我在補習社遇到一個令我難以忘懷的女生。: 三十四、Pre- Merry Christmas

「叮噹叮噹。」
 
「hahaha~，Merry Christmas, kace.」Patrick開門之後用聖誕老人tone講。
 
「哈哈哈，Mr. Patrick你好白痴呀。」kace指住Mr. Patrick笑。
 
Kace媽咪用手㩒住kace個嘴:「喂kace你講咩啊，信唔信我掌你個嘴呀。」
 
「Sorry~呀Patrick sir。」Kace媽咪鞠躬。
 


Patrick摸住自己pat鬚:「hahaha~ it doesn’t matter. 」
 
腦細你唔扮孫悟空其實都可以試吓扮聖誕老人。
 
過咗冇耐Kristy同Kelly都嚟咗，不過冇家長帶佢哋嚟。
 
Patrick做出一個welcome手勢:「hahaha~，Merry Christmas, Kristy and Kelly.」
 
「good afternoon Mr. Patrick. 」Kristy望到腦細之後一啲反應都冇就咁掂行掂過。
 


「今日都唔係聖誕節，Mr. Patrick. 」Kelly傻更更望住Patrick。
 
腦細唔知係咪比Kelly個舉動激死，望住佢拍一拍自己個額頭:「聖誕節係公眾假期嚟，你都唔洗返補習社，我依家講定比你聽姐。」
 
「哦……Merry Christmas Mr. Patrick. 」Kelly對住腦細傻笑。
 
之後果啲學生見到Patrick反應大概都係好驚訝或者好開心。
 
今日腦細就坐classroom A，我就坐classroom B。
 


有時我聽到隔離班咁嘈，我都會有定心理準備腦細會無啦啦咆哮。但唔知佢今日係咪好開心，佢竟然一句都冇話過P1-P3班學生。
 
我諗聽日太陽可能唔係由東邊升起。
 
學生放聖誕假，假期功課梗係特別多。不過由於果啲都係假期功課，即係唔洗今日對晒，所以啲學生最多都係出嚟問我問題。
 
好快到六點半鐘，腦細已經大發慈悲放晒所有人走。走之前佢叫我幫佢掃一掃枱面啲擦膠碎同埋抹乾淨啲枱先好走。
 
「你今日有咩做啊？」腦細㩒住手機問我。
 
「放工食飯返屋企。」我一路用個掃把仔清走枱面啲擦膠碎一路答佢。
 
「聖誕都冇活動咩？」
 
「……冇啊。」我諗咗一陣都係決定唔好講大話。


 
之後我準備執打卡走人果陣佢突然大叫:「啊！！」
 
「做咩事啊？」我好慌張望住佢摷緊學生啲補習社手冊。
 
我見佢攞起相機影住三本學生嘅手冊，然後打咗個電話。
 
佢突然好溫柔:「喂，係咪同學Ａ媽咪呀？你有冇收到WhatsApp啊? 你個仔今日係六點三就走咗。」
 
「＃＄％︿＆＊（」電話傳來一把㷫過火屎嘅女人聲。
 
「我哋補習社有個tutor蓋咗印問佢係咪自己走，你個仔答係之後先放佢走。」Patrick好緊張握實部電話。
 
聽到「補習社有個tutor」我即刻開始緊張起嚟。
 


「︿＆＊（）＊，你幫手搵吓同學Ａ佢喺邊喇，％︿＊（同學Ｂ、Ｃ同佢一齊㗎。」聲音喺電話傳出。
 
我聽到哩度大概知道發生咩事。
 
「……好喇好喇，真係唔好意思啊。」Patrick收咗線之後連續打咗幾個電話。
 
喺電話未接通之前:「同學A、B、C都唔見咗，今日原本由家長接佢哋，但佢哋呀媽話冇接過佢哋呀。你快啲幫手去搵吓，我叫埋Ellie同Michael一齊搵，搵到之後WhatsApp我。」Patrick一氣呵成同我講。
 
「喂，係咪同學B家長?..... 」電話接通咗之後腦細又開始同家長解釋。
 
「喂，你睇WhatsApp ，我send咗果三個學生嘅相比你。」佢喺我臨走前同我講。
 
「咁我去搵先喇，一陣搵到電聯啦。」我十萬火急離開補習社。