呢個係用數值黎追女仔既世界: 3. 回到課室

以一個傷者黎計，算係多嘢諗。
一邊睇打波，一邊又要諗司令員正話講既嘢。
「乜你成日都整親。」
好似成日整親時，司令員都係身邊。
都係佢照顧我。
 
吳姑娘去拎急救用品時，司令員係度睇我個傷勢。
佢篤吓我隻右手，紫一塊紅一塊，個樣好似好驚咁：
「都中四啦，成個細路仔咁，俾人撞一撞就傷成咁。」
佢篤一篤，又講吓，好似好關心我咁。




「上星期又係，中秋時又係，次次都疼哂。」
呢個時候，吳姑娘就返黎。
佢到底有幾留意我？
 
1年半前。中二學期尾。
第一次見到數值既視窗。
 
我地學校會俾升中三既同學，係中考完哂試果一個星期，參觀中四五課堂。
第一次入ICT既課室，寫程式既世界。
第一次用「procedure call」。




我跟住老師寫係黑板既筆記，讀出「procedure call」呢個指令既時候，有一個視窗係我眼前出現。
深灰色、半透明、收圓角，一個長方形出現係眼前既左上角。
一開始都唔覺眼，直到我跟住老師個程式例子，我一邊讀，視窗一邊出現相同既程式碼。
咁啱個老師攞咗個司令員既名做例子，
我就當咗呢個係世界既參考數值，先至發現原來自己比佢更脆弱。
打機之過。
 
其實我都唔明，我同司令員唔到班，點解果陣會係參觀同一個課室。
而且我地兩個中四都無讀 ICT。
但係就第一次，俾司令員見到我有幾脆。




亦係佢扶我去醫療室。
 
仲記得第一次俾女仔扶仔隻手，拖住隻傷腳，慢慢gut去社工室。
司令員俾個膀頭我扶住，仲要落兩層樓梯。
隔住件校裙，摸住佢右邊膀頭。
明明好瘦 (好滑) ，但好有力。
頭髮就係我塊面飄，傳黎一陣淡淡既水蜜桃味。
加微微既汗味。
聞得兩吓，我仲要差錯腳。
佢即刻攬住我條腰拉住我，驚我跌落樓梯。
轉個角度睇，佢係攬住我。
感謝係電腦室用張電腦櫈碌到我果個師兄。
 
原本升上中學後，都無乜心機讀書既我，
係兩日之後既結業禮，見到司令員上台領獎。




全級第一名。而且中文英文通識都係全級第一名。
令到呢個學渣，開始覺得讀書係有意義。
同埋令到個學渣加入咗學校排球隊。
 
回過神黎，係因為聽到司令員把聲。
唔係叫我，只係叫「起立」。
當我起身時，右手傳黎劇痛，我忍唔住「呀」咗一聲。
全班望住我。
老師話：「你整親唔使敬禮喇。各位同學再見。」
隨住「老師再見」有幾個諸事精走過我問我又做乜咁傷。
煩係煩，兄弟嘛。
我望住隔三行既司令員，見佢好擔心咁望住我一秒，又擰返開個頭。
呢三行既距離，我要係呢個月內突破。
十一月頭既第一學期考試。
 




反而最令我陷入麻煩既人，係窗外面叫我。
校花轉堂時，經過課室外面既走廊。
我地學校既課室係用好大隻窗，即係走廊既人係見到我地點上堂。
以前成日俾胡Sir (訓導主任) 捉到我上堂發夢。
而家俾校花捉住我隻右手問有無事。
班入面班禽獸，又開始想食咗個咁樣喇。