【穿越/愛情】《我同鍾意咗十一年嘅人表白，佢竟然跳海死咗》: 七十二

「嗱，我總結一次啊下，所以而家個故事背景就係，我係一個死神，因為你嘅意外死亡會令到我有機會受罰，所以我就要阿軒穿越時空幫手救翻你，順便幫埋我。」天使複述了一次我們不知用了多少時間創作的故事。
「嗯，聽落都幾合理，佢應該會信你嘅。」我點點頭，頗滿意我和天使合力創作的虛構背景。
「咁而定仲差一樣嘢啫，就係到底點樣令到第一個『回憶載點』喺最後先突然出現翻呢？」天使側起頭，苦苦思索著。
「突然出現翻......」我想了想，然後好像記起了天使曾說過的話，便問：「係喎，你之前咪話過呢啲『回憶載點』係由阿軒同我嘅感覺之間嘅一個『關鍵詞』變化出嚟嘅，咁其實個『關鍵詞』到底係咩呢？可能會幫到我哋創到個合理理由呢？」
我這樣說，一方面是想幫助創作，但另一方面，其實也是想知道，到底對於阿軒來說，我在他心中所代表的到底是一個怎麼的形容詞。
也許是「愛慕」？或者是「甜蜜」？
 
這時我看見天使對著我微笑一下搖頭，我才記得他有看穿人心的能力，換言之他這時的動作正暗示我猜錯了。
「阿軒同你嘅『關鍵詞』，係『遺憾』。所以呢十個『回憶載點』，全部都係由佢嘅遺憾所產生出嚟嘅。」天使說。
聽了這一句，我只感到難以形容的失落感。


原來我和他從中二相識以來，一直經過多少成長片段，但到頭來，能成為最重要記憶的片段，竟然都是「遺憾」。
也許，快樂的感覺總是一閃即逝，但遺憾卻是可以成為一生烙印。
 
「咁好簡單啦，你就喺阿軒經過我嘅結婚日但都係發現改變唔到我嘅死之後，話佢知，有一個全新嘅『回憶載點』出現咗。呢個載點之所以會出現，係因為佢發現改變唔到歷史，心入面好遺憾最初認識咗我，所以先導致呢個載點出現。然後只要你再鼓勵佢喺呢個載點入面改變我同佢相識嘅歷史，咁就可以成功啦。」我一邊說著，天使一邊滿意地點點頭。
「不過咪住，我突然間又諗到，即使阿軒改變咗我同佢最初相識嘅歷史，但當佢翻到嚟現實時間之後，佢都會記得『佢改變過我同佢嘅歷史』呢件事㗎，咁咪即係佢仲會記得我囉！」我感到自己突破了盲點地問。
「放心，歷史有自動修補嘅力量，所以當佢翻到嚟現實嘅時候，佢的確會仲記得你。但大約係兩至三個鐘之內，新嘅歷史會慢慢代替佢腦入面嘅舊歷史，到時候佢就會完全唔記得咗有你嘅存在啦。」天使氣定神閒地回答說。
「好，聽落好似咩問題都解決哂，可以action啦。」我表面上高興地笑著，但內心卻忐忑不安地，準備見證著阿軒完全忘記我的過程。
 
「其實穿越時空呢件事從來未發生過喺在生嘅人嘅身上。平時死人明知結局一定係死，所以佢只會享受經歷翻歷史美好時刻嘅過程。但而家阿軒就係帶住一個想改變嘅心踏入歷史之中，所以到底最後佢會喺歷史入面帶嚟啲咩改變，其實連我都預計唔到。所以我預先講定一句，情況可能會係我哋預計咁，亦都可能係會有出入嘅。但若果我哋決心要執行我哋嘅計劃，就唯有面對下未知嘅風險啦。」天使一臉認真地解釋道。
「嗯，我明白。」我肯定地點點頭。


「呢個計劃係你提出嘅，我相信你都會想旁觀成個過程，當然睇唔睇就由你自己決定，我只可以講，好多人以為穿越時空一定會愈變愈好，但事實就未必一定嘅。若果你決定要睇，你就可以用上帝視角去睇到事件嘅全貌，亦都即係你就要預咗可能會見到好多對你嚟講好殘忍嘅事實。到時嘅你就只可以做旁觀者，咩都改變唔到。」天使收起了溫柔的笑容，講解著重要的提醒。
「我明白，我決定要睇。」即使阿軒將歷史變得再多，我也想觀察一次。
因為我已放棄了親身體驗過去的機會，所以唯有用觀察來最後一次回味我和阿軒的過去。
 
「咁喺正式action之前，我想問埋你最後一個問題。」天使靜靜地看著我的雙眼，彷似要看穿我的心和靈魂，「你覺得要令阿軒對你嘅記憶消失係咪就係一個最好嘅解決方法啊？」
「只要佢幸福，咩方法都得。」我苦笑一下。
天使點點頭，微笑著說：「我感受到，呢個係一個真心嘅答案。」
確實地，反正我是一個已死的人，所以在我的心中，唯一的寄望，就是可以令阿軒幸福。
而我最後的心願，就是想成為見證他得到幸福的觀眾。