【青春純愛+靈異】收音機裡的情人: 第十三章：理想

「或者我幫你搵啲咩江湖術士放翻你出嚟呀！至少可以自由自在咁做你想做嘅事呀！」

「咁你鍾意啦！同埋呀，你覺得我打咩暑期工好呀？」我看着電話上因揮霍而所剩無幾的銀行戶口餘額，煩惱該如何湊夠錢去拜見那些道士。 

「你呀？有無啲咩興趣或者想讀嘅科先？或者咁講，你jupas 揀咗啲咩呀？」 

「誒.......我份人好頹㗎咋，平時除咗睇吓網故同鹹網之外都冇乜嘢做㗎喇。jupas 呢我好似報嘅都係工程爲多，仲有啲低分啲都入到嘅唔知咩科咁啦！入唔到大學嘅話就半工讀asso ，放榜先睇吓點啦。」

 「你份人真係冇咩計劃㗎喎！一係幫你諗吓喇.......冇理由去做技工嘅。更何況engine 嘅暑期工全部都應該要你讀緊先做得！或者向網故方面進發？出版社嗰啲有無呀？」 





「都可以諗諗喎！」其實，我最想的都是夜晚駕着單車送外賣，既可以搭單車，又可以多陪伴昕昕，只是擔心這樣收入會不會過低。就算要找出版社工作，我都偏向可以在家工作的那類，方便與昕昕相處。 時間轉眼已到晚上六點，我也是差不多時間要外出與孔子等人聚會。 

「我宜家出去喇喎！留你自己一個喺度得唔得呀？」我可不會令她聽到只屬於我們兄弟之間的談話。

 「唔會啦！我以前嗰幾年都係自己一個人過嘅啫。」她這句話的語氣予人一種滄桑的感覺，惹人可憐。 

「或者我喺部電腦播啲歌或者係戲比妳？我可能凌晨先返嚟㗎喎！」她這句話更促使我要多陪伴她，免得她回歸舊時寂寞無趣的生活。

 「唔使啦！我自己聽吓收音機得㗎喇！」





 「咁都好嘅，我插翻個耳筒落部收音機先，費時阿媽翻到嚟聽到部收音機自己開咗，以爲自己撞鬼呀！」

 「咁佢又真係撞鬼喎！」她輕笑幾聲。

 「係咁啦！拜拜！」我穿了T shirt，短褲，只帶着電話，錢包，鑰匙包這些輕便的物件便出門去了。

「拜拜！」她的聲音除着我的遠去音量漸減。

 我從家裏走到大家約定的616火鍋，可這短短的路程已使人渾身不適似的。我是否漏了什麼沒帶出來？ 





也許是這陣子長時間陪伴着昕昕的關係，沒了她的陪伴，總是覺得身體缺了一部分，失去安全感似的。 

就在我沉思之際，孔子和我們幾位朋友：豹哥，星仔，榮少便在前面叫喚我，打斷我的思考。 

「喂！好耐冇見喇喎！做咩個樣咁愁嘅？唔係DSE考得唔多好呀？」首先開口的是豹哥，也是我們整個圈子中最外向有義氣的一個。