【青春純愛+靈異】收音機裡的情人: 第二十八章：兄弟

「無事嘅，至少你哋都曾經有段開心嘅回憶呀。」我拍着他的肩膀，而他平日冷酷的眼神承載的也只有悲傷。

 「邊係喎！以前淨係掛住做嘢，都冇理過佢，連佢出事嗰日都見唔到佢最後一面。我真係個人渣，人渣啊啊！」他自摑着，就算我立馬阻止着他，他臉龐也迅速變得更熾熱。

 「咁......咁你做嘢都係想比佢過啲好啲嘅生活啫！邊會係人渣呀！」不擅安慰人的我一時三刻又實在難以辯駁他的說辭。 

「口窒窒，諗唔到原因呢？唔緊要啦，人渣就係人渣，點兜都係㗎喇。」他嗤笑着。

 「你唔同喇，你識主動關心孤伶伶嘅呀昕，就算佢係鬼都不離不棄，就算係熱戀期又點話......」





 「就算係咁又點呀！我搞到佢比人強姦，呢條數我一世都還唔翻比佢呀！我都冇面見佢！我正一仆街嚟！」淚水開始在眼眶裡打轉，腦海更回想起剛才的場景。 即使那段經歷只佔了幾項字，可它對昕昕可能會造成永不磨滅的陰影。

爲何我要使她死後也要受這種苦？

「雖然件事真係唔由得你控制，你又已經盡咗全力去阻止，但你真係幾仆街嘅，望住條女比人老強......」連他也不否認，就知道我切切實實是個仆街。 

「頂多我遲啲同佢做翻個正當嘅心理輔導喇！通常遇到呢啲嘢實會有陰影嘅，仲未計好多比人老強嘅女鬼通常都會變......」他說到這裏便停下來了。

 「你想講怨鬼？我有睇鬼片㗎，點會唔知咩事。」我異常冷靜的回答，只是爲了掩飾我心中的懼怕。





 爲何我會把這個純真的女孩硬生生逼成一隻惡魔？ 

「唔使驚，有我嘅專業輔導同妙姐嘅幫助下，佢一定無事嘅！」這次換成他搭着我的肩膊。 

「專咩業呀，你呢啲係能醫不自醫！」我不忘挖苦着他。 

「咁大台劇嗰啲醫生都成日有絕症㗎啦！每個人總有啲心理陰影㗎喇！」 

「咁都係.......」這段無厘頭的對話很快便結束了。





 「宜家唔好咩？妙姐好少幫鬼幫得咁落力㗎！你哋呢對應該係受上天眷顧嘅，一定可以有好結果嘅，邊似得我咁......真係來回地獄又折返人間再由天堂跌翻落地獄！」我記得上一次在茶餐廳那裏他也有約略提過當時發生的事。 

「其實呢，我第一次見到呀昕，就諗起我阿詩喇。兩個都係咁孤伶伶，兩個都咁爲人着想。」他臉龐漾起甜絲絲的笑容。

「佢係好女仔嚟㗎！唔好唔要佢呀！唔係我劏咗你㗎！」他粗糙的指頭用力的戳進我胸口。

 「我都已經幫唔到自己同阿詩喇，咪幫下你哋啦，當係還債都好......」他原來已經喝畢半瓶威士忌，變得不省人事了。

 反正自己喝了酒，也不差在在這裏留宿吧，阿文應該不會介意的。 

正當我在單位裡閒逛着，我在櫃子裡看到了一本櫻花圖案的老相冊。

 揭開內頁，照片的背景正是晴空塔旁的櫻花樹，樹下的人自然是阿文和他的妻子阿詩。

 阿詩五官精緻，略施粉黛已然是個美人。飄逸的長髮伴隨着櫻花落下，即使透過相片，也不難感受到她淡雅的氣質。 





她雙手緊挽着阿文可靠的手臂，又不失一點剛強。

 如此完美的女人，卻已經香消玉殞...... 呀昕又何嘗不是個好女孩？

可惜她亦是早去世的一羣，就連死後也遭受着折磨。 

我想起昕昕，又不禁手癢到網上尋找着她的照片。 

「吳悅昕」我打在瀏覽器的搜尋欄。 網上已經顯示着琳琅滿目的比賽照片，什麼鋼琴比賽，奧數比賽，就連作文比賽也有她份。 

那個可愛的女孩在臺上微笑的接下獎狀，澄明的雙眸散發着的是勝利者的眼神。 

其實我高攀得起她嗎？我又爲何令得這個天之驕女落得如此下場？ 





隨着酒精的效用，我雙目變得無神。 

「醒呀，任樂謙！」我自摑着。 

有時候，痛楚在令人清醒的時候實在有用，只是我已分不清痛楚的來源是由身或是由心。

 我瀏覽着她生前的社交網站，只見最後一個帖文下面有着幾百個悼念留言，入面當然沒我的份。

 我以前一直不敢上網搜尋她的照片，其實也是害怕得出的結果會是個其貌不揚的女孩。

天啊，爲何我當時可以如此幼稚。 

看着照片，我卻後悔着自己爲何會破壞這個女孩原本的幸福。

我其實不清楚事件對她造成的陰影會有多嚴重，只是不想她繼續冒着當怨鬼的風險存在在世上，死後也要永不超生。





 內疚的心情有如螞蟻般蠶食着心臟，再蔓延至全身。使人痛不欲生。

 可惜，牽腸掛肚的思念也在體內形成另一股勢力，與內疚互相爭奪着身體的控制權。 

對，我就是犯賤，明知自己看到昕昕會內疚，卻要看着她的模樣才安心入睡。

翌日，晨曦的光線照耀着我，迫使我起來。

 「你起身喇？」阿文以他一貫的專業形象拉開窗簾看着我。

「乜你呢到都有自然光㗎？」畢竟他自稱是法師，所以單位的裝潢也有點陰森，在窗外溫暖的光線下顯得格格不入。 

「平時我拉埋窗簾咪冇囉，光猛得滯啲客唔中意，加埋其他朋友仔唔中意太陽吖嘛。」他解釋道。





 「係喎！你喺度瞓過夜唔驚屋企人擔心咩？」

 「唔緊要啦，我同咗佢講，況且佢都唔得閒理我啦。」

 「咁又係，睇得出。既然係咁，加上你咁嘅年齡，唔係應該羣埋班朋友一齊嘅？你知唔知呀，我真係差唔多日日都見到你喎！」

 「煩住搞昕昕啲嘢啫，你估我宜家好想見到你咩？不過佢而家都解決咗問題，睇怕我都係唔使再嚟搵你喇，你開心啦！喂係喎，你其實都冇真係幫過昕昕脫離收音機，係咪可以退錢嘅先？」我忍不住挖苦他。

 「你就想呀，我咁多日嚟比嘅意見都已經值翻咁嘅價啦，本身收你嗰個價錢已經係學生價嚟，再加埋你尋晚飲我啲酒，仲喺度瞓，我都未同你計喎！」他奸詐的笑着，只不過並不是有惡意的那種。 

「好囉！你唔回水，我就日日過嚟騷擾你，搞到你生意都冇得做！」我也開玩笑的回應。

 「唔同你講咁多，我宜家就搵班friend 食飯！走先！」 其實男人的情誼很簡單，只要志同道合，互相向對方吐苦水，其實就可以成爲兄弟。 

雖然阿文年紀與我差一截，但我倆可算是同是天涯淪落人。 

不論年齡，爲何人類總要爲感情問題受困？