【穿越/愛情】《我同鍾意咗十一年嘅人表白，佢竟然跳海死咗》: 七十九（續）

「再諗，都只會更加唔捨得，更加傷心。」天使溫柔的聲線再次響起，「不如快啲出發，完成埋阿晴嘅最後一個心願啦。」
「對唔住，我真係揀唔到......即使我知道，唔記得咗佢就唔會好似而家咁痛苦，但係，我都係好想我嘅記憶有佢，好想我嘅生命入面有佢......」我阻止不了淚水的落下，只能用乞求的樣子和語氣向天使說：「不如咁啊，你俾我試多一次，穿越多一次呢九個載點啊。如果...如果真係唔得，我就聽你講，改變我同阿晴嘅最初。」
天使於心不忍地看著我，長嘆一口氣說：「其實你明唔明白，到底點解你同阿晴一直一齊唔到？」
我回想著我和阿晴所有過去錯過彼此的片段，然後說：「係因為我哋無勇氣去表白，無勇氣去講出自己嘅心聲。」
「呢個只係表面嘅原因。」天使搖了搖頭說：「其實我又扮死神，又幫你哋上天堂，原因係我見到阿晴對你嘅愛同犧牲，我覺得你哋呢一段感情好難得，但係又好遺憾，所以我好想幫到阿晴完成佢嘅心願。但係慢慢睇住你去改變歷史，我心入面一邊好想你會成功，但另一邊就開始慢慢發現你哋之間錯過嘅原因。一個，你同阿晴都有嘅原因。」
「個原因係咩啊？」我禁不住問。
 
「係因為，你哋兩個從來都無相信自己就係對方嘅幸福。」天使緩緩地說。
「相信...幸福？」我重複著，一時間倒是未明白。

「一直以嚟，你哋明明最想要嘅都係對方，但係偏偏兩個都唔敢開口，原因就係你哋唔相信自己可以俾到幸福對方。你怕自己被阿晴拒絕，又怕歷史入面嘅你未夠好去照顧阿晴，所以遲遲唔表白；同樣地阿晴怕自己嘅家庭背景同經濟壓力會影響你追求夢想，所以亦都唔敢靠近你。


你哋兩個搏命用唔同方法去令對方幸福，去成全對方，但明明你哋各自心目中最需要嘅就係對方。
睇咗你哋嘅相處咁耐，我開始明白，你哋兩個所做嘅唔係犧牲、唔係成全，而係推卸責任。因為唔相信自己嘅價值，唔相信自己就係對方嘅幸福，所以就一相情願咁將令對方幸福嘅責任推俾其他人。你將阿晴推俾Owen，阿晴將你推俾一個仍然未出現嘅女仔，總之你兩個都係無膽去承擔對方嘅幸福。
你哋自以為嘅偉大成全對方，其實講穿咗，只係一個最不負責任嘅諗法。就係要令一個對自己最重要嘅人永遠幸福，但自己完全唔想亦唔敢出半分力。
真正嘅負責任，唔係要你背負佢嘅幸福，亦唔係由佢去負責你嘅幸福，而係由你哋一齊去分享同背負你哋嘅幸福。」
 
天使的聲音由溫柔漸轉認真，聽起來，愈來愈似在斥責我。
可是，聽著他每一句說話，我頓覺被針刺穿了內心的深處，讓平日連自己都沒有察覺的部分都顯露了出來。
過去與阿晴的相處，內心的掙扎，一時間全部湧上心頭。