呢個係用數值黎追女仔既世界: 9. 管理員出現

我終於明白乜嘢係「智者千慮，必有一失」。
其實我係愚者。
所以我而家係屋企，同司令員一齊食緊飯。
佢好似好滿意我個豆腐火腩飯，係咁匹我盒飯黎食。
然後又倒D波仔咖喱飯俾我。
雖然我都食咖喱。
 
事源半個鐘頭前，我用指令撇甩咗司令員，之後走去買飯盒。順便四圍行下。其實都係商場無無聊聊行黎行去。旺記D豆腐火腩係即炒，所以等咗15分鐘先有得拎。點知返到屋企時，已經有個人企係我屋企門口，拎住盒咖喱盒。
又一次同司令員係我屋企，孤男寡女。
其實，應該，我諗，都無乜嘢掛！




由結果黎講，係無事發生過。
因為食完飯，佢就走人。
出事係送佢返屋企果一段路。
 
佢走果陣，我順便落街掉垃圾，順便又陪吓司令員行一段路。
其實一路無嘢講，靜靜地行。
行到邨口，都係時候走既時候，有人出現。
家姐出現。
家姐唔係返屋企，佢唔同我住。
家姐唔係係邨口出現，佢唔係啱啱返黎。




佢係我背後跟住我。
前一秒，司令員突然行前踏多一大步，跟住轉身，好似有嘢想同我講：
「呀，係呀……」
然後變成大叫：「呀~~~？！」
「吓？」
司令員指住我左邊：「邊~邊個呀？」
我擰轉個頭向左，見到家姐個頭同我幾乎係面貼面。
事後諗，家姐你使唔使咁痴纏？
當時諗：「鬼呀！」
我係成個人嚇到打橫成個人訓咗落地。




「衰仔，有女朋友都唔叫家姐黎見吓，仲要帶埋返屋企都唔出聲。」
睇見家姐右手叉住條腰一輪嘴係咁講，我都唔識起返身。
 
不過全級第一立即清楚哂成件事，先拉咗我起身，然後斯斯然同家姐講：
「姐姐，你好，我係班長，黎搵埋佢溫書。溫完書架喇，天黑喇，我走先喇，下次見啦，姐姐。」
佢仲要記得執咗我袋飯盒先走，太冷靜喇！
事後又諗返，司令員個尷尬程度太多喇掛？
好明顯有嘢。
不過無時間理住。
理咗個大麻煩先。
 
跟住果兩個鐘，就係解釋、解釋、同埋解釋。
係，我無拖拍呀，姐！
我無呃咗個女仔呀，姐！
我都想呀，鬼叫你細佬又蠢又醜樣，又要骨慘慘咩！




「你認就得喇。家姐醒多2000蚊俾你，追女仔呢D嘢無得慳！」
「謝謝姐姐！世上只有家姐好！」呢吓無得唔攬住家姐黎錫啦！
 
---------------------------------------------------
 
返到屋企，一條友，又真係無乜嘢做。
講咗咁耐，其實我好似無話過俾大家知，其實我係無興趣既。
打機、漫畫、動畫、籃球、足球，我乜都唔好。
唯一嗜好係發呆。
屋企連電視都無。
一個人住間百零呎公屋，要電視做乜？
(話說以一個人住黎計，已經係豪宅。)
部電腦都係早幾年學校有個咩「人人有腦用」計劃時，班主任叫我申請。
AV？不了。唔想鍊成腎者之石。
就咁部腦無乜用，連上網都係靠手機連線，好在係無限PLAN。




 
所以而家做得最多既係睇司令員俾我果幾本書。
同埋試程式：
 
printf(object_moving(glass,2, 107, 3, 500));
printf(object_moving(water,2, 107, 3, 500));
狀態視窗出現"1""0"
又慢得滯，D水跟唔切隻杯行過黎，倒瀉半杯水，成地都係水。
 
printf(object_temp(water,-8400));
狀態視窗出現"1"
今次杯水夠凍，仲有少少冰浮係水面。
 
點解無拿拿又要關物理事？
我無take物理喎！




算！我去放紙飛機。
printf(object_moving(paper,271, 036, 40, 700));
狀態視窗出現"1"
睇住隻紙飛機以秒速40米直飛落樓下花圃，直插入泥，爽哂。
 
無拿拿見到有個男人走去花圃度，蚊返隻紙飛機出黎，然後望上黎。
四目交投
俾佢知係我放仲得了？
我地公屋戶高空擲物要扣分。