我在補習社遇到一個令我難以忘懷的女生。: 二十一、記憶中的香港島

同組員A道別後，唔知點解唔想即刻返屋企，於是走咗去銅鑼灣搭叮叮。
 
我喺百德新街上車，識揀就一定坐上層單丁位，因為可以睇到夜晚燈光閃閃嘅風景，香港嘅夜景真係一流。唔知係咪因為今日星期五，見到街上嘅行人普遍都面帶笑容，同平時閒日睇到嘅好唔同。
 
由灣仔經過和昌大押，廣州騎樓式唐樓，到中環經過唔同嘅銀行總行，甲級商業大廈，再到上環經過western market，依座城市真係好特別，唔同特色嘅建築物都反映緊香港不同嘅價值。
 
望望下風景，眼睛開始放空失去焦點。細個我哋會𠼮呀爸呀媽帶我哋周圍去，佢哋會絞盡腦汁諗帶我地去唔同地方，香港濕地公園、郊野公園、文物館、星光大道、海洋公園。細個覺得香港好多地方都好靚好值得去；中學，我哋淨係會去娛樂，唱Ｋ、影貼紙相，去旺角老銅行街；出嚟做野頭幾年，每日喺屋企同公司徘徊，每一年諗點樣plan一個最fit嘅假期去旅行。
 
唔係話唔好，但好似唔夠認識自己所住嘅地方。結婚之後，為人父母會為帶仔女去邊玩而好頭痕，最後好似人生好似一個循環咁，我哋好似翻返細細個咁，不過今次嘅角色已經係父母。
 


一個人搭叮叮吹住風真係思考嘅好時候。
 
原來仲有一年就grad，諗諗吓先發現year1、2果陣好似咩都冇做過，朋友一個都識唔到，gpa又唔係高，乜野活動都冇玩過。畢業之後踏入社會工作，就好似西西弗斯咁每日推一塊巨石上山，然後石頭又會趺落山腳，為咗安慰自己改變返工好慘嘅諗法，開始享受腦細荒謬要求，最後覺得自己係快樂。
 
點解一個人嘅心理狀態可以咁複雜。
 
聲音A:「咁咪踏出去改變囉。」
 
聲音Ｂ:「諗咁多做咩，快啲返屋企喇。」
 


咁快就搭咗一個來回，係時侯搭巴士返去。
 
臨訓前收到腦細WhatsApp:「你依個星期返星期一同四喇，下個月先考慮比你返星期五。」
 
「ok……」
 
腦細:「我唔想好似玩Michael咁，比佢返兩個星期之後又叫佢唔洗返咁，所以以後你哋一人返一個星期五喇。」
 
「冇問題。」睇到腦細嘅解釋反而覺得有啲安慰。
 


之後嗰兩個星期都冇見過Ellie，明明返補習社見到tutor list有佢個名，但個人好似消失咗，不過有時聽到學生提起佢就證明佢仲有返工，只不過我哋都夾唔到同一日。
 
由於我返星期一同四成日都會見到Michael，同佢合作多咗，見佢依排成日都滿面笑容唔知發生咩事，因為以我之前返嘅經驗，教得classroom A嘅人無論Michael定Patrick一定會好燥底，因為有啲學生交嘅功課錯晒，有啲就好嘈，但依兩個星期完全冇聽過隔離班房有吵鬧聲。