《當全世界都染上唔扑野就會死嘅怪病》: 20
樂兒嘅事告一段落，我同Cherry步入拍拖階段，我哋好似兩個有共同嘅默契，就係避免出去拍拖⋯⋯
外面個世界太痴線啦，真係唔係幾啱我哋兩個。
我哋兩個反而變到好似異類咁，出去拍拖都要時時刻刻保持住境界，有時係出面睇到啲人扑嘢都會撩起自己嘅性慾。
開始意識到呢啲第一時間反映出嚟嘅反應係好正常，然後再仔細諗諗，就會克制住自己。
我同Cherry係屋企拍拖係幾甜蜜嘅，雖然可能相處一兩個鐘左右就會走，但幾開心，次次走都會唔捨得。
而且呢個世界影響嘅，唔單單淨係愛情⋯⋯
友情亦如是。
我同班男仔都開始漸行漸遠，我堅持自己應有嘅道德，而佢哋不停地打破原有嘅社會規範。
佢哋嘅目標放係人妻、明星。
呢啲都係原本世界點樣都完成唔到嘅事，但依家會想盡所有辦法扑到佢哋，亦打破咗地域嘅限制，唔洗再諗藉口或者安排一個局去呃佢哋上嚟屋企搞嘢。
原本以前我哋幾個都係溝唔到女嘅一班毒撚嚟，大家嘅共同興趣都係打下機、追下韓國女星，傾下邊個AV正。
依家佢哋嘅興趣就係下一個搞邊個好⋯⋯
我不解嘅係⋯⋯
佢哋唔會覺得悶嘅咩？咁樣扑法。
女性朋友唔洗點講啦，淨係有無純友情都可以傾三日三夜，更何況依家傾嘅，係有無女性朋友唔係炮友？
呢個世代，我同Cherry好似無乜將來咁拍拖，對於前路都係一片茫茫。
人心帶俾我好大嘅衝擊，我都唔知仲有無好人，將來要做啲咩好。
依家都嚴重影響緊生活，上堂影響緊，返工影響緊，而且又咁多人死，應該點樣生存都成為咗一門學問。
我將此刻嘅煩惱同Cherry講，除咗想Cherry係我另一半之外，我都想佢係我嘅靈魂伴侶，希望心靈上可以同步。
「你覺得我哋將來應該點⋯⋯？」
「將來？」Cherry有點訝異地說。
然後續說：「依家根本無乜將來可言⋯⋯我只係想一直同你一齊就夠。」
「你搵幾多人工，有無樓，係咪專業人士，通通都唔重要，我無諗到咁長遠喎。」
「我又無要求你一定有車有樓先同你一齊，係咪？」Cherry好自然咁捱係我心口，好小鳥依人咁同我講。
「但你唔想我將來俾到好嘅生活你咩？」我擔心咁講。
「依家大家都生活得唔好啦，其實我覺得大家都好似喪屍咁囉依家，其實每日維持扑嘢次數就夠，但總係有人為咗滿足一己私慾，想盡辦法玩，去做其他人嘢，咁人不嬲係貪心㗎啦。」
「就好似以前搵錢咁，你會唔會因為搵夠一定錢而唔搵？會唔會淨係想每日固定搵咁多？有幾多人真係做到知足常樂先得㗎，你唔會嫌錢多，嫌命長，所以你唔會話只要每日都有扑，唔洗死就得。」
社會上嘅人性提早紥根係我同Cherry心中，呢一年我哋見識到太多了吧？
先至會令Cherry會有咁深嘅體會，自己亦都如是。
「將來嘅生活係點⋯⋯我都唔知。」Cherry悲哀地訴說現實。
「我好想俾到幸福你，但我依家搞唔清咩係幸福。」我回答Cherry。
「我以前覺得同一個人幸福地生活落去，係一齊行到結婚生仔，然後執子之手，與子偕老。」
「依家？」
「我覺得呢啲係無乜可能發生嘅嘢，唔知出到去會唔會同第二個人搞，唔知你會唔會俾其他人搞，甚至亂倫都會有⋯⋯」我續說。
「老師都可以無道德咁同自己啲學生扑嘢，亂倫都唔算係啲咩新聞啦。」呢個話題如同以前嘅政治話題一樣，都係咁沈重。
「我⋯⋯其實都想好似一般人咁有個美好嘅婚禮，同鍾意嘅人結婚，我真⋯真係對感情好認真㗎！」Cherry伸手過嚟，同我隻手十指緊扣，緊緊地相扣。
「我知，見你一路以嚟都無拍拖就知啦。」我因為佢突襲我隻手而笑到甜。
「咁我覺得搵唔到一個自己鍾意嘅就寧願唔拍㗎啦，就算對你有意思，你無咩行動我就⋯⋯」
「咁嗰陣我仲鍾意緊樂兒⋯⋯」回想返，我放係樂兒身上都唔少時間同心機，如果我早一點放棄，我係咪會早一啲同Cherry擦出火花？！
諗諗下就心生懊悔。
「⋯⋯」
「咁姐係依家係你初戀？」我吃驚地問Cherry，我之前壓根無諗過呢個問題。
「係啊。」Cherry一臉稚氣、理所當然地望住我。
「乜你唔係咩？」
我諗一諗，然後哈哈大笑地答：
「都係喎！哈哈！」
擁著Cherry，原來我同Cherry經歷咗咁多事情，最後竟然可以成為彼此嘅初戀。
時代嘅洪流無沖走我哋嘅初心，反而俾咗一塊石頭我哋，好讓我哋兩個可以有個地方立足。
係呢個黑暗嘅世界入面，開始產生一點點嘅變化。
係街上面，啲人開始扑到行屁走肉咁，雙眼無神。
你會係佢哋嘅眼神入面搵唔到最原始對性嘅渴求，開始有人產生厭倦嘅心理，由佢哋嘅眼神同埋動作可以睇得出。
每日返學放學觀察周邊嘅事物已經成為我嘅習慣、日常，呢一樣嘢幾有趣，會見盡人嘅變化。
當我以為人嘅性慾係無窮無盡嘅時候，但可能呢樣嘢無絕對？
用錢嚟比喻最為合理。當搵到好多錢嘅時候，你已經唔再係咁需要錢，你會想要追求其他，可能係心靈層面上嘅嘢。
當性慾能夠被無止境地滿足，就想渴望愛情嘅滋潤，想回歸最初。
可悲嘅係⋯⋯
受污染嘅心靈，係點都回復唔到最初嘅純潔。
身體亦都係咁嘅姐，唔通你叫一個唔係處女嘅人變返處女咩？
我邪惡啲咁諗啊⋯⋯
其實最慘嘅，未必係個世界突然變成咁。
而係個世界變成咁之後，再變返去原本嘅世界。
當你初初以為呢個世界係失敗者嘅天堂，然後慢慢發現其實唔正常，可能係虛假嘅天堂，最後再帶返你去地獄。
相唔相信報應啊？