《末日下的那些人：方舟戰爭》: 第六章：末日將至，鑄造英雄的仁者(4)
身為醫者的羅醫生，知道自己的價值所在，也知道舜兒不會殺掉自己，故此由始至終他也沒有擔心過自己會死左他的箭下。他斜眼看看還在抖動的矢羽：「我對你家姐乜野都冇做，只係提供左一個選項俾佢，你想係度繼續吹西北風，定入去？」他舉指姆指，指指身後的養和醫院。
「……入去。喂，阿凱，你都黎。」
四人跟著穿著白袍的他步進養和醫院，現在舜兒才發現在醫院中各處都掛起了白布，白布上畫著十字標示，示意人道救援的意思嗎？
「我再介紹多Ｄ，我諗你地都知道其實好多醫護人員都有登上方舟既資格，事實上即使係醫護人員都好，都唔係所有人，而且亦有好多人自己選擇留係呢個地球上，照顧病患同老弱婦孺到末日一刻。」
先前羅醫生也說過自己屬於一個醫護志願小隊，知道在末日法庭一事出現了大量死傷者才來大館救助。
「呢度就係你地既據點？」
「嗯，遲下可能搬，唔太夠位用。我地除左醫生，仲有護士，當中好多都有戰地醫生既經驗，始終我地物資都成日唔夠。」羅醫生一邊行一邊解釋，「我地係絕對中立區，任何有需要既人我地都會施救，換句話說所有想襲擊我地既人，都會威脅到其他勢力求醫既機會，襲擊我地等於向所有勢力宣戰，容我張狂：連方舟護衛隊都唔敢郁我地。」
聽畢後再次望向十字旗，舜兒突然覺得一直一橫的兩筆氣勢強了不少。
「但係，我地同樣有武裝力量，當然同你地既反抗軍唔同，我地已經準備好係呢個星球上等待末日既黎臨，所以只係自衛程度既武力，同你地介紹：三號，係我地既教頭，佢既獅山自衛隊同我地合作緊。」
羅醫生指指在角落等候的男人，那人站得筆直，雙目炯炯有神，即使有一定年紀但神情還是相當的警剔，一看到四人馬上把四人都掃視了一次，從他身上感受到紀律部隊的氣息。
「你好，三號…」舜兒點點頭。
「你好，你好。你就係歐舜兒？即係佢就係歐貝兒？搞咩呀咁樣樣？」
「佢打左我支針。」羅醫生道，「之後再搵你。」
「嗯。」
名為三號的男人，也知道那支針的事？
羅醫生推開一扇門，是一間普通的診療室。
「就講到你家姐，首先你唔使擔心：你家姐唔會有生命危險。只要俾Ｄ時間佢，心跳呼吸都會慢慢回復正常。」他坐下，而舜兒輕放貝兒到病床上。
「到底佢係咩事？」
羅醫生在抽屜中取出了一個檔案夾，上面寫著的正是歐貝兒的名字。
「容我直說，歐貝兒佢既情況係無可能上方舟，方舟上每個人既位置其實只係冷凍睡眠倉，以佢既身體登上方舟都唔會生存到落去，上面既維生技術對佢無用。換句話說…舜兒，你家姐係末日下係死硬。」他打開檔案夾，一邊閱讀一邊看著舜兒。
「…」
既說早已知道，但被這樣直說還是很難受。
很難受，很難受。
為甚麼偏要是她？心地善良，溫文雅靜，樂於助人的她？在學校甚至連缺點也沒有被記過的歐貝兒？
「舜兒…」錘妹輕輕握住舜兒的手，舜兒只是一呆，卻沒有掙開。
「我，我知道。」他咽哽。
「然後，我係大館個邊知道歐貝兒一直以黎都憧憬英雄，既然佢反正都無辦法上方舟，我諗緊佢會唔會有機會幫到我地，亦可以係佢有限既生命一完佢既夢想？於是，我俾左呢樣野佢。」
羅醫生掏出一支曾經出現在貝兒手上的注射器：「正係我既作品：複合強化劑，結合左唔同係運動場上被禁止使用既禁藥，興奮劑，強心針等等，換句話說：可以將人體既體能，速度，抗打等等不同能力強化到極限…唔係，應該話可以超越所有極限，短時間內成為超人一樣咁強既怪物。」
白色的注射器站在桌子上，反映著窗外日落的餘輝，閃爍著黃金的光芒。
「家姐…就係打左呢種針？」
「無錯，佢似乎唔太相信於是只係打左２０％，你家姐其實都唔蠢既。」
只是２０％，就有那樣的效果嗎？！
「而呢一支，係複合鎮靜劑，注射強化劑一定時間後一定要服用，再坐低俾身體靜返落黎。」
然後，他取出貝兒吸食過的那包口服液。
「…會唔會有副作用同傷害？」
羅醫生也直接了當：「絕對有。首先情緒會極度失控，易怒，大喜大悲，另外初期都係會流下鼻血，然後就變成牙齦出血，影響月經，仲有其他…不過我保證，佢唔會因為副作用而早過末日死。」
「佢唔早過末日死，就代表可以任你做白老鼠呀？！」
相比起舜兒，羅醫生始終冷靜，反而一向理性冷靜的舜兒一直在激動。
「的確唔代表。但我岩岩講既野，我已經同你家姐講過晒，佢大可以扔左支針佢當無識過我，但佢都係決定成為幫到你既力量…你明唔明？」羅醫生雙目如藏著深淵，「係佢自己既選擇。」
選擇—他一再強調。
「我無野暪住你地，因為我認為你地係加入末日十字會，或者獅子自衛隊既不二人選，既唔會上方舟，而且有使命感，勇氣以及英雄氣慨。」
——以及自毀傾向，與沉溺在自己的悲劇浪費中。當然，羅醫生沒有在那時候說穿貝兒的心態。
「我…」
「我換個問法：末日下我地死就死硬，你想要無意義既餘生——定係壯烈咁戰鬥，直到為正義而戰死，保護弱者到末日？」
「仲使問？咳！咳！」歐貝兒從病床上掙扎上坐起來，「難得我有力量，反正係死，當然要成為大家既力量…我，我做夠負累啦！」
話畢，一道鼻血從她鼻孔中淌下。
「哎呀貝兒！」錘妹連忙放開舜兒的手，掏出紙巾為她印去鼻血。
「我早就講左，我唔會隱瞞任何事，呢個係佢既選擇黎，我啊——」羅醫生雙眼突然好像望向腦海中最遠處的回憶，「我最痛恨無意義既虛渡餘生。」
舜兒看看錘妹，握緊了拳頭。
「直到我地打倒方舟政府之前，我地…唔會加入你地既咩獅山，十字咩會。」
還有使命未完。
殘害眾生的魔鬼極權，而不可一世地矗立著。
「唔係咩獅子咩十字，係末日十字會同獅子自衛隊。」羅醫生修正，「不過唔急，方舟起飛後先係需要我地既時間，政府唔做事，就由我地民間力量黎做，你知唔知道葵涌貨櫃碼頭個邊有幾慘烈？」
「唔知…」
「…不過反正未係時候。貝兒，你再要藥我可以俾你，但記得要注射晒全部，唔好好似今次咁只係打一部分。好啦，我地可以入正題。」
「正題…？依加先係正題？！」
「你地搵跑馬地騎士團，應該係因為佢地知道赤柱監獄逃獄者既下落。」羅醫生道，「結果，佢地全部被滅口，好對唔住，我地既力量唔能夠主動出擊救人或者阻止青龍部隊。」
「…」阿凱一言不發。
「青龍部隊一樣都係搵緊個條友，佢地比你地走得更前，更快，所以係你地搵到馬場個時就只得返一座屍山，所以可想而至下一個受襲既團體就係——」
「——南區聯合！」
跑馬地騎士團的情報來源，是一個自稱為南區聯合的組織。
以這個局勢發展下去，負責赤柱監獄營道的青龍部隊的人為了找回逃獄者，便會如追蹤到跑馬地騎士團一樣追蹤到南區聯合身上！然後，將會上演一模一樣的大屠殺！
眾人同時想到這點，舜兒回首一看阿凱已經是面色蒼白，口唇發青！
「我…講左佢地據點位置出黎…」
「下？！你講左？！」
「咁佢地嚴刑逼緊供啦嘛！我唔講會死架！後來團長佢地發爛，我扮死先無事！」
「你笠水仲咁撚大聲？！」貝兒明顯相當不喜歡阿凱。
「你都痴線，求生有咩錯呀！你明知Ｄ藥會殺你你仲用，明知打會死仲打，你地先係痴線呀！」
「細佬，俾注射器我！我就係度令個咩咩騎士團真正團滅！」
「好啦，我要講既係咁多，用藥唔用藥，救人唔救人，你地搵三號教頭，呢Ｄ事係佢負責，我只係洗下傷口之類。」