(短故）《二月十四號嗰日，我收到一份情人節禮物》: 10.

可能是荷爾蒙變化的關係，除了身體上各種不適以外，我的母性居然愈來愈重。

我走每一步都會小心翼翼，生怕會影響到孩子。

每天晚上我甚至會跟孩子聊天。

「BB，今日媽咪返咗成日工，有無搞到你好攰呀？」我每晚都在床上像瘋子一樣對著肚子自言自語，如果被人看到一定以為我是神經病。

但我的確真心真意想和孩子分享我的一切。





其實有時候會覺得自己這樣很奇怪，既然也打算不要他，為什麼還要這樣緊張？

直到星期六覆診時，當天值日的輔導員給了我一個答案。

「沈卓怡，你好，我叫Mandy，係呢到嘅社工。」她是一個年紀比我稍大的姐姐，看起來很和善的樣子：「你想我點叫你？」

「你叫我卓怡得㗎啦。」

「好。今日見到男朋友嚟陪你喎。」她理所當然地當阿宇是我的男朋友，這也是很合理的，我想沒有人會假設他只是和我意外才有這個孩子吧。





「係呀。」為了不想解釋太多，我唯有撒謊。

「咁其實呢件事發生咗之後，你地兩個點去面對？」她問。

「um...其實我最初知道個時真係好驚，因為呢次事真係個意外，我地無諗過用套都會中。所以一開始我驗到自己有，我都唔敢同佢講。」

「咁之後呢？」

「我覺得自己一個人真係suffer唔起呢件事，因為實在太嚴重...所以都係話咗佢知。」





「佢知道咗之後點？」

「佢好好，一直都話會同我面對，唔會掉低我，所以我都無咁驚。」

Mandy邊聽著邊點著頭，然後她問我：「咁好好呀，男朋友嘅支持同陪伴好緊要。你自己呢？你嘅心情係點？」

「其實我係個好鍾意小朋友嘅人，我係有打算第時會生bb嘅...咁突然意外咗有咗，真係唔係我預期之中。不過我好奇怪，知道自己有咗之後我每晚都會同bb傾計，我好想係呢段時間好好地同佢相處，好想盡我最大嘅努力對佢好。但明明我係打算唔要佢...」

這是我第一次向別人透露這種心情，對方居然是個陌生人。

「好正常嘅。其實好多女仔都會咁樣，因為個bb係你親生骨肉，同你身體連住。所以媽媽嘅感受會好深，你會好在意個bb。」

之後她繼續和我分析：「其實睇得出你好鍾意小朋友，所以你會好緊張bb。呢段時間你可以好好地對佢呀，就算你唔要佢都好，最後同佢呢段時間你都可以錫住佢，bb會知㗎。」

「我好內疚...佢係一個生命，係我嘅小朋友，但係我真係無辦法要佢...」我突然就哽咽起來：「其實我好想生出嚟...但我無能力養...我心理都未ready做一個媽媽...」





Mandy抽了兩張紙巾出來，然後遞向我面前：「咁現實環境的確好多因素要考慮，唔係話生出嚟就一定係對bb最好...如果你知道呢個情況下佢唔適合出世，其實bb唔會怪你。」

我泣不成聲，應該是因為懷孕之後都沒有真正把情緒好好釋放過，我的眼淚一發不可收拾般流下。

「呢段時間可能你會好煎熬，因為每日都會諗住呢件事。不過我建議你盡量保持返心情愉悅，因為你太唔開心都會影響到你同bb。你都想bb係最後呢段時間好好地㗎嘛？」

我一邊抹眼淚一邊點點頭。

「所以你唔好成日喊，你要開心啲。想食啲咩就去食啦，因為你想食嘅即係bb都想食嘅。而家你唔係一個人㗎啦，你要好好照顧住自己先，知道嗎？」

「好...我會好好地對自己，同埋bb。」

「你呢種心情有無同過男朋友講？」她追問。





「無...唔想再畀壓力佢，我怕嚇親佢。」我不好意思向阿宇表達自己的感受，因為他事實上也不是什麼男朋友，只是我的朋友。

「你應該要同佢分享下。太過壓抑自己會有反效果，而且呢件事都唔係你自己一個人嘅事，佢都有權分擔你嘅感受，好同唔好方面都係。」她循循善誘地說。

「好，我知道。」我微微點頭。

「好啦，咁你一陣出去問姑娘拎埋封轉介信，你睇下幾時約醫院個邊啦。」

我向她道謝之後，就離開了社工房。

「嘩，入去咁耐嘅？」阿宇跟上次一樣坐在外面等我，他問：「傾咗啲咩？」

「無呀，都係問我心情點樣個啲問題。」我嘗試表達得輕描淡寫：「同埋我呃佢，話你係我男朋友，因為我廢時解釋咁多。」

「係咩？哈哈，咁你點樣講。」他似乎很好奇我們的對話。





「話你有陪我呀，對我好好之類啦。」我尷尬地說：「因為佢好關心我個情況，怕我自己面對會好唔開心。」

「咁你都無講錯呀，我真係會陪住你。」他神色認真起來：「我知你好驚，所以你有咩都要同我講，呢條路點樣都好啦，都有我係到。」

我沒有想過他會如此上心，包括對我和孩子的事。