香港都市傳說：一筒歸西: 彩蛋：一筒歸西 - 尚未結束（九）

三人看着正宇變成另一個人的模樣後，心中的恐懼油然而生。而更不可思議的是，本應被翻新過的房間，突然變得破破爛爛，眼前的麻將亦變得泛黃，空氣中的異味變得更為噁心。
 
「兩男一女入嚟長洲玩，真係開心。我就唔係啦，我係走投無路先嚟呢度。你哋知唔知燒炭死係咩感受？我本來以為可以好快就昏迷，好似瞓咗咁安祥離開。但原來唔係，當氧氣慢慢減少嘅時候，個人會開始頭痛、耳鳴、然後全身痙攣，無辦法控制自己嘅身體。最痛苦嘅係，當開始覺得好辛苦，嘗試去阻止嘅時候，個人已經無晒力，想郁都郁唔到，然後就係劇痛，無比嘅劇痛，每一秒都好似成個鐘咁耐，最後已經分唔到係中毒死，定係痛得滯死亡。」
 
三人被逼聽着這恐怖的經歷，腦海裡則思考着如何擺脫這恐怖的現狀。
 
「你哋唔駛諗住走啦，當日我女朋友話要同我一齊死，但嚟度先想縮沙，好在我早有準備，整暈咗佢先可以同佢一齊死。但原來燒炭死係好辛苦，佢暈咗反而可以舒舒服服，估唔到我連死都死得慘過人。每次見到啲人入嚟玩我就會諗，呢個世界真係唔公平，大家都係租同一個地方，憑咩我嚟尋死但你哋就嚟呢度風流快活！」
 
三人被逼聽到這邊，只覺得毛骨悚然，當中怡欣被嚇得幾乎要哭出來。
 




「你哋唔駛咁驚喎，人始終都要一死，你哋放心，我其實心地好好，你哋入嚟長洲都係想玩啫，我會帶你哋去潛水，不過無潛水工具。當啲水進入你嘅呼吸道，水會慢慢進入你哋嘅胃同埋肺，跟進你哋會被啲水塞住窒息而死。比燒炭舒服好多，唔駛擔心。」
 
「你要點樣先肯放過我哋，你有嘢想我哋幫手嘅話，其實可以直接講，我識有位師傅一定可以幫到你。」
 
阿軒想起天命叔以前曾經提到過，一般靈體之所以死後仍然存在，通常都是因為有事未能放下，只要能夠解決靈體的心事，大部份靈體都能因此而得到解脫。
 
不知道是否阿軒的話起到了作用，但阿翔突然變得沉默。
 
「估唔到，原來呢個世界係有好人，聽到你咁講，我真係......我真係......」
 




阿翔用手揉了揉眼睛，似乎被阿軒的說話所感動，三人看到這樣的反應，以為真的能透過對話解決。
 
「我真係......覺得你哋好白痴，哈哈哈哈！你以為咁樣就可以感動到我放你哋走咩，你哋唯一可以做嘅，就係揀一齊死，定係分開死！啱啱副牌未打完，四隻西呀嘛，依家到我啦，打邊隻好呢？唔好話我無良心，我畀你哋揀，呢度咁多隻牌，應該打邊隻？打出嚟唔係一筒嘅，我就放過你哋。」
 
聽到這邊，怡欣和哲瑋馬上專注盯着桌上的麻將，仿佛再用點力就可以把麻將看穿一樣。
 
「呢隻，揀呢隻！」
 
「唔係呀，揀呢隻啦！」
 




兩人吵得臉紅熱赤，深怕做錯決定。
 
然而阿軒卻沒有這樣做，眼睛只盯着阿翔，腦海中則思考着別的事情。
 
「快啲啦，諗好未呀？再唔係我自己揀嚟打㗎啦。」
 
「阿軒，幫下手啦，我哋三個條命就喺呢隻牌度㗎啦！」
 
「係囉，我哋一齊決定揀邊隻啦，有咩事都無得怨呀嘛。」
 
阿軒聽到兩人催促，無奈地搖了搖頭。
 
「你哋真係信佢會遵守諾言放過我哋咩？」
 
聽到阿軒的話，兩人突然醒悟，的確，說到底靈體的說話本來就不可信。




 
「果然，你係有啲唔同，以前啲人聽完我提出放過佢哋嘅遊戲之後，全部都好認真玩，最後發現揀錯咗之後嗰種互相責怪嘅嘴臉，真係一絕，佢哋點到死都無諗過，所謂嘅機會根本唔存在。」
 
在說明沒有機會的同時，阿翔把屬於他的牌組打開，在他手上的麻將，全部都是一筒，怡欣和哲瑋意識到，兩人剛剛的爭吵根本毫無意義。
 
阿軒已經沒有心情再聽下去，他只希望阿翔能盡快將一筒打出，與其這樣被折磨而死，倒不如賭上「一筒歸西」的力量，來延長他們的生命。
 
「睇嚟你哋都無心機再聽落去，我就送你哋一程，落到去地獄再繼續玩你哋嘅三缺一麻雀啦。一筒！」
 
阿翔把一筒打出，亦意味着即將奪走三人的性命，「一筒歸西」的力量，真的能保護三人，倖免於靈體的殺戮嗎？