【穿越/愛情】《我同鍾意咗十一年嘅人表白，佢竟然跳海死咗》: 七十八

天使的話，令我整個人從坐著的病床上彈了起來。
「咁都叫無關痛癢？」我差不多叫了出來。
「你冷靜少少先。」天使安撫著我，「無關痛癢嘅原因，係因為其實阿晴喺每個載點入面只係同咗你講一句嘢啫。」
我一時間聽不明白。
 
「話說當我同阿晴傾好咗令你入局嘅故事之後，阿晴突然提出，問可唔可以喺最後嘅初相識載點入面同你講幾句嘢，當係最後嘅道別。然後我當然拒絕咗佢，同佢講一來規則上靈魂唔可以同人對話，二來如果佢到時候講咗啲關於未來嘅事俾歷史入面嘅你聽，就會嚴重影響歷史。
當時佢諗咗一諗，然後換咗個建議，佢問可唔可以喺每個載點入面只係同你講一句嘢，而且內容一定同未來嘅事無關。
雖然聽落問題好似唔大，加上佢係咁求我，的確令我有啲心軟。但為咗避免意外，所以我用天使嘅法力喺佢身上加咗四重規則限制，只要觸犯任何一條，佢就要馬上上天堂，而你嘅穿越之旅亦會馬上終止。
呢四條規則係：一、唔可以提及任何未來嘅事。二、唔可以俾你發現同緊你講嘢嗰個係靈魂狀態嘅身份。三、只可以講一句嘢，亦唔準加上任何行動，一句講完，身份馬上回復翻做歷史入面嘅阿晴。四、唔可以代歷史中嘅自己做任何決定。
其實有呢四項規則，本身就等於講咩都無意思。但估唔到嘅係，最後阿晴同意咗呢四項規則，所以佢就喺每個載點入面，用靈魂狀態進入歷史中嘅阿晴身體，亦都即係你哋所講嘅『鬼上身』同你講一句嘢。一講完，靈魂就會馬上離開身體，而歷史之中嘅阿晴唔會知道發生咗咩事。


而有趣嘅係，阿晴咁辛苦爭取到呢件事，但佢講嘅嘢都幾無關痛癢嘅。當然亦因為咁，所以一直都無觸犯到規則。
我一直無提，係因為阿晴話呢件事要留番做最後嘅武器嚟勸你，而我就覺得嗰幾句嘢無咩作用，所以選擇唔講。但既然都嚟到呢個階段，都唯有聽阿晴講試下啦。」
 
天使無奈地聳了聳肩，表示無奈。
「咁到底佢同我講咗啲咩呢？」我緊張地問，「若果我知，可能我會明佢嘅意思呢。」
我心中想，阿晴刻意提及這事，必定有當中的意思。
「咁點解。」天使微笑著說出了三個字。
「吓？」我疑惑地叫了一聲。
「咁點解。」天使緩慢地，再重複了這三個字一遍。
 


突然間，這三個字尤如輸入了「Google」一樣在我腦海中飛快地尋索著，然後得出了結果。
「咁點解」，就是阿晴以靈魂身份進入歷史中的自己體內，對我說話時所留下的線索。
每個回憶載點中，都總會有一句「咁點解」。
曾經在回憶載點之中，我也察覺到阿晴好像有把「咁點解」掛在口邊。
當時我還以為只是偶然而不以為意，但原來，背後竟然藏著阿晴死後的說話。