我在補習社遇到一個令我難以忘懷的女生。: 四十四、年度最後一天上班

喺12月最後一個星期四，我如常去補習社返工，Cindy返咗澳洲過新年，而依個假期都係Patrick返晒。
 
由於果日都仲係假期，所以就比正常時間返早啲，係返晏一點至五點半。
 
「hello~ Patrick. 」我㩒門鐘。
 
「喂～好耐冇見。」Patrick打開門講。
 
「嗯。」
 


「點啊～聖誕假有冇出街慶祝？」
 
「都喺出街睇吓燈飾咁喇～」我又作咗個大口呃佢。
 
「係咩。」佢望一望我之後收拾枱面嘅文件。
 
「呀係～我哋補習社有個新嘅policy，依家要班𡃁仔打電話臨收線前，比tutor確認係自己走定係由家長接送，上次果三條友搞到我一獲粥咁，啲家長又將啲責任推晒落我度，你冇問題阿ｍａ？」Patrick忽然醒起有啲野要提我。
 
「冇。」
 


雖然個policy以後會麻煩咗tutor，但我完全明白腦細嘅憂慮。
 
「冇咩就入去做野喇。」
 
「OK」
 
由於假期補習社冇強制學生一定要返，所以今日classroom A同classroom B嘅人坐埋一齊，但就算兩班夾埋，今日間房都係坐得7個人。
 
Kace見到我好似有啲不滿:「點解今日又係你嘅？Miss Ellie幾時會返嚟啊？」
 


「hehe，佢去咗旅行啊。」我聽到Ellie個名之後有啲錯愕。
 
有時雖然話返工都係講錢姐，唔洗放太多人私人感情，但聽到學生講想邊個老師今日返果陣，嗰個人唔係自己原來都幾傷心，可能我都渴望被人期待同記住。就好似小學雞果陣，你好唔鍾意下個老師嘅堂，每次轉堂嘅時侯，你心入面都好希望喺走廊入嚟嗰個係代課老師。
 
Kace望住我笑得好燦爛:「你又知Miss Ellie去咗旅行嘅？哦……你哋拍拖！」
 
眾人高呼:「Wow~」
 
我心諗:「我都想呀hi。」
 
「喂喂喂，放假比你哋輕鬆啲姐，係唔係代表你哋可以咁放縱，再嘈一陣全部人冇小息，知唔知道！」腦細好有殺氣咁行入B班班房。
 
「知道。」學生被嚇到唔敢再講任何野。
 
好彩腦細冇啦啦入嚟幫我解圍，唔係都唔知點解釋。因為果一刻你同班細路講咩都好，佢哋都會當我同Ellie係男女朋友。


 
好快就到咗放工時間，咁都係準時打卡走人返屋企。
 
「喂，你一陣有冇地方去？」腦細問我。
 
「……冇，做咩？」我考慮咗一陣先答。
 
「一齊食飯好冇？」佢收拾緊隨身物品。
 
「……」同上司單獨食飯感覺好怪。
 
「行啦，睇你都未食野。」腦細搭住我膊頭離開補習社。
 
踏出大廈第一步，佢都仲係搭緊我膊頭，我諗我都走唔甩喇，於是我問:「食咩啊？」
 


「去綠野失蹤打邊爐好冇？」腦細指住巷仔後果間餐廳。
 
我聽到之後load咗幾秒:「果間叫綠野仙蹤啊？」
 
「係喎！口快快講錯姐～」腦細好尷尬咁笑。
 
行到入去間餐廳，一個人都冇。我仲記得高中果陣好鍾意同阿腳嚟哩度食飯。