求神畀我出一次Pool，點知畀埋個偶像男朋友我: 93

「我哋不如分開啦。」

我拋下這句話，便衝出房門到客廳拿手袋。

童姐驚愕看著我問：「講咗喇？」

我充滿感激地向她點頭，急步離開。

等待電梯時，阿軒跑出來拉著我說：「點解啊？我做錯啲咩？我改啦！」



「無啊，我只係覺得我哋唔夾，你好好㗎。」我不想多作解釋。

「我唔想咁啊，既然我好，咁你更加唔應該離開我啦係咪？」他説罷後用力地抱著我。

「正如你鍾意落雨，我鍾意天晴，我哋係兩個世界嘅人啊！」我甩開他的手，情急之下想到這個例子。

「我都可以為你鍾意陽光㗎！只要你唔離開我就咩都得㗎。」他用那雙水汪汪的眼睛看著我，並跟我走進電梯裡。

為了避免心軟，我按電梯後故意避開他的目光，轉而望向前方的鏡子。



「嗚嗚嗚.......你真係咁狠心，一齊未夠三星期，已經咁對我！！你係咪有第二個喇？」

他第一次為我哽咽，原來就是認為我喜歡了其他人。

「唔係，係我哋兩個人嘅事！長痛不如短痛啦！」我馬上反駁他。

「我知喇，陳浩賢都鍾意陽光！一定係佢啦！」他抹走臉上的淚水，激動地抓著我的手臂說。

「哦！原來你一直都覺得我同佢有嘢！我同你講，真係因為你唔再好似以前對我咁溫柔，我先會咁㗎！」我再次從他的手裡掙脫。



「咁咋嘛，我改啦。我都係鍾意你，先會喺你面前做自己咋嘛～我會繼續為你煮野食，為你拉凳，做你嘅王子㗎！」

「算啦，你做返自己喇，而家講咩都無用。」我從電梯走出華麗的大堂，提醒自己要狠下心腸，不能重蹈覆轍。

「唔準走啊！」他繼續扯住我不放。

面對著保安員、住客的奇異目光，我感到很難為情。

這時，我收到一個不是聯絡人的Whatsapp來電。