廟街有殭屍（已在各大書局上架）: 第五十二章

四周的空氣變得混濁，曾經繁華熱鬧、盛極一時的都市、我們熟悉的香港，現今一片漆黑，高樓大廈群中失去萬家燈火景色，一切都變得陌生。
 
不少人已經變成殭屍，街上的殭屍數之不盡，站滿道路每一個角落，可是牠們是靜止不動的，像靜候上級攻擊命令的軍人，這個景象似是有軍隊駐軍於此。
 
相比港島的混亂，這裏的井然有序，顯然是殭屍上級的手段，軟硬兼施，背後為入侵作準備。
 
「不死！不死！」
 
牠們喊著口號，作出宣傳，勸喻仍然留守家中的人，放棄堅守，加入殭屍陣營。
 




街站排滿人龍，一個老爸拉著全家到街頭領取屍水成為殭屍，他的妻兒都極力掙扎，哭着說不要。
 
「人類已經無希望㗎啦，大勢所趨，到時人人都係我哋唔係，我哋就係地底蟲⋯⋯呢個地方都係無希望，成為殭屍，成為新人類啦！」那個老爸不理全家的反對，兒女的哀哭，強行把全家人灌飲藥水，變成殭屍。
 
一個四十多歲的胖子扶着一個九十多歲的老婆婆，緩緩走到街頭，當他們拿到藥水一刻，那個男人驚喜得雙目發亮，似是得到一塊至尊寶貴的萬能藥物，說：「媽，終於可以醫好妳嘅病啦⋯⋯我哋可以長生不老，永遠喺埋一齊，多謝⋯⋯多謝殭屍上帝。」他不斷向街站的人叩頭。
 
「人類係落後物種，只有變成殭屍，世界先可以和平！香港先可以復興！」一個頭戴白布、身穿西裝的人在街頭演說，遊說人類放棄自己身份。
 
越過一條條街，目睹無數一幕幕可悲的畫面，我嘆了口氣，獨自來到廟街的天后廟，本來寧靜的公園，站滿殭屍，少說也有數百，牠們看見我便上前阻止，但見忽然停止，然後如開紅海一樣分成兩列，我走上天后廟內，牌坊門口站著高帽男人，黑帽、墨鏡、黑色外衣。
 




正是牠，那個一切背後的兇手。
 
 
「韓壬辰，估唔到你都會嚟到呢度。」牠開口說話，如南門蔚所說，背後似有無數聲音，是疊聲的效果。
 
「我都估唔到你殺唔死我，你有啲失策，我好失望。」我輕抹頭上的汗說：「你叫？」
 
「傲因。」牠再道：「當初我都估到你係一個大患，由喺殮房嗰日開始。」
 
「殮房嗰日？」




 
「殮房嗰日屍體失蹤嘅意外，係我做，黑貓係我放入去。」
 
「點解要咁做？」
 
「為咗大家嘅未來，人類嘅未來，殭屍就係人類最終嘅命運。」
 
「我無估錯，係同政府合謀？」
 
「政府一早俾我哋同化晒，大部分都係我哋嘅人，所以咁大單嘢先無人知、壓得住，得你哋兩個小職員知。」
 
「我上司⋯⋯」
 
「佢查到高街，一個人去就無可能唔死，不過可以成為我哋製造殭屍藥水嘅人體實驗嘅犧牲品，都算死有其用，死得光宗耀祖。」
 




我早料上司因為知道事件早已遭遇不測，但真正得知時，還是有點震驚。
 
「殭屍，無自由嘅生物有乜好？」我嗤之以鼻。
 
「自由究竟係乜嘢？要幾大程度先叫好？自由係無絕對、又無用，你得到之後只會嫌唔夠。我而家可以令所有人都不死，甚至永遠都存在，身體強化，呢個仲唔係人類嘅理想國？你問出面一百個人，佢都會揀長生不死嘅殭屍。」牠說。
 
「唔係，因為佢哋無自由，只係你嘅工具，你只係想將全世界嘅人變成你嘅奴隸，永遠嘅奴隸。人無自由意志，根本幾長命都無用。」
 
「你鍾意點講就點講，不過一個咁樣嘅國度，同你哋本身所信奉嘅神國又有乜分別，天堂都係獨裁㗎啦。」
 
「唔同，你唔係神。」
 
牠此時想起什麼，笑問：「得你一個？你身邊一直保護你嗰個南門一族嘅女仔呢？」