【穿越/愛情】《我同鍾意咗十一年嘅人表白，佢竟然跳海死咗》: 八十

「你一直都話，穿越時空令穿越者失憶呢樣嘢限制咗你去追阿晴，但其實你有冇試過認真咁去追佢？」天使再次以直率的語氣追問。
「我有！我喺摩天輪度有同佢表白，但最後就因為歷史入面嘅我失憶而失敗咗。我仲有喺長洲講過，其實佢明白我嘅暗示，只係佢無揀我。」我難得找到一個為自己辯解的機會，當然不能放過。
「係，就係呢兩次，之後就再無試過。」天使似是預料到我的回應。
「點試呢？試咗都係失憶，咁......」
我正要反駁，天使已馬上打斷了我的說話：「歷史永遠都有變化。你唔會知，表白之後，可能阿晴接受咗你，而之後歷史入面嘅你就算咩事都唔知，都會打蛇隨棍上咁繼續同阿晴一齊。無人會知歷史變化嘅結果，但你試一次就停手嘅原因，就係因為你繼續唔敢去試，唔敢相信阿晴需要嘅就係你。」
我回想起我一直以來的逃避、推諉、也許背後的想法確實就是不敢相信自己在阿晴心中的價值，同時更怕被她拒絕而否定了自己對她的價值，所以才更不敢出口表白。
 
「所以，我話即使你再穿越都無用，因為你同歷史入面嘅阿晴一樣繼續有呢一種心態。大家都只係硬塞自己認為幸福嘅決定俾對方，偏偏唔敢相信自己，由自己去肩負起對方一生嘅幸福。咁樣嘅心態，你即使穿越幾多次，都唔會有結果。」天使失望地搖了搖頭，「而最重要嘅係，你哋從來都無俾對方知道過自己嘅心意。如果講咗，明白咗對方要嘅幸福唔係你，至少你都可以心安理得咁自己講，對方真係有幸福啦。但而家你兩個無講出過自己嘅心聲俾對方聽，只係一味要對方接受你俾嘅幸福，咁真係幫到對方咩？愛情係兩個人嘅事，你哋一直都話想對方幸福，但就連對方覺得咩係幸福都唔知，咁你俾到啲咩對方呢？」天使長長地吐出了一口氣，算是象徵發言暫告一段落。
 
天使的話，準確無誤地刺穿了我的心，也穿起了所有我與阿晴的歷史。


我們一直以來都拼命地為對方的幸福而努力，可是，原來我們努力的方向都只不過是自己所投射出的幸福。
我們從來都沒有真正了解過對方的需要。
這種愛，看似不顧一切，但其實是燈蛾撲火般的笨拙。
 
原來坦白，不是為了讓自己得到幸福。
是為了明白對方想要得到怎樣的幸福。
不是不能大方，不是不能割愛，可是我們甚至沒有明白過對方的需要。
甚麼都不明白的我們，卻一直將自定義的幸福推到對方身上。
我們從來沒有分享過自己的心。
我們也沒有明白過對方的心。


 
「即使我明白咗阿晴需要我，但係一個咁普通嘅我，真係可以令到阿晴幸福？」比起傷心，我此刻更是迷惘，迷惘著到底自己以往所做的決定真的錯了嗎？
比起盧業成和Owen，我只是一個為追夢而努力的傻小子，我真的能夠為這個已經喜歡了十一年的人帶來幸福嗎？
 
「水係好普通，但足夠令一棵植物成長；空氣到處都係，但足以令人生存。你兩個就係對方嘅水同空氣，但就以為自己對對方唔重要，死都要換水做可樂，換空氣做香薰，但其實對方最需要嘅，就係最原本嘅你。
你兩個一心都想令對方幸福，咁點解就唔自己落力去令對方幸福呢，偏偏要將責任推去俾其他人呢？愛情，就係你兩個人嘅事。普通，唔係一個唔值得被愛嘅原因；但係，陳柏軒，呢三個字就係令阿晴可以幸福嘅理由啊。而胡皓晴，就係令到你可以幸福嘅理由。就算你兩個再普通，只要可以走埋一齊，一樣可以創造一份平凡嘅幸福。」
平凡的幸福，對照「歲月靜好」，正好是我倆各自給予對方的祝福。
天使的話一字一句地鑽進我的心房，讓我既為自己的軟弱而心痛，同時也為我和阿晴的彼此抑壓著感情的無力感嘆息。