灰伯爵的忌廉遐想: 不要不記得

有想像，先會有延續。
 


自從《不意外的意外》同《只要和你在一起》呢篇膠文推出咗之後呢，本來就無咩事情發生嘅，網絡亦無咩反應。
咁主要原因就好簡單啦：作者又唔出名，題材又唔算新穎，點會有人留意啫。

從此，作者白投浪就同佢女友過住幸福快樂嘅生活……
不過就咁，呢個世界有樣嘢叫錯有錯著。故事嘅主角唔係篇文嘅原作者，而係兩個好撚無聊但又想喺網絡成名嘅後生仔。
「喂，不如咁啦，我哋自己搵啲嘢呃吓膠。」陳銘係咁碌連登個講故台。



「吓…？你識寫故架咩。」黃少祥喺旁邊望望吓。

「嗱你睇吓呢個網。」陳銘另外開一個tab，喺《Penana》搵咗篇文出嚟。

「乜嚟架。」

「小說網囉咁都未聽過？好似呢篇甜文咁。喂擺明就影射 Zita 架啦，叫乜鳩Peace啫？扮俾邊個睇？」

「你個衰仔……」黃少祥心思一轉，大概已經估到陳銘打緊咩鬼主意……



「我諗過啦，喺裡面搵三兩篇潮文風格嘅文出嚟，改吓啲人名又可以當係自己出。」陳銘果然如佢所料諗屎橋，「定係你有咩idea？」

黃少祥無從反駁，唯有放任陳銘照佢計劃去做。
標題：【樂壇雞公廁 Zita 之 秘密後宮生活 - 大爆娛圈淫亂秘史】
兩張滿心期待嘅面孔日日對住個moon，隨時準備應對網民連珠炮發嘅尖酸批評同催稿。
第一日：:)

第二日：up



第三日：upupupupupupupup
最後，個 post 依舊沉底，無人討論。
但，有一日，陳銘收到一個匿名來電。

「喂，請問你係咪連登果篇『Zita 的後宮生活咩秘史』嘅作者？」

「喔……我係！」

「我哋係明日出版社嘅編輯，想搵你傾吓出書嘅事，唔知你哋幾時方便出嚟？」

「哦！好，我得閒！今日我OK呀！」陳銘呢個時候當然𦧲飯應啦……

「好，十二點，我send個地址俾你。到時見。」
短訊收到一個地址。康定路……？聽都未聽過。但既然有咁嘅機會，試吓都無壞吖。



黃少祥則興致缺缺，情願屈喺陳銘屋企煲漫畫。
呢一刻，佢哋都無為意，點解對方會睇篇文就知道佢電話？
陳銘見時間唔多又唔想搵路，唯有搭的士去啦。
https://www.youtube.com/watch?v=49a-lj6OfS4
            *            *            *
我，陳銘，即將迎接一個一舉成名嘅機會。就算篇文本身唔係我寫……
搭咗成兩舊水的士，終於去到「康定路」。

離遠見到有架黑色褓母車泊喺路邊，有個戴黑超黑口罩嘅西裝友喺車門前㩒電話……

我心諗：應該係佢啦。
「你係陳銘？」西裝友見到剛落的士嘅我，就不停遞手打招呼。

「你又知我個名嘅。」我覺得奇怪，點解佢會知我叫咩名。



「我哋編輯就喺車廂入面。」西裝友指一指車門。

我聽完就想伸手開車門入去。

點知俾西裝友一手攔住：「你唔好入去住。安全起見，我會先同你做個例行檢查。」
經過一輪全身檢查後，西裝友拎咗一枝好高身，成枝電筒咁長嘅「鐳射槍」出嚟……

「你望住枝 Laser 先。」呢招係咪即係「激光」探熱？

枝「鐳射槍」突然閃過一陣強光。我望得有啲出神。
跟住我記得，佢同我講咗一大抽嘢。

至於佢講過啲乜……　我已經……唔太記得嚕。