我在補習社遇到一個令我難以忘懷的女生。: 四十三、談心事

身為毒撚，平安夜、聖誕節、除夕依啲節日對我嚟講都係普通日子，就喺係屋做功課同約阿腳打波。交代吓補習社假期嘅安排先，聖誕節至新年補習社除咗公眾假期，每個星期只喺開星期二同星期四。
 
我就報咗星期四更，Michael就報星期二更。而Ellie就因為成家人去兩星期日本旅行而冇報更。咁都好嘅，最少唔洗見到依啲特別日子佢同異性嘅合照。
 
Ellie都算幾有心，出發前一日喺補習社個WhatsApp group問大家想唔想要手信，唔洗問喇，有手信比梗係個個都即刻留名喇。
 
平安夜果晚我約咗阿腳出嚟打波，但出到嚟玩咗幾鋪HORSE就冇咩心機繼續打波。
 
「我哋每一年都好似咁過啊可？」阿腳坐喺球場邊問我。
 


「係呀～咁快就廿歲人。」我挨住長凳拍波。
 
我哋兩個由中三講到哩家，每一年都話下年嘅今日唔好再一齊喺哩個籃球場打波，因為我哋都會FF果一年要陪女朋友，但現實永遠都係殘酷。
 
「你依排同補習社個女仔點啊？」阿腳忽然問起。
 
因為哩幾個月每星期我都有keep住同阿腳打波，所以我都有同佢講補習社嘅情況。
 
我嘆氣：「上星期我哋喺海濱傾下計，仲一齊影相囉。」
 


「進展得咁快都好愁。ＢＴＷ圖定老母。」阿腳放低咗個波好興奮咁衝過嚟。
 
我喺電話相薄開咗張相比佢睇。
 
「嘩，你補習社嗰個女仔咁似Bella嘅？身材好似幾好咁。」阿腳瞪大隻眼望住我部手機。
 
「頂你，咪鬼睇果度喇。」我用食指遮住Ellie上下身。
 
「你個樣笑到成個八哥咁向左走向右走搞笑嘅。」阿腳望住張相笑到痴筋。
 


「哈哈哈～好好笑。」我敷衍佢。
 
「唉～睇完佢張相我都明白你愁咩喇Bro～」佢突然搭一搭我膊頭。
 
「……」我哋個情況好似有種we know that feel bro嘅感覺。
 
「嗱，我唔係話你差，但個女仔咁可愛，係得人寵幸果啲類型，一定好多人追喇。好似佢咁出色嘅女仔，無論喺邊度，都好似漆黑中嘅螢火蟲，咁鮮明，咁出眾。」阿腳好似演員上身咁講起凌凌漆嚟金句。
 
「沙沙……沙沙……」忽然一股無情冷風吹向我背面，所剩無幾嘅樹葉都掙脫樹嘅束縛飄到我面前。
 
平安夜嘅球場空無一人，只有街燈為哩兩個男孩作伴。
 
「……唉…我都係追唔到佢㗎喇。」聽到阿腳講嘅野我心情突然好灰。
 
我哋並排坐望住球場沉默咗一分鐘。


 
「不如……我哋做愛咯？」我深情望住阿腳，講起欣宜<<29+1>>中嘅對白。
 
「屌，你痴咗線呀？」阿腳一巴摑落我塊面。
 
識咗阿腳咁耐，今次係佢第一次咁認真打我。
 
「……」被人打咗一巴嘅我呆咗冇反應。
 
「你份人唔好再放咁多負能量喇！你樣又唔係咁差，成日喺到怨天怨地，性格又似女人，你再係咁，真係冇女人會鍾意㗎。」阿腳嘅聲音大到成個球場都聽到。
 
「咁你咪又係A0。」我細細聲駁佢。
 
「你知唔知我屋企人要我畢業之後全家移民去加拿大呀，佢哋話香港個局勢過多十年八年一定唔同晒，早走早著喎！我同你都仲有一年畢業喇，依家搵個女朋友，佢係咪都會跟埋我去呀？我都想開開心心拍拖，但我可以點呀？但你唔同，你仲有機會係香港追佢。」阿腳講咗一啲我以前唔知道佢嘅事。
 


我面有難色:「點解你唔話我知你去加拿大？」
 
「仲有成一年，而且我屋企人都計劃緊，都未即刻拍板。」阿腳開始冷靜落嚟。
 
「哦……」我心情有啲惆悵。
 
「頂，咪講依啲喇！今日開始你要好好改變吓喇。」阿腳拍住波走向罰球線。
 
街燈照向佢嘅瘦長身影，影子上嘅佢今日好似冇顯得咁高。
 
「點變啊？」我尾隨佢。
 
「今日開始樂觀少少喇！我哋每個星期日打完波去我樓下做gym喇，女仔好鍾意有少少肌肉嘅男仔，而且做gym可以訓練你嘅毅力，啱晒你依啲早洩仔。」阿腳將籃球射向籃框。
 
阿腳好似由升到上Ｕ就開始做gym，咁我又唔係要打死人梗係冇跟佢去做喇。


 
「屌，你又知我早洩。」我大惑不解同時又覺得事情唔係咁簡單。
 
「我話你做野早洩啊，你諗咩野啊。你做任何野都係見到希望先去做，咁死得喇！你試吓搵樣野堅持咗先，真係失敗咗先算喇。」阿腳背住我講。
 
「……」佢嘅說話真係一語中的，原來人哋都觀察到我係咁，只不過係我一直呃自己唔係咁。
 
果一晚我同阿腳打波打到球場熄燈，返到屋企不斷反思自己之後應該要點做，依段時間Ellie有時都會po下旅行相上ig，亦會間唔中問吓我啲相影得靚唔靚。
 
到依家先知，原來一個女仔去旅行都keep住同你有message來往，你喺佢心目中一定有一定嘅位置。