呢個係用數值黎追女仔既世界: 5. 獨處家中

我有D在意.
雖然司令員既說話我都好在意,但天使長返入去病房之後,司令員就無再出聲.
我在意既係之前出現既右上角視窗.
而家已經無咗,想睇多次果行字都唔得,雖然已經背咗.
int sky_moving(int, int, int, int)
咩黎.
等攞藥既時候,俾司令員見我寫低咗,佢話知咩黎,仲拎咗我張紙走.
我自己既嘢,我都唔知,佢知?

返到屋企,一沖完澡出黎,就見到電話有個陌生人Text我.




陌生號碼, 俾咗個網址我.
入去一睇, C程式編寫?
唔知咩黎.
轉個頭, 天使長同Kristy姐又出現.
"太好喇, 又有好嘢食!"
Kristy姐間唔就會煮好嘢俾我食吓.
"今日係斑蘭蛋糕. 第一次整, 試吓好唔好食啦!"Kristy姐請食嘢, 當然唔係免費午餐.
係白老鼠.

乜中五學生咁得閒?




"Kristy姐, 中秋之後無test咩?"我問.
"test咗喇, 8月開始補課, 10月頭搞掂哂."Kristy姐好輕鬆咁答.
"咩成績先?"
"當然唔差過你啦!"Kristy好自豪咁答.
咁抵佢自豪, 我話哂係全級第2名成績升中四.
第1名係司令員, 四年全級第一, 天才.
"唉,11月尾就考試."天使長反而好煩惱.
因為佢係凡人. 不過都係全級頭廿名內.
Kristy又話:"乜你唔係有個女朋友帶你返屋企?"
我望住天使長, 佢好似知我諗乜:"我咩都無講過呀!"




我望返Kristy:"我知你估緊乜, 無D咁既事."
Kristy俟埋黎, 恥笑住咁講:"唔使扮嘢喇, 係學校發生既事, 又會瞞得過我咩?"
果然係佢堆兵. 校花可唔可以唔好咁神通廣大?
Kristy用佢又白又滑既左手,搭住我既左邊膊頭, 同時好小心咁避開傷處.
其實唔避仲好囉. 我仲期待會有碰撞事件.
以前成日有既享受, 係佢升任校花之後就無哂呢個樂趣.

呢個時候, 門鐘響.
"天使長, 你知我無得郁架啦!"
係我同Kristy既目光之下, 天使長"唉"一聲走去開門.
一開門, 係司令員.
司令員係門口, 望住我, 又望住搭住我既Kristy:
"善玲師姐..."
Kristy發現司令員雙眼由充滿期待既光芒, 一下就暗淡落黎.
Kristy發現坑太大, 即刻起身拉司令員入屋, 順手拉埋天使長出門外.




咪當我唔知啦, 我仲見到你兩個行數值無離開.
不過唔係理佢地既時候.
司令員點解會黎咗我屋企?
而佢手入面, 拎住一本"七日學會C語言", 同我寫低果行指令.
好似正話有人send咗個網址俾我喎.
唔通???