灰伯爵的忌廉遐想: 下午最好能偷到我的美好

「Zita，妳要嘅人我已經帶咗嚟。」經過連番轉折下，我終於被帶上車。

我無睇錯亦無聽錯，喺我眼前嘅『編輯』，就係 Zita本人。

「Done?」眼前嘅 Zita 散發住一種喺鏡頭前無嘅高傲。同埋我估唔到佢講英文果陣真係有啲口音架喎……

「攪掂架啦。」黑超西裝友恭敬咁點頭，「無咩我出返去先。」



Zita 撥手示意叫佢離開。
「um…...」車門一關，Zita 就不停咁用懷疑嘅眼神掃我全身，「你就係寫文上連登唱我嘅人？」

佢咁問……點睇佢都唔似係善意啦。

「唔…唔係我。」我見到佢不懷好意嘅眼神，下意識就想退縮：「呢篇文係……係一個叫『白投浪』嘅人寫架！我只係抄佢篇文上網咋！」

「但我嘅人查到係你喎！」Zita 開口就鬧、連珠炮發唔駛換氣，「邊個想知咩『白投浪』？無名無姓咁，咪又係你啲分身！」

「真係唔係我……我無心唱你架！」我見到Zita本尊，已經勁驚。諗起我同黃少祥嫌唔夠爆咁作果個標題：又雞又公廁又淫亂咁…… 俾著邊個睇到都唔高興啦！


「唔駛驚。放心喎，就算你認係好憎我都好，我都會好好善待你架。」呢個時候，佢喺手袋拎咗一副黑框眼鏡出嚟戴。唔知點解，佢戴完副眼鏡講完呢番話之後，果一刻我覺得好放鬆、感覺咩都可以同佢講…… 我應該係將佢同miss 或者心理輔導個形象重叠咗。
「你喺上次嚟我簽名會果個呀嘛？」Zita 突然哄近我，問我：「我有少少印象，因為果日截咗龍個隊頭就係你。你坦白同我講，你對我嘅印象係點？」

「我，我果次截咗龍，拎唔到妳簽名。」我唔敢對住佢講，但又避唔開佢嘅眼神，把口亦好似不受控咁係咁講，「果一刻我唔開心……覺得妳好大牌，淨番幾個fans唔簽埋就走。」

「所以你就懷恨在心。」Zita睜大雙眼再哄前望，差唔多去到面貼面：「我都估到呢啲故一定係你啲因愛成恨嘅 Hater寫架嘞。我大致都估到邊個爆料俾你寫。你唔駛解釋。」

我好拼命咁擰頭，不過我講唔到嘢。我好驚，事情並唔係咁，但係我解釋唔到！
「你唔駛驚架。」Zita 又坐返埋位，拍拍熱褲下嘅大髀：「你將個頭挨落嚟，然後等 Zita姐姐慢慢安撫你…… 」
好似既定動作咁，我好自然咁就訓喺佢大髀上面，佢輕輕咁摸我嘅頭髮…… 



「以後聽到我嘅歌就諗起我啦。」然後佢放兩個耳筒入我耳仔：「當你覺得寂寞果陣就有我嘅歌陪你，等你唔再寂寞……」
https://www.youtube.com/watch?v=V-xLRihjHYs
「嗯。」我放鬆，任由音樂走遍我全身。

呢一首歌，好有畫面。
日來事忙夜會數羊 四點要遐想

 (喝著 吃著 很似一種信仰)

藍莓香 銀匙香 連甚麼都懶想

……

我已經唔知訓咗喺度幾耐。



我諗最少都聽咗佢廿幾三十隻歌。

呢種感覺……同我喺 youtube 聽佢嘅歌感覺唔同，我覺得自己好似隨口都可以唱出佢所有歌，仲要係一字不漏果種。
「醒啦？」Zita 嘅目光好溫柔，「好開心又有人可以體驗到我做歌手嘅感受。」

「咁即係點。」我仍然安躺喺 Zita 大髀上面，只係不停眨眼表示腦裡面無數解唔開嘅疑惑。

「你可以明白一個歌手要有幾了解首歌囉。」Zita用指尖捲撥住佢厚長嘅曲髮，「你知嘛，雖然你寫嘅嘢有啲好中、有啲又好無稽，但就當你寫嘅全部係事實，你有無嘗試過明白我、了解我、感受我之後先登出嚟吖？」
「……我……」我想講嘅嘢卡住喺喉嚨，只可以發出單音。

「咁啦，都夜嘞。今日就去呢度啦。」
「你唔可以再講我壞話、唔可以背叛我。知道嘛？」Zita伸出尾指，我就好自然咁勾咗落去，「呢個係我哋之間嘅約定，唔好俾其他人知道，okay?」

「知道。」我點頭。



「我對每個在意我嘅人都一樣係咁在意：無論係 Fans 又好、Haters 都好。記住啦。」

Zita 意味深長嘅一句說話，聽果刻確實係覺得好溫暖，但後嚟再諗返就難免……有啲打冷震。
「都晏啦，落車就直接返屋企唔好走周去，我哋之後再見。」
Zita 啪一啪手指，西裝友喺外面拉開車門。就好似變魔術咁，車已經喺我屋企樓下。

我好聽話，一落車就即刻返屋企。