【青春純愛+靈異】收音機裡的情人: 第十二章：改變

我獨自聽着電話上的音樂，才發現歌單中全是昕昕推薦我聽的歌。

原來我受着她影響，竟然開始聽起廣東歌來。 

是我沒好好對她，說話語氣太重了嗎？她剛才好像還在啜泣。

 我播放着《拼命無恙》這首應景的歌。 

「這樣快並沒有事痊癒 拼命愛下個但爲何傷口不退瘀」





明明我在昕昕離開後並無大礙，但自己卻久久不能遺忘她，走出這段關係呢？

 「我要做個放下你的我 苦等某天被前度道賀 可惜笑得比喊痛苦 寧願看不破」

昕昕，你以爲我真的不知道芊彤的性格爲何嗎？我即使早已得悉，也不想接受這殘酷的現實罷。 

「我放下你卻未放低我 懦弱還是未能面對可是錯」

就算我能夠忘記她，那又如何？自己早就被人傷害過一次，又怎能好好面對下一段關係呢？ 





「我被背叛 沒法扮原諒 要扮偉大卻又未如我想像那樣」

你叫我要豁達地與芊彤告別嗎？不，我到現在都沒勇氣，沒能耐去做。就算明知自己的家境沒法與紈絝子弟相比，但我也不能若無其事地把得不到手的女人拱手相讓。 

「勉強做個放下你的我 專心看得開其實沒幫助 只好倒數剩餘回憶時日無多」

我想通了又如何，只有時間才能撫平自己的創傷。

 「我放下你卻未放低誰麼 痛恨你而受傷 好過 趁仍舊有力氣 寧願痛苦能夠 證實相戀過」





也許這種良久也揮之不去的痛楚才能見證我真的有用心去愛過人吧。 

昕昕的話雖然難讓人接受，但也不無道理。

若果自己有費盡心力去愛別人，只是別人不領情，大家價值觀不合，也許分開已經是對雙方最好的結果了。 與其執着在過去，倒不如像芊彤一樣珍惜現在，放眼未來，繼續以她的精神繼續活下去。 

有時候，我也挺慶幸自己有昕昕這個朋友，還是友達之上的知己，又或是.......？ 

我趕快帶上收音機插着的耳筒，爲剛才的衝動道歉。

 「對唔住呀，我啱啱語氣重咗啲，唔係有心話你㗎！」我對着沉默的另一方說道。 

「我冇怪你。唔緊要啦！」她嗓音又像當初認識她般軟弱，語氣更滿是口是心非的感覺。

 「算啦！你份人咁直，我睇得出你講大話㗎！一係我做啲嘢當賠罪喇！你有冇話有啲咩想要定係想去呀？」相比芊彤的有禮溫柔，昕昕的率直亦有其吸引力。





「我係嬲你咁蠢咋！應承我，諗開啲，唔好成日諗住啲衰人，諗吓你啲friend, AV 嗰啲女仔，要唔係諗起我都得㗎！」她既然懂得開玩笑，應該是消氣了吧。

 「好啦！我晚晚瞓覺都要諗住你！咁你有冇啲咩想做想去呀，我陪你啦！」我說畢才意識到自己竟說出如此曖昧的話語，但她應該也不會介意吧。

 「好衰㗎你！我一時諗唔到喎，遲啲答你！」她嗓音有如平時般開朗有活力。

 「好啊！我等妳！」其實我也挺享受與昕昕之間的曖昧對話的。 

「你講啲嘢咁肉麻㗎！我打嗮冷震喇！」她輕笑道。

回到家裏，我和她無間斷地一直通宵聊天到隔天早上，同學間的八卦，感情關係，音樂，漫畫，時事，無所不談。

想不到她這個讀書能幹的人，在其他範疇也略有涉獵，連講故台的故事也有看。 





「咁啱嘅！我都好鍾意嗰個巴打啲文㗎！以前我啲friend 都唔睇討論區嘅，佢哋鬼識呢啲網故咩。」

 「佢而家作咗個新故呀！一齊睇呀！」其實我一早看畢該故事，只是難得與她如此投契，便陪她罷了。 

「嘩！死喇！今晚仲約咗孔子DSE之後食飯呀！我宜家已經好眼瞓喇！你就好啦！唔使瞓覺！」 

「一般啦！唔使瞓覺咪只會悶！收音機兩三點啲節目又無聊！」 

「咁又係，畀着我困住喺部收音機到幾年，我都會悶到死啦！其實你喺部收音機到幾耐㗎！有無諗過出返嚟㗎？」

 「我諗........都有三年喇！我應該係2017年嘅DSE前困住咗喺入面。之前都試過走出去部收音機到，但唔知點解我一行近個出口就會頭痛到郁唔到㗎喇！」 

「咁得意㗎！咁收音機入面係點嘅樣㗎？你平時望住塊底板㗎？」明明收音機裡困着靈魂一事明明就是如此反常靈異，我現在才對這事感到好奇。

 「唔係㗎。我宜家就喺一間又窄又黑，無門嘅房到，但呢到有扇窗，可以望住出面嘅嘢，即係你。」 





「咁你眼裏面咪真係只有我？」我把這句說出口後，自己也不禁打了個冷顫。

 「都可以咁講嘅——，隻窗都幾細下。」她特意拉長尾音，聽上去有點尷尬。

 「咦！咁你點樣控制部收音機啲掣㗎？你望住間房㗎咋喎！」

 「我喺18年先識開收音機㗎咋！嗰時係咁啱諗住『如果可以聽收音機就好喇』，之後部收音機又真係自己開咗喎。我後尾先知原來自己可以用念力去控制部收音機咋！不過收音機以外嘅嘢就唔得。」

 「如果可以嘅話，我都想真真正正咁出嚟好好咁望下呢個世界呀！不過，條命又係我自己唔要嘅，邊有得咁怨。」她話語中參雜着後悔和無奈的神情。

 「吓！你係因爲.......自殺先困住咗喺呢到㗎？」

 「應該就係喇。明明自己想解脫，但最終嘅下場就係困住咗喺呢到，真係諷刺！」她裝作輕鬆地自嘲，所以我也不敢多問。