

「網上識人？」她認真想了一想，答：「我覺得係有機會成功嘅！」

「點解啊？好多人都覺得網上世界一定係好危險，或者好假，十居其九見面都會失望㗎啵。」

「係嘅，但我覺得有一點係比現實生活識嘅好。」

「係咩啊？」



「唔會受外在條件阻隔人與人之間嘅距離。」

「即係點啊？講白啲啦～～」

「上網無人知你真實身份，你就唔需要好似現實咁包裝自己。無錯，鍵盤戰士啊、網絡欺凌、詐騙呢啲都係網絡嘅詬病，但如果你足夠成熟，視網絡係一個媒介，其實都係好好嘅平台去識人，例如語言app可以識世界各地嘅文化，討論區又可以搵到興趣相似嘅人，甚至知道原來香港地都有多元價值觀。就算對方喺現實生活中幾正幾差都好，大家都係一視同仁，啱嘴形就可以傾埋。所以，好多時啲人會喺網上隨心所欲吐真言，只求得到知己。講真，靚仔靚女唔難搵，但可以同自己connect到嘅往往少之又少，呢個我覺得係網上較現實識人嘅優勝地方。當然交友app有啲唔係真心嘅就另計啦！」姐姐一口氣發表了如此的偉論，而我還在消化中。

啪啪啪——過了一會，我忍不住鼓掌說：「哇，無諗過你對網上識人呢方面咁有研究，差啲可以寫篇論文！！！」

「咁我試過啊嘛，識到好多fd㗎～只係ex我撞咗板啫。」姐姐若有所思說。



「唔緊要啦，你而家有Richard咪好囉。」我安慰她說。

姐姐一聽到Richard這名字便甜笑地回覆著訊息。

其實她說的話是真的嗎？網上認識的反而會比起現實生活中更容易找到觸動心靈的人？

我總覺得，這並非必然，若然在現實世界裡，大家都能敞開心扉交流，那就不需要匿名的虛擬世界。

只是，這都是理想的，人隨著年齡增長自然學會偽裝。



我沒事、我很好，這些都是我們耳熟能詳的話。

因為大家都害怕對方未必接受自己軟弱的一面。

就算我面對喜歡的人——陳浩賢，我也不敢保證我馬上像和BU交談一樣，把所有自己的家人、朋友、感情事和兒時經歷等等通通告訴他。

偶像或不能提供最好的解決方法，或不能給予實在的擁抱，但他可以傳遞的就是一份同行的安穩、互相需要的感覺。

和他交談，我總是不知道時光飛逝，也不用知道他身在何方，只要我們交談，心與心便不知不覺連接著。

既然一生能遇上一個能讓自己放下面具的人，不論性別、年齡、國家，已是難能可貴，還需要介意認識的途徑嗎？

既然我都懂得說BU的面具就是陳浩賢，那麼所謂網上的我也不就是我的內心深處嗎？

所以，BU，不，陳浩賢，喜歡的正正就是面具下的沈絲絲。



那我其實根本沒有輸給任何人吧。