求神畀我出一次Pool，點知畀埋個偶像男朋友我: 86

「sorry啊，家姐，你係咪俾我嚇醒啊？」我不好意思說。

「無，我怕你唔開心咋。今日食早餐你已經神不守舍，而家又嗌咩『好掛住你』。你以前咩都同我講，但唔知幾時開始就咩都唔講，連拍拖都靜雞雞咁。」姐姐忍不住開燈，一臉擔心地說。

「唔係啊……其實我係有好多嘢想同你講，但好怕俾你話。」我慚愧地答。

「你知我點都撐你㗎。」

姐姐.......



我鼓起勇氣坦誠面對自己和姐姐，說：「我……我個心好似唔喺白馬王子度。」

姐姐看著我，希望我繼續說下去。

「反而，有個人我係會無時無刻諗佢，無同佢message、見唔到佢我就會係咁諗佢做緊咩，佢一出現返個世界好似即刻重燃希望咁，剩係望到佢一個，同埋好想一直見到佢。我同佢無見一排，今次已經係第二次夢見佢，雖然第一個夢其實唔關佢事，但好笑嘅係都係出現佢個外型。」

姐姐一直點頭，我續道：
「我其實知我唔可以咁做，因為我已經揀咗阿軒。我feel到佢真係好愛我，我係有種終於出Pool好興奮嘅感覺！但除咗好開心有個人對我咁好之外，我就無咩感覺。如果我未遇到嗰個人，我應該會慢慢鍾意返阿軒，但而家正正就係咁……無論我點催眠自己都無用。」

「但你同阿軒唔係已經……？」姐姐不好意思問下去。



「係，其實我都無諗過兩星期咁快，話ready又唔係好ready咁，但我覺得咁可能可以睇到自己係咪鍾意佢。而事實係……」

我把過程跟姐姐簡略說了。

「乜阿軒咁心急嘅？我嗰時都試咗好幾次啦。」

我嘆了一口氣。

「通常啲情侶一開始緊係熱戀期㗎啦，但你哋就表面熱戀，實質就咁……其實你都好清楚自己點諗，咁當初因為寂寞同埋阿軒咁啱出現而揀佢？」



我又嘆了口氣。

「我係你，我會選擇同佢講冷靜下，諗清楚要啲咩先好做下一步。另外嗰個人就算罷啦，佢可以粒聲唔出走咗去，我覺得佢個心應該無你，如果佢係重視你，應該同阿軒鬥過先啱。」

「你已經估到我講陳浩賢？」對此，我不太驚訝。

「有邊個喎？尋晚我都醉唔曬㗎，見到佢一入房你個人當堂醒曬咁。」

「唉，眼訓喇。」我岔開話題。

其實我大可以再說說BU這個人，但感覺他太虛無飄渺，為了不讓姐姐更擔心我，我決定把話語吞下去。

「咁你諗清楚，最後決定都係你嘅。」姐姐有點沒好氣說。



她關燈後，我閉上眼睛嘗試入睡，可惜腦海全是陳浩賢在夢裡聽到我表白的笑臉。

真希望那時臨別的他是掛著笑臉，而不是那個看起來寡言冷酷的他。