【青春純愛+靈異】收音機裡的情人: 第六章： 回憶
----
三年前，中四開學。
在上年的期末考，我爲了揀選自己想讀的物理科而努力讀書，考入了學校的普通班，就在這裏，我遇上了她，芊彤。
看到她這個品學兼優的女神竟然以憔悴的面容來到了普通班，同學也少不免說幾句閒言閒語。
「喂！聽講呀女神彤彤早排比嗰個有錢仔飛咗喎，搞到考試考得麻麻，先入咗嚟呢班咋！」
「抵死啦佢！明知嗰個有錢仔都唔係好人仲要癡埋去，擺明係貪錢啫！」
「咪係囉！恃住自己靚女就諗住溝有錢仔？算吧啦！」我真不明白大家與彤彤無仇無怨，爲何就要在人背後說風涼說話。
「喂！你哋吧口唔好咁衰啦！人地又唔係得罪咗你！」
「啊謙！乜你喺佢隻兵嚟㗎？係咁幫住佢嘅？」
「梗係唔係啦！係睇唔過眼啲人咁鍾意講人是非！」當年年少的我正義感滿溢，而當初的出發點也真是看不過眼同學們隨便把別人的私事大肆散播。
固然，彤彤的事也傳遍整個校園，畢竟女神被人拋棄可是多轟動的一件事。
狂蜂浪蝶們當然也不會放過這絕佳的機會，用盡心思去討好女神。
「彤彤，你唔好唔開心啦！我唱首歌比你聽呀！」
「芊彤BB，有咩事記住同我講，我大佬榮一定會照住你㗎！」可是，彤彤偏偏漠視這羣人，而走近我的桌子，向我道謝。
「你係咪叫任樂謙呀？好多謝你嗰日幫我出頭呀。」
「吓？我幾時有幫過你呀？」我不是在裝帥，而是真的不知道自己何時幫了她。
------
「哈哈哈！你講嗰句咁此地無銀嘅？係人都知你唔係懶型喇！你咁嘅樣學咩人扮型啫？」昕昕忽然插嘴，簡直把氣氛徹底的地破壞掉。
「聽故就唔好駁故啦！妳再係咁就我就唔講㗎喇！」
「好好好，我唔講嘢，你繼續講。」
------
「我上次聽到你幫我話嗰班講是非嘅人呀！好多謝你。」
「唔使！我都係唔中意班人亂講是非啫。」仔細一看，彤彤的膚色就如身上的校服般透白，貼身的校服隱約地描繪着傲人的雙峰，裙襬下面還有均稱的長腿，難怪她會有女神的稱號，想必那些狂蜂浪蝶一定很妒忌我得到女神的親口道謝吧。
我本來以爲這段對話就此完結，便走出座位，準備到廁所小解。
「喂！等陣呀！我哋班whatsapp group入面邊個係你嚟㗎？我第一年入嚟呢班，唔係好熟其他同學。」
我回過頭來，隨意地指着那個有着柯南頭像的電話號碼，隨口道出：「呢個係我嚟㗎，有咩皺搵我啦。」真不明白當時的自己爲何還未意識到被女神抄牌是一種多麼值得高興的回事。
隨着時間逝去，我們成爲了知心好友，而我更對這個充滿魅力的女孩產生了強烈的情愫。
「志豪嗰日忽然間話佢忍咗我好耐，又話我條件普通，配唔起佢呢啲少爺仔，就話要同我分手喎！明明我咁鍾意佢，點解佢可以就咁話唔中意就唔中意㗎？」
「傻女！呢啲咁嘅有錢仔擺明就係睇唔起所有人，又鍾意玩玩下㗎啦！你真係唔可以繼續鍾意啲咁嘅賤人㗎喇！」我拍拍她的頭，撫摸她如絲般順滑的長髮，盯着那快要滿溢淚水的眼眶，和溫婉動人的柳葉眉。實在不得不承認，我不知不覺間也喜歡上她了。
「俾張紙巾你啦！快啲抹下啲眼淚，唔係就唔靚女㗎喇！」彤彤印走鵝蛋小臉上和眼下的淚痕，露出如她名字般紅彤彤的臉龐。
「其實你有冇諗過放低佢，搵過第二個，又或者專心讀書先？以妳嘅條件根本就唔使憂搵唔搵到男朋友啦！」我誠懇地道，某程度上也在暗示一個願意爲她赴湯蹈火，共富貴共患難的男人正在她眼前。
-------
「噗噗唔唔唔——」昕昕奮力嘗試隱藏自己的笑聲。
「唔好諗住笑呀！我好認真㗎！」便繼續回憶往事。
-------
「你都講得啱嘅，我就係因爲佢搞到成績差咗咁多，真係太唔值得喇！我一定要勤力啲溫書，咁先可以考到好嘅大學！」
「吖！就嚟考試喇喎！不如我哋一齊去自修室溫書呀！」
「好啊！」我當然不會放過這個千載難逢的約會機會，便爽快地回答。
「識過咁多朋友都係你最有義氣！」說罷我們便走出專屬我們的私人空間：操場儲物房。
我們平常孤男寡女共處一室，難道她還以爲我們只是朋友關係嗎？就算不是戀人，也至少是友達之上嘛！
我們每天放學後都一起沿着城門河走到沙田圖書館自修室溫習。她也總是說靠走路到埗實在太費時間，但我老是要堅持走路，說就是說要看風景放鬆一下，但實質上只是想多看她兩眼 。
「謙謙！乜原來呢到有個咁少人行嘅涼亭㗎！我哋下次又嚟呢到行啦，好唔好呀？」
「好呀！以後有咩事嘅就係到等，就當係我哋第二個祕密基地啦！」
「一言爲定！」
自修室裡總是充斥着不同的情侶成雙成對地卿卿我我般談話，但彤彤總是能專注地溫習，操練試卷，仿似能漠視四周的阻礙般。她銳利的眼神只盯着書本，也總是自我鼓勵的說今次的測驗要有什麼目標，要撐下去之類的，而我也總是默默地在鄰座看着她，是不是認真的女人都特別有魅力的呢？
在她的薰陶下，我也認真溫習起來，結果在一羣無心向學的同學中也總算取得數一數二的成績。
「彤彤！你睇下我幾叻！我宜家全班考第二呀！之前一路都無試過咁高分㗎！係咪抵讚先？」
「係啦係啦叻啦叻啦！謙謙好叻叻喎！」她轉過來輕輕地拍頭。
「哼！你而家當我狗仔呀！我嬲㗎！」
「謙謙唔好嬲嬲豬啦！最多我買嘢獎勵下你喇！」
我們在旁人眼中恍如一對在耍花槍的小情侶，而我也對彤彤深感懷疑。她是不是也喜歡我呢？