［真人真事改篇］《有一種鍾意，係我鍾意你鍾意我。》/《初戀1000天》: 第六章上 「誰正與你一起 便承認我很妒忌 像望見當時 懂得感動又何必 錯過你先知愛你」 〈錯過你〉

https://www.youtube.com/watch?v=rw__UPeMC0M
第六章上
早上八時半，Jessie最討厭的英文老師喃嚤大師似的在黑板前唸着催眠術，成功催眠了大半班學生，唯有Jonathan還在認真地聽她說話。

「So which is the answer?」課室鴉雀無聲，大概除了Jonathan外，大家都進入了深眠狀態，而從不在課堂上睡覺的Jessie則在無聊地把玩着手上的鉛子筆，思緒還停留在昨夜的那句話：不如我地一齊。

想到這裏，Jessie竟懊悔起來，按着額頭，心想：我應該係癡咗線先會講出啲咁嘅說話⋯⋯





「Jessie, which is the answer?」英文老師再三問道，Jessie卻仍沉浸在自己的世界，於是英文老師又問了一遍：「Jessie？」

「呀！」Jonathan連忙拍了拍Jessie的手臂一下，卻疼得Jessie叫了出來。

「What Happen？」英文老師皺着眉頭問道。

「Nothing。」Jessie按着被毛衣包裹的手臂，站了起來說。

「So what is the answer?」





忘了帶眼鏡回來的Jessie努力瞇起眼睛，試圖看清黑板旁的屏幕，卻還是看不清楚，連忙用眼神向身旁的Jonathan求救。

B，答案係B！Jonathan對Jessie做口型。

「變？變咩？」Jessie小聲問道。

「我話係B，Impressive呀。」Jonathan低聲地說，右手指着Reading上的題目和答案。

「B Impressive。」Jessie把Jonathan的話原原本本地重複了一遍。





「I’m asking Jessie, not you Jonathan.」英文老師盯着Jonathan說道，又瞪着Jessie，說：「藍樂，你發完夢未？我唔該你地上堂專心啲，Sit Down！」

「車，其他人訓晒添啦，你又唔話佢地，成日針對我⋯⋯」Jessie坐在座位上，目光卻離不開惹她討厭的英文老師。

「你啱啱做咩叫？你隻手整親？無野呀嘛？」Jonathan擔心地看着Jessie的手臂問道。

「無野呀，琴晚唔小心撞瘀咗，你一拍落黎有啲痛姐。」Jessie拉了拉毛衣的手袖說。

「你撞親邊度咁誇張？」

「err……啲櫃囉，我琴晚拉筋嘅時候，唔小心一野fing咗落個櫃到。」Jessie。

「你啲筋唔係硬過啲呀婆架咩？無啦啦拉咩筋？」Jonathan疑惑地看着Jessie。





Jonathan記得體育課的時候，Jessie的筋骨永遠都是最硬的那個，常常趁着老師不注意的時候「揸流攤」。

「硬就唔拉得架啦？」

「但你咁蠢，拉個筋都可以撞到，不如算啦，我唔想見到你聽日變殘廢咁返黎。」Jonathan搖搖頭說，「等我睇過有幾傷。」

Jonathan拉起Jessie的手袖，只見兩道粗長的、又青又黑的瘀痕。

「點解你瘀唔係瘀一達，係瘀一條嘅？你點撞架？」Jonathan看得皺起了眉頭。

Jessie連忙縮回手臂，把手袖拉下來，牢牢地裹着那道瘀痕，說：「我屋企個櫃有個位突出黎，我撞咗去嗰個位，咪剩係瘀嗰個位。」

「咁點解有兩條？你同一個位撞兩次咁叻呀？」

「唔得呀？」Jessie反問道。





「以你嘅智商，緊係得。」Jonathan調侃道，又關心地問：「痛唔痛呀？有無擦藥？」

「瘀咗少少姐，唔痛嘅，唔洗啦。」對Jessie來說，更痛的她都忍過來了，這不過是不足掛齒的小事一樁。

Jonathan趁Jessie不注意的時候，在Jessie那瘀得發青的位置用力地按了下。

「呀⋯⋯」Jessie痛得幾乎要叫出來，馬上用另一隻手按住了嘴巴。

英文老師往Jonathan和Jessie的方向盯着看了好幾秒，才皺着眉移開了目光。

「又話唔痛？放學都係去買枝去瘀膏啦。」Jonathan說。

「我無諗過你咁大力禁落黎架嘛！」Jessie不爽地瞪着Jonathan。





「姐係有事啦！唔理呀，一陣一齊去買枝藥膏。」

「都話唔洗囉，咁婆媽架你。」

「唔洗就唔好嗌痛啦。」

「咁你唔禁我咪唔會嗌。」

「好，我唔掂你，你唔好比我聽到你嗌痛。」Jonathan說道。

「一定唔會！」Jessie自信地說。

Jonathan無奈地搖搖頭。

「話時話，你琴晚十二點幾MSN搵我做咩？」Jonathan問道。





「你唔係顯示忙碌架咩？你又知嘅？」

雖然Jonathan的ICON是紅色的，顯示他正在忙碌，未必能回覆信息，可Jessie還是第一時間找了他。

可惜，他沒有給他即時的回覆。

「係呀，琴晚我去咗溫書，唔得閒覆，係起早咗咪開黎睇下囉。」

「吓，邊有人夜晚唔開MSN，等一朝起身先開架？」Jessie看Jonathan的眼神像是看史前遺物似的。

「我今朝咗早起身，整完早餐仲有少少時間，咪開黎睇下。點姐，你咁夜搵我做咩？點解你咁夜都未訓？」

緊係有事先搵你，Jessie心想。

在淚水模糊了視線的時候，Jessie第一個找的是Chloe，接着便是Jonathan。可是，他們都沒有給予她回應，因為他們根本不曾聽到她呼救。

「無野啦。」Jessie說。

「你好少咁夜無啦啦搵我，一定有啲野，係咩？快啲講。」Jonathan追問道。

她也很想告訴他，但不是現在，而是當她傷心得眼睛都快哭瞎了的時候。

可惜，他錯過了，她的傷口已有別個他為她治理，一個會把她放在第一位的他。

「無呀！」

「唔信！」

「唔好信囉。」

「唔幫你做功課。」

「乜你咁架，講野唔算數，我手腕同膝頭都仲痛緊！」

「咁你話我知咩事。」

「我⋯⋯」Jessie還未說完，便被英文老師打斷了，問道：「Jessie and Jonathan, can you guys stop talking?」

Jonathan只好閉上嘴巴，眼光尷尬地回到Reading上，唯獨不打算當個人見人愛的好學生的Jessie繼續張大眼睛，故意擺出一張專心的臉來，緊盯着惹人厭的英文老師。

捱了整個上午，終於來到午膳時間。由於學校不允許學生外出吃飯，所有學生只能訂飯，或走到天台的食堂買飯吃。

「我落一落校務處，一陣上黎搵你地，幫我拎個餐具盒上去呀。」Jonathan匆匆忙忙地把餐具盒放到Jessie桌上，未待反應遲鈍的Jessie反應，已離開了課室。

「佢落去校務處做乜？」Andy看着Jonathan的背影問道。

「點知佢。」Jessie回答道，「啱啦，你幫佢拎埋餐具盒上啦。」

「你呢？你唔自己幫佢拎上去？」Andy問道。

「我今日唔上去食呀。」

「吓，你都要落去搵老師咩？」Chloe好奇地問道。因為這些年來，除非約了老師或被罰，不然每到午膳時間，他們都會四個一起上飯堂吃飯。
「唔洗呀，我今日跟佢地訂咗樓下小食部。」

為免午膳時段太多人，不少班別都會有同學負責集齊所有人的訂單，然後提早在小息時拿到小食部，再在午膳時找人下去拿，那就可以避開長長的人龍了。

「咁你落去攞上Canteen食囉。」Andy提議道。

「我⋯⋯」Jessie不想告訴他們，其實她約了James一起吃午餐，便找了個藉口，說：「琴日仆親懶得郁，你地上去食啦，我坐係到等野食得啦，食完仲要趕埋啲功課，唔係又要拎返去做。」

「定我地拎個餐落黎陪⋯⋯」Andy還未完說，Jessie已打斷了他，激動地說：「唔洗！」

「我對你咁好得登拎落去陪你食都拒絕我？算啦，我地絕交啦。」Andy說。

「好啦，拜拜。」

不知是他們未長大，太幼稚，還是友誼真的太深厚，竟經常把絕交掛在口邊，可往往早上絕了，下午又和好了，比女人的心情還善變，所以Jessie一點反應都沒有，只意思意思地敷衍Andy。

「呀，你竟然咁冷淡。算，Chloe我地行，唔好同啲咁嘅人講野。」說罷，Andy拿起Jonathan的餐具盒，然後拉着Chloe的手離開了課室。

呼，好彩佢無堅持要同我食，唔係就死！Jessie心想，這才鬆了口氣。


「麗姐！」Jonathan走到校務處旁的工友休息室門前喊道。

「麗姐，有學生搵你呀。」一位年紀老邁的工友喊道。

「有學生搵我？」麗姐疑惑地放下剛吃了幾口的飯盒，走到門口。看到Jonathan那張熟悉的臉，麗姐馬上咧起一臉笑容，說：「原來係你！搵我做咩呀？」

自從那天黃昏時分，Jonathan替腰骨不太好的麗姐搬過幾盆盆栽後，麗姐便把他的臉刻在腦海裏了。

「無呀，之前Open Day，我見義工小組整咗好多去瘀膏黎賣，你都好似買咗幾盒，想問你仲有無多，我想同你買盒咋嘛。」

「我拎晒返屋企，無係手喎，你急唔急呀？唔急我聽日帶返黎比你。」
「但我想今日要⋯⋯」Jonathan搔了搔頭髮，露出一個尷尬的笑容說道。

「咁呀⋯⋯呀，你去搵關Sir呀，佢負責義工小組，應該有多嘅。」

「係呀，咁我上去搵佢呀，唔該晒你呀，麗姐。」

「唔洗客氣。」麗姐微笑道。

於是，剛從五樓下來的Jonathan，又跑了上一樓的教員室找關Sir。剛巧，關Sir去了洗手間，於是Jonathan又在教員室外等了接近十分鐘，才等到他回來。

「咦，Jonathan，唔洗食飯咩？搵我咩事？」關Sir問道。

「我搵埋你就食架啦。其實我係想問上次義工小組啲去瘀膏仲有無剩？我想買一盒。」

「有嘅，但⋯⋯我擺咗係義工小組間房角落嘅其中一個箱，但我一陣趕住開會，你要嘅話我可以比匙你，你自己搵，搵完再鎖返門，比返條匙我，OK？」

「無問題！」從來都品學兼優的Jonathan輕易地從關Sir手中取得會室的鑰匙後，馬上跑到四樓的會室。

打開門，裏面除了有幾張開會用的椅子外，走到房間的盡頭，還有一堆用紙皮箱裝着的雜物。

關Sir講嘅應該係依到，但邊個箱先係呢？Jonathan看着眼前十多個的箱子猶豫起來，唉，唔理啦，再諗就無時間食飯。

於是，Jonathan開始把這些像層層疊般被堆起的箱子翻了個遍。

然而，不消五分鐘Jonathan便已渾身都是汗，而當他走到電掣櫃，準備按冷氣掣的時候，才發現黏上「壞」的字樣，而房間因為不大，也沒有裝風扇，還僅有一扇窗可以悄悄透一透氣，卻還是未能改善房間侷促的事實。

Fuck，今次仲唔係你死就我亡？Jonathan有點絕望地閉上了眼睛，可不消五秒又張開了，不顧身上的汗水，走到那群又重又多的紙箱旁，開始仔細地翻找起來。

「哇，你買咁多，食唔食得晒架？」Jessie看着足以擺滿整張桌子的小食，包括有司華力腸、滷水雞翼、咖喱魚蛋、雞軟骨串、墨魚丸、撈面、甜筒和烏龍茶，驚訝得張大了嘴巴。

午膳時段，大部分學生都去了天台，或是下面的小食部吃東西，課室便只剩下寥寥數人。

「落單嗰陣唔記得問你想食咩，佢地又趕住落去訂，我唯有咩都訂啲，唔緊要啦，都唔係好多姐，食得晒嘅。」James邊說，邊把袋裏的保溫壺拿出來。

「吓，你仲帶咗飯，姐係依到啲野食全部都我一個食晒呀？我食唔晒架喎。」Jessie突然感到有負擔起來。

「食唔晒我食囉，唔洗擔心喎，你食啦。」James把一包撈面遞到Jessie面前，才開始打開自己的飯壺。

「呃⋯⋯我唔食公仔面架。」Jessie不好意思地說。

粢飯同撈面，二份一都撞唔中，早知唔聽Lemon點！James心想。

「哇，係咪龍蝦伊面黎架？好吸引！」Jessie看着James的飯壺咽了咽口水。

「你鍾意食呀？同你交換呀，我食撈面，你食伊面。」James拿走那包撈面，把自己的飯壺放到Jessie面前。

「真係嘅？會唔會唔係咁好呀？我剩係食其他小食都飽架喎。」

「唔緊要喎，我媽成日都整嘅，我都食到厭，你幫我食啱晒。」James沒待Jessie說話，便開始吃起那包全靠味精調味的公仔面。

「咁⋯⋯我唔客氣啦。」饞嘴的Jessie口裏說不，身體卻很誠實，馬上把壺裏的伊面夾到嘴裏，好吃得她張大了眼睛，讚嘆道：「好好食喎，我日日食都唔會厭！」

事實上，這是James其中一道最愛的美食，他從小吃到大從沒厭倦過，James故意那樣說，不過想Jessie趕緊吃，沒想到單純的她竟輕易相信了。
「好食就食多啲啦，幫我食晒佢。」

「好呀，你媽咪手勢咁好，以後你有咩唔食我都可以幫你食喎。」Jessie高興道。

「好呀。」James看着Jessie那饞嘴的模樣，眼神裏盡是寵溺。

「係咪熄咗部冷氣？點解好似好熱咁？」開始冒汗的Jessie不禁拉起了手袖，那兩條瘀黑的傷痕在潔白如雪的肌膚上格外明顯。

「你隻手⋯⋯痛唔痛？」James心疼地問道。

「依兩條？OK啦，唔掂佢就無事。」

「真係咩？」說罷，James輕輕按了按那道瘀黑的傷痕。

「呀！你做咩學埋Jonathan啲衰野？」Jessie瞪着James說。

「Jonathan禁得我就唔禁得嘅？」聽到Jonathan這名字，一種莫名其妙的不悦感油然而生。

「痛呀大佬！」Jessie氣得眉頭都皺了起來。

「又話OK，OK就唔會咁大反應啦。」James擔心地看着Jessie說，「你有無啲咩去瘀膏呀？擦下好啲喎。」

「唔洗啦，佢自己會好返架啦，由細到大都係咁，無事喎。」Jessie用力地吸了一大口伊面進口，還咬了一口司華力腸。

「唔得，放學一齊去買去瘀膏擦。」

「唔得呀，我今日要練波。」

「你琴日仆到咁應仲練波？你唔痛咩？」

「OK掛？痛嘅我係一邊練下射波囉。」看着這樣勤奮的Jessie，James實在無法理解。

「就算你隻腳得，你隻手都傷得好勁，練少次啦。」

「唔得呀，就比賽啦，都唔係好傷姐，我頂得順喎。」

看着這樣倔強的Jessie，James突然拿走了她掛在桌邊的一袋球衣和球鞋。

「你做咩呀？」Jessie不解地看着他，防備意識極低的她手上還拿着一串雞軟骨。

「收埋佢，等你無得練。」

「比返我。」Jessie這才放下手上的美食，雙手還抱放在胸前，不爽地看着抱着她那袋球衣的James。

James卻沒有歸還的意思，Jessie伸出手，打算從他手上奪回那袋球衣之際，他竟站了起來，說：「除非你應承我今個星期抖下唔練住啦。」

Jessie沒有理會她的話，也站了起來，再次嘗試從他手上搶回來。可惜，即使她用力地往上跳，還是不及James舉的高，然而，她卻不願放棄，一隻手繼續使勁地按着James肩膀，另一隻則努力把手臂往上伸。

看到這樣的畫面，額角還在流汗的Jonathan捏緊了手上的去瘀膏，一種不知怎形容的奇怪感覺在心底油然而生。