香港都市傳說：一筒歸西: 彩蛋：一筒歸西 - 尚未結束（十）

當一筒放到桌上的一刻，阿軒祈禱着「一筒歸西」那咀咒的力量能幫助他們逃過這一劫。
 
至少爭取到時間後，他們還可以想辦法找師傅處理咀咒的事情，但逃不過現狀的話，就甚麼都做不了。
 
「好啦，見你哋三個人感情都幾好，我就做下好心，一次過送你哋上路啦，跟我嚟。」
 
三人聽到後，身體不受控地站了起來，然後像排隊玩火車遊戲一般，井然有序地從門口方向離開。
 
「點解，點解咩事都無發生，無可能㗎！」
 




阿軒對現狀頗為驚訝，因為這跟他設想的情況完全不同，難道真的要死在長洲這邊？
 
怡欣和哲瑋則努力大喊着，希望引起附近的人注意，但不知道是附近都沒有人還是其他原因，他們的求救聲完全沒有得到回應。
 
三人一靈體慢慢從東堤小築那邊向沙灘走去，晚上的沙灘一個人也沒有，感覺特別陰森可怕，他們一直走一直走，直到來到早上才光顧過的露天茶座後，才停了下來。
 
「好啦，到啦，等我介紹下啦，呢邊係長洲嘅東灣海灘，咁多年嚟死嘅人無一百都應該有五十，而當中呢，應該有八成都係我造成嘅。一般情況呢，我都會安排佢哋逐個逐個入水，等到一個死咗之後，另一個先入水，咁愈後面嘅人就可以睇住佢朋友嘅屍體，然後再結束自己嘅生命，呢個係幾咁美好嘅事情。」
 
「痴線佬！你自殺就好啦，做咩要拉其他人落水，我哋又無得罪你。」
 




怡欣聽到這邊，再也忍不住大聲咆哮，管他是靈體還是神明，她只想把心中的不安給宣洩出來。
 
「痴線？痴線嘅唔係我，而係呢個世界。呢個世界對人太唔友善，我帶其他人走，其實只係幫咗佢哋。你哋都係，離開呢個世界之後就唔會再痛苦。去啦，你哋三個人一齊上路啦。」
 
三人聽到後，身體不由自主地往海的方向走去。
 
「死梗啦死梗啦。」
 
「你唔好淨係識得講死梗啦，係咪男人嚟㗎，諗下辦法啦，阿軒你都出下聲啦。」
 




「我仲諗緊點解『一筒歸西』會無效，明明中咗咒啲人連想死都無辦法。」
 
阿軒沉默良久後才再開口，卻跟現況完全捨不上關係。
 
「你係咪傻㗎，我哋就嚟死啦，你仲諗啲咁嘅嘢！」
 
怡欣和哲瑋忍不住大喊。
 
說話的同時，三人已經慢慢走到海中，整個下半身已經被淹沒了，但阿軒仍一臉淡定。
 
就在以為三人會就這樣被淹沒之際，一股無形的力量把他們慢慢向岸邊推了過去。
 
回到岸邊後，束縛三人的力量亦驟然消失。
 
「你哋又想嚟阻止我？」




 
阿翔向着三人的方向喊話，但目光卻不是聚焦在三人身上。
 
三人正在狐疑之際，海面和沙灘突然湧現了無數黑影，變成人山人海，不，應該是鬼影幢幢才對。
 
怡欣和哲瑋早已被嚇得失了神，只有阿軒仍能冷靜地觀察着四周，雖然燈光微弱，但他還是能從那些黑影中看到脖子的位置都刻了一個「翔」字，阿軒瞬間明白到，這些鬼影正是被阿翔多年來害死的怨魂。
 
「四、五、六......到底有幾多人？」
 
阿軒嘗試數數看在場的黑影，但那個數量已經多到不能輕易計算出來。
 
「就係你班廢物，日光日白都出嚟嚇啲人，搞到啲人愈嚟愈唔夠膽入嚟長洲，令我近呢幾年都無辦法殺更多嘅人，難得有獵物出現，你哋唔駛旨意阻止我。」
 
阿翔對着黑影大喊，縱然數量眾多，但阿翔的話卻令到這些靈體產生類似恐懼的感情。
 




阿軒特殊的體質，令他感受到周遭靈體恐懼的同時，更多的感情是忿怒！
 
慢慢地，那些靈體向阿翔走過去，似乎是要以數量阻止他一樣。
 
「你哋試咗咁多次，有邊次係成功阻止到我？浪費時間！」
 
只見阿翔右手一揮，靠近他的靈體如煙般消散，不留一點痕跡。
 
眼見靈體的數量開始減少，本還在恍神的怡欣和哲瑋總算鎮定下來。
 
「走，我哋快啲走！」
 
也不知道是誰帶的頭，總之三人拔腿就跑了起來，往大街方向跑去。
 
「死啦，我哋走去邊好？哲瑋你快啲諗下啦。」




 
「吓？一，一係走去碼頭嗰邊啦，雖然已經夜晚，但嗰邊應該點都會有人啩。」
 
決定了方向後，三人加快步伐向碼頭跑去。