我在補習社遇到一個令我難以忘懷的女生。: 一、見工

「喂，你電話響啊，你冇加佢做聯絡人，聽唔聽？」阿腳坐喺球場邊大聲講。
 
我：「係唔係三字頭架？」
 
阿腳：「九字頭架。」
 
我將個籃球碌埋一邊，然後九秒九衝過去聽電話。
 
我：「喂，你好。」
 


電話入面嘅男人：「你好，想問你係咪叫William？」
 
「……」我等佢再講野確認身份。
 
「你之前係咪申請見工？」
 
「係啊。」由於我記得之前申請過見工，所以我慢慢對電話入面把聲放低戒心。
 
電話入面嘅男人：「我係Patrick English Centre打嚟架。我叫Patrick，係補習社嘅英文導師，你依家可唔可以嚟見工啊？」
 


我心諗係咪痴線㗎，叫人夜晚8點嚟見工，Sir, are you ok？
 
當然我冇咁講啦，我猶豫咗兩秒：「好啊，我要半個鐘之後先嚟到得唔得？」
 
Patrick：「無問題，地址係香港街777號嘉名商業大廈9樓01號室。」
 
我好恭敬：「好，我會盡快趕到。」
 
阿腳懶幽默：「嘩，ＣＬＳ ＣＯＭＰＡＮＹ嚟？星期五夜晚八點叫人見工。」
 


我：「咪係，但聽把聲好似幾好人咁。」
 
阿腳一臉疑惑：「你諗住成套打波衫身水身汗去見工啊？」
 
我抹乾額頭上嘅汗：「唔係點啊？呢度過去都要半個鐘喇。唉唔講喇，驚遲到。」
 
阿腳：「拜。」
 
我：「拜。」
 
之後我一仆一碌趕去巴士站等車去見工。
 
我上到巴士，喺手機Google打Patrick English Centre睇下間公司嘅資料，
 
由於我前前後後send咗3份CV申請做補習老師，但過咗兩星期都無回音，就當無咗哩回事。


 
Google第一個結果顯示Patrick English Centre ALL NATIVE ENGLISH TEACHERS。
 
帕特英文教育中心，以英語為母語的教學團隊。
 
我心諗:「shit!點解會申請咗做英文補習老師㗎。」
 
事關小弟英文好廢，寫作淨係識寫SVO，英文能力大概係初中水平。
 
我嗱嗱臨係手機開翻大學見interview嘅introduce myself嚟重溫。
 
沿途架巴士un下un下，加上啱啱打完波，都冇咩心機睇，唯有聽天由命。
 
落車之後，發現星期五嘅夜晚都幾多學生妹學生哥，讀完中學三年都冇，就已經覺得着校服係一件好耐之前嘅事。
 


我暗嘆:「着住校服拍拖好青春。」
 
行咗五分鐘終於到嘉名商業大廈，大廈外面有幾張木凳，入面係開放式嘅管理處，走廊到𨋢口位置置鋪咗張好污糟嘅紅色地毯。
 
到咗樓下手心突然冒汗，我份人一緊張就好易面紅，熱到好似有針拮塊面咁。
 
我望住手機個時間，8點25分，好彩最後準時到。
 
依棟大廈都夠晒舊，入到𨋢嘅地板就咁鋪咗一塊木板，大力踩都會發出「咯吱」聲，盞燈仲要閃下閃下，通風口鋪滿晒灰塵，仲衰過啲四十年樓齡公屋嘅𨋢。
 
依家諗翻起都覺得幾恐怖。
 
架𨋢去到九樓停之後好似跳樓機咁chok一chok先打開門，哩下不其然既攻擊嚇到本身已經緊張嘅我有啲神經衰弱。
 
𨋢門打開，見到門口大大隻告示寫住Patrick English Centre， 外面有幾張膠凳仔，應該係畀家長坐。


 
講下自己嘅家庭背景先，屋企係三人家庭，呀爸係裝修工人，阿媽係清潔工，屋企三個人平時洗費都唔大，我最大既洗費就係食野。
 
點解要返part-time？因為升到上大學如果再問屋企人拎家用都覺得唔好意思。但我份人比較懶，加上又係大學生，符合到我條件嘅我諗只有補習老師。
 
喺我望住門口告示嘅時侯，道門無啦啦打開左！
 
一個着住淺藍色西裝嘅光頭佬企喺我面前：「你係咪William？ 等咗你好耐喇。」
 
我心諗：「ＷＴＦ？個男人咁似張衛健嘅？呀唔係，佢根本就係張衛健，世界上邊有人可以咁似樣。」