呢個係用數值黎追女仔既世界: 8. 閃人

 
我發現自己唔係讀ICT既材料。 
尋日同今日係對卷日， 返半晝。
晏晝食完飯， 我地7個同學返咗課室覆卷。 順便計下總分。
因為中英文比重係1.5， 所以今次都係司令員高分D。
差成11分。
而且佢連自修科都係超班。 
司令員自修既歷史有89分， ICT有93分。
我只有84同埋…49分。
自修科完全比唔上。




佢既努力果然非一般。 
 
「唔緊要啦， 我講返俾你知點做啦！」司令員拍住我隻手， 好似想安慰我。
「你睇下你自修科歷史， 仲高分過我所有科。 」天使長， 呢句似係想我安慰你咁喎。
「大學都無需要讀4個x， 唔讀都無所謂啦！以你自修歷史都有80幾分， 好有發展空間。 」Kristy姐似乎另有目的。
「其實夾硬讀多科， 會唔會影響其他科成績架？」原本考第四既素文已經高分過我， 攞返全級第三。
「你計頭6科， 已經差我8分， 就唔好學人考8科啦！」一向同我爭第二名既美儀， 反而擔心我成績。
我係咪要考慮drop咗科ICT呢？
 
不過從一開始我都無諗住考多2個x。




我只係諗住學程式指令咁解啫。 
先唔講我完全無興趣學寫網頁或者整wifi， 
而家雖然知道我可以閱讀人體既所有數值， 
但因為完全無注釋， 望住過萬個數據， 基本上完全無法解講。
而且我熟悉身體狀態， 可以用黎做參考既人， 就只有眼前呢7個人。
呢4個月， 我只係知道頭8行既意思。
根本無時間讀咁多無謂書。 
「試多個學期啦！如果3月考試都唔得， 到時再諗啦！ 」司令員結束咗個話題， 就開始同大家一齊睇卷。
事關我地學校既試卷一向超難， 尤其是四主科， 強如司令員都係拎平均分89.6。
唔合眾人之力係無可能超越90分大關。 




 
傾到5點幾， 同美儀， 素文同國強睇埋份歷史卷之後， 大家都預備散。
無既， 呢堆人都無讀ICT。
「聽日搵到盧Sir先睇ICT啦！ 走喇好無？ 」司令員代表大家出聲。
咁大家都執嘢。
「我走先喇， 去搵埋家姐。」天使長第一個出課室門口。 
 
行到聯合醫院， 原本得我一個上山， 但司令員似乎擔心我， 所以跟住我走。
「唔使擔心我喎？ 」
「但你個樣唔係咁講。 」佢指住我眉心， 我先發現自己一直皺住眉。
唔怪得係人都知我諗緊嘢， 雖然我煩既唔係成績。
解返開我眉頭， 我話：「既然係咁， 不如陪我食飯啦！橫掂我都係一個人食。」
「一個人？ 」
「仲有邊個？ 」
而家到司令員一個「？ 」樣。




「你平時成日都有人陪你食飯？ 」我唔明佢唔明咩喎。
「咁屋企人呢？ 」
「我無家姐， 你估天使長咩？哈哈！ 」一個人食飯好奇怪咩？
乜司令員咁奇怪既？
氣氛好奇怪， 都係閃了。
「我去買飯喇， 你返屋企啦！88！ 。」
 
hidemouseptr();
睇住司令員轉個頭就唔見咗我，仲要四圍望都唔知我就企係度，我都放心D。
好！買飯食。