我在補習社遇到一個令我難以忘懷的女生。: 二十、訪問

由於今日要做訪問，所以個人都執得是正啲。我哋約咗五點鐘喺旺角一間樓上cafe做訪問，中午果陣Mable就問我中午同唔同佢食個飯，順便喺佢hall整理吓一陣要問嘅問題。根據上次我差啲失控嘅經驗，我就拒絕咗佢，因為唔想自己再犯上一次嘅錯。
 
「我們各自準備問題問你表哥吧。」我WhatsApp佢。
 
「好吧，那我們四點一起搭巴士去旺角好嗎？ 」
 
我是旦作咗個理由:「我要去旺角拿點東西，五點在那等吧。」
 
「好吧。」
 


四點五十分我已經係果間cafe攞咗位，為咗表示誠意，我就預先叫咗一嚿芝士蛋糕，同杯咖啡。
 
「我到了。」我WhatsApp佢。
 
Mable:「等我兩分鐘。」
 
過咗兩分鐘就見到佢表哥同佢入嚟。佢表哥個樣就係典型讀書人樣，黑框眼鏡，清爽短頭髮，身後孭住個outdoor書包，個樣睇落應該係香港人。
 
我揮揮手示意佢哋係哩邊。
 


佢伸出強而有力嘅臂彎向我握手:「你好，我係ＸＸ報紙嘅記者。」
 
我好恭敬:「你好你好，我哋今日係諗住做一篇訪問關於新聞機構嘅內容，我叫咗啲蛋糕同野飲，睇吓啱唔啱你口味。」
 
「多謝晒。」佢點點頭。
 
Mable:「咁我哋開始喇。」
 
首先都係問吓基本問題，做邊間機構，做咩職位，做咗幾多年，工作期間有冇難忘經歷之類。
 


之後就到問到一啲學術性少少嘅題目。
 
「請問你認為香港依家嘅新聞機構政治審查嚴重嗎？」我雙手放喺手提電腦鍵盤上。
 
佢諗咗一陣:「香港個情況就愈來愈嚴重，好似我公司咁，有時要引述一啲時事評述，同公司立場一樣嘅就長篇大論，持相反意見就得一兩句，仲要唔係重點果幾句。其他公司都係咁，睇吓《Ｘ報》更換總編輯; 《Ｘ報》抽起專欄，都係啲媒體涉嫌自我審查嘅事。」
 
我:「明白。」
 
「咁大家其實都感覺到上面比嘅壓力係愈來愈大……」佢講得好細聲，恐怕周圍嘅客人會知道佢講乜。
 
我知勢情唔對路就問咗另外一條，我打打下字眼尾梢到Mable不斷點頭。
 
我:「咁我想問吓你點評論香港媒體公信力？ 」
 
「我覺得整體係低咗，公信力受新聞自由、自我審查、經營困難、競爭等影響。


例如競爭咁，依家咁多新興網媒，新聞要求由以前及時性變成即時性，要24小時全天侯On call報導，每個媒體為咗用最快速度向大眾提供資訊，中間過程不免會犧牲咗啲真實性，尤其係一啲即時新聞。好多網媒講求速食新聞，當佢哋報導被其他媒體或者網友指正有失實地方，都會影響媒體公信力。」
 
「明白。」佢比我想像中答得詳細。
 
我問多兩條就到Mable問，整個流程都非常認真，歷時大約半個鐘，之後佢表哥就話有事要返屋企走先。
 
我就同組員Ａ繼續整理啱啱嘅問題，同埋睇吓網上有咩資料同訪問內容相關可以引用。
 
Mable用唔咸唔淡嘅講東話:「食唔食飯？ 」
 
「唔……我唔肚餓。」我拒絕佢。
 
Mable皺住眉鼓起腮:「又拒絕我，食餐飯好快。」
 
其實我今日中午都冇食野，一放學就去咗圖書館HEA。


 
「……好，但食完飯就走。」我好唔自然答佢。
 
Mable好快就提議:「不如食三哥好冇？ 」
 
「……無問題。」
 
點解每次同人食飯都會提議食三哥？
 
行去三哥段路，佢繼續翻啱啱訪問佢表哥講嘅話題，都係講吓自己覺得香港嘅新聞業係點，咁佢都好理性，知道香港大約由邊幾年開始新聞業開始染色，一啲傳媒機構有幾難平衡商業運作同自我審查，又點評香港新聞應該要收費，仲分享自己覺得兩地新聞業有咩差異。
 
跟住佢無啦啦停低，好認真同我講:「其實嚟咗香港讀書兩年，我好努力嘗試做個香港人㗎。」
 
不過我自己覺得接受資訊程度同生活環境已經令到大家有層打唔開嘅隔膜，有種說不出的不同。
 


為咗令個情況唔好咁尷尬，我就笑住講:「睇你衣著都知。」
 
佢有啲驚訝:「我着成點？」
 
我望一望佢個身:「好香港，又有少少mk。」
 
佢輕輕一笑:「哈哈。」
 
之後去到三哥，我哋就各自叫咗碗米線食。因為我唔想面對面坐，我就揀咗張圓枱搭枱坐。
 
「我唔客氣喇。」我將筷子放喺虎口位雙手合十。
 
「你咁似日本人嘅。」Mable一臉疑惑。
 
「係咩，食野喇haha。」我嘴角不自然向上。


 
原來我都有野會比人影響咗。
 
「係喎，你知唔知我嚟緊會上莊？」Mable食住米線講。
 
「哦……點解嘅？」
 
「我想識多啲朋友呀，同埋叫攞個經驗囉。」Mable嘅回答係啲普通想上莊學生既理由。
 
「幾好呀，祝你上莊成功。」我說著客套話。
 
成餐飯我哋嘅話題圍繞住學校同上莊野，食完之後大家就各散東西。