【穿越/愛情】《我同鍾意咗十一年嘅人表白，佢竟然跳海死咗》: 七十一（續二）

「『回憶載點』呢樣嘢，我一直形容佢為一個旅程，意思係，一旦開始咗，即使可以暫停，但就唔可以貿貿然中止，除非目標達成咗。若然強行中止，只會令穿越者大腦負責嘅記憶嘅海馬回完全混亂，導致人對所有事都出現永久性失憶，而呢個係大家都唔想有嘅結果。」天使用筆指著時間線說：「簡單嚟講，若然阿軒喺第一個載點，亦都即係『第一天相識』呢度開始，即使佢改變咗你哋初相識嘅經過，但因為歷史自動修補嘅力量，歷史中嘅你最後依然會死。而因為救你嘅目標未完成，阿軒就會進入下一個『回憶載點』，去到『學生會選舉結果公佈日』，並且會一直繼續前進。咁樣發展，佢就會發現原來可以改變歷史嘅機會唔止一個，咁就可能會影響到佢嘅決定，例如可能佢會想再認識翻你，用其他方法去改變歷史。咁樣嘅話，到最後就未必可以達到我哋想阿軒改寫到同你不認識嘅結局。」

「吓？咁即係唔得？」由於天使話中穿插了太多有關穿越時空的理論，我並未完全聽得明白，但至少知道當中實施起來甚有難度。
 「咁又未必。」天使再次綻放出一個令我放心的微笑，「正如我所講，『回憶載點』似一個旅程，若然景點未合心意或者唔順路，係可以將景點轉換位置嘅。當然，若然將時間全部打亂就會好奇怪，但係如果將最重要嘅第一次相識改到最後先出現，咁或者成件事就好唔同啦。」
我這次未有發聲，等待著天使的解說。

天使用手指將紙上「第一天相識」擦掉，然後把它寫在第十個載點「阿晴結婚日」之後，並說：「你諗下，當阿軒用盡方法，由『學生會選舉結果公佈日』開始嘗試去改變你會死嘅命運，但到最後經過埋『阿晴結婚日』，喺佢唔太清楚嘅『歷史自動修補法則』之下，始終都係改變唔到你死嘅結局。而到佢最後都係失敗嘅一刻，我先將第一個『回憶載點』攞翻出嚟俾佢，亦俾佢知道呢個係最後一個機會去俾佢改寫你命運嘅機會。作為連番失望之後嘅最後一根救命稻草，阿軒一定會更容易接受，而且更盡力喺『第一天相識』呢個載點作出改變，令你哋變成唔認識。咁樣，我哋嘅目標就可以成功啦。」
天使指著時間線詳細解釋完後，我只有深感佩服得目瞪口呆。
「唔洗太佩服我，我未成為天使之前，係IQ超過150嘅英國偵探嚟。」天使自豪地笑著，扮了一個手托煙斗的動作。
 


「你都諗得咁好啦，咁點解唔即刻實行呢？」我疑惑地問。
「你讀書嘅時候，係讀中文系㗎可？」天使突然岔開話題。
「嗯。」我點頭。
「咁中文系嘅人應該睇好多書？小說？」天使又再問。
「嗯，我主修文學創作。」我點頭，同時投出了一個不解的眼神。
「咁就好啦，因為我而家需要一個作故事嘅人。」天使說。
 
明顯天使是發現了我滿頭的問號，於是主動地把說話解釋下去：「雖然我所講嘅計劃幾好，但其實要合理咁解釋俾阿軒聽係非常之難嘅。到底點解一個天使要嚟幫佢穿越時空呢？到底點解我要幫佢救翻你呢？到底點解第一次認識你嘅『回憶載點』會喺最後先出現呢？呢一大堆嘅問題，我一定要合理化哂咁解釋俾佢聽，如果唔係俾佢發現咗，我哋嘅計劃可能就無咁容易成功。」
聽了天使的話，我是同意的。
一個出色的故事，確實是最容易說服人的工具。


 
於是，在與現在世界時間流動速度不符的空間之中，我和天使開始合作去創作一個用作說服阿軒的虛構故事。
一個關於死神、陰間、閻王和穿越時空的故事。