我在補習社遇到一個令我難以忘懷的女生。: 二、面談（一）

「唔洗咁驚訝點解我會知你到咗，因為架𨋢un果下好嘈，聽咗十幾年慣晒。」Patrick慢慢行入工作枱。
 
「……」燈光反射下佢滑捋捋嘅光頭，真係恨不我想伸手摸一摸。
 
補習社門口一打開，就見到一個鮮紅色嘅半身櫃，上面放咗幾個文件夾同埋一盆仙人掌，轉左向前行就有一塊壁報板，上面掛住啲學生獎項同埋師生合照，我見到有一個外藉老師同埋一個好似張衛健嘅人，應該就係Patrick，
 
話說小弟細個都被呀媽迫參加過英文考試，好似係University of Cambridge ESOL Examinations。 Reading, Writing, Listening幾多分就唔提喇，但估唔到Speaking有5/5。細個講英文好似唔識怕羞咁，識幾多就講幾多，大個咗反而連中文都講得唔好。
 
Patrick催促我:「一陣慢慢畀你參觀，快啲過嚟畀啲資料我睇吓先。」
 


望得太入神一時都唔記得咗自己嚟見工。
 
再行入補習社中心地帶就有兩間班房、一張老細枱、一張office工作枱。
 
我去咗佢張枱兼照待處坐低，坐低望住佢打開電腦，發現佢五官真係同張衛健一模一樣，頭髮當然係冇啦，不過佢下巴係有留羊咩鬚，所以應該唔係佢嚟。我果陣仲諗住叫佢喺我面前唱翻首身體健康嚟證明唔係佢本人。
 
「係唔係好似張衛健呢，俾人誤會過好多次，有時返工搭巴士無啦啦有人叫我同佢影相，其實我之前係唔留鬚㗎，不過留咗鬚少咗好多人問我，所以就一直留。」佢視線從電腦螢幕轉向我雙眼。
 
佢究竟係咪讀心神探嚟？
 


我呃佢:「哦……都唔係好似姐。」
 
佢好嚴肅咁講:「我依度唔請唔誠實嘅人，你可以走喇。」
 
其實由細到大我都唔鍾意俾人睇穿個內心，所以好小事都會講大話，連對住我好朋友阿腳都會講，不過佢都已經習慣咗。
 
「其實都真係幾似，但pat鬚搞到唔係好似。」我繼續講大話，跌落地都要揦返拃沙啦，點都要維持自己嘅面子。
 
「嗯……你攞啲資料嚟睇吓。」佢好似相信咗我。
 


「ＸＸＸＸ中學畢業，band3嚟，咁都入到Ｕ。」佢眉頭緊皺，一臉疑惑。
 
「……」其實我對自己成績都幾慚愧。
 
「DSE中文成績: 2、4、5*、2，overall 4；英文: 2、3、2、4，overall 3；數學: 5 ，你啲成績咁古怪嘅。」佢審視緊我張dse cert。
 
我搲一搲頭:「考得差果啲因為前一晚訓得唔好。」
 
「哦，你好彩喇，我哋依度請緊功課輔導老師，英文功課會有我或者另外一個外籍老師對，遲啲介紹你識。」
 
我聽到之後鬆一口氣。
 
「嗱，我依度對老師得一個要求，就係要夠惡，你當我係學生，你試吓鬧我。」佢望住我整咗個狠樣比我睇。
 
好彩之前有睇東張西望仲有啲記憶。


 
「如果你喺個安全情況下真係要幫嗰個人，咁…咁…咁…要發出一個比較有震撼性少少既聲音，咁哩個震撼聲我就可以示範俾你睇，ARHAJIU！」
 
「Patrick你嘈夠未呀。」我將ARHAJIU嘅精華用丹田運氣嗌出嚟。
 
「……」空氣突然安靜。
 
佢無啦啦一野轟落張枱，用貫穿成層嘅咆哮聲:「何柏偉！你今日冇得放小息！」
 
唔知係咪佢氣場好大，搞到我好似成個小學生淨係識擘大個口望住佢。果然薑都係老嘅比較辣。
 
「我諗你平時都好少大聲講野㗎喇，你可以試吓唔出聲用眼神嚇吓啲學生，因為你唔講野個樣都幾唔友善吓。」Patrick雙眼從下到上打量我。
 
其實係咪姐係話我唔出聲個樣好西。
 


「好喇，其實都可以唔洗咁惡嘅，我同個外藉老師Cindy兩個都咁惡，你間唔中扮吓好人咁樣仲好。」佢終於露出一個比較寬容嘅樣。
 
「＠＃＄％！？」啲老細係咪好鍾意玩見工嘅人。
 
「最後想問吓你覺得咩係自由，其實我就當請咗你，所以你唔洗咁緊張點答，我想知道依家大學生係咩諗法姐。」佢無啦啦變得好正經。
 
由於我個人真係好多疑，我內心不斷糾纏究竟佢係講真話定想試我呢？