(短故）《二月十四號嗰日，我收到一份情人節禮物》: 35.

「沈卓怡。」隔了幾秒，他又開口說話：「一陣出去公園傾下？」

我便只能像等待末日審判一樣，沉重地點了下頭。

拖著緩慢的腳步走到公園，這個時分就只有我們兩個。

「我真係有認真睇哂。」他一如既往地點起煙，然後望向我：「好多謝你咁愛我。」

我也點起煙來，仍然是那包中華牌：「咁所以呢？」





「無，好多嘢都係一時嘅開心，你知我都知。」他像說些老生常談的話題：「係呀，我同你一齊嘅時候係好開心.....不過真係開心囉，唔係一世嗰種。」

「就算我同你經歷咁多事，都唔得？」我啞著聲線問。

「我老實話畀你聽喇，我係有幻想過同你真真正正咁拍拖。」他認真地道：「我諗完之後，都係覺得唔得。唔係你唔夠好，或者我太自私喇，我仲想見識多啲女人。」

我沒有作聲。

「我知你好好，就算我繼續同你咁樣落去，你都一定可以，係咪？」他伸手向我的臉，然後慢慢地摸著：「但係我唔得啊，我唔可以再咁自私對你。」





「你咁樣就唔自私？」我不禁再度失笑起來。

「我寧願你而家嬲我憎我，好過你一直咁愛我。」他堅定不移地說。

「你真係好唔鍾意我。」

「鍾意都有分好多種，你明唔明啊？」他依然很冷靜。

我定著眼看著煙團在眼前化作一絲絲散渙的線條，再慢慢消失。





「沈卓怡？」他見我沒有反應，便再呼叫我。

「無，好可惜。」

「咩好可惜？」

「我地來得快，去得快。好像頭先團煙咁，明明呼出嚟咁靚，散得幾快。」我學著他般淡然。

這次倒是他沒有作聲。

「方天宇啊。」

「嗯？」

「可唔可以比我攬住你啊。」





「最後一次。」我補充。

「好。」

然後我小心翼翼地把他抱著，就像我第一次抱著他一樣。

「多謝你，比咗我一個好好嘅體驗，對我成個人生。」我在他耳邊輕輕地說。

「我都係。雲南，其實我玩得好開心，因為係我細個發生意外之後第一次去旅行.....多謝你帶我離開香港，同我睇咗我以為自己一世都再睇唔到嘅風景。」他緊緊地回抱我。

我聽後把他的胸前都染濕了，我哽咽地說：「我真係好愛你。」

「我知。好多謝你，沈卓怡。」我們之間的遺言，對他而言就只剩下感激。





然後我們坐在月光下的小公園裡，就這樣一直看著，看著沒有星塵的夜景。