《捕捉表姐三步曲》第二部~~仙氣の表姐Sita (3): 仙氣の表姐Sita @ 2
仙氣の表姐Sita @ 2
到第二日早上，Sita一早起身梳洗。無特別化妝，都係適合返工淡妝。當佢行出門口撞到隔離屋陳生，陳生一見到Sita就打雀咁眼望到實。Sita見佢望住自己，就好有禮貌咁講：「早晨。」
「早晨！」聽到Sita打招呼，陳生笑口噬噬：「早晨！無記錯妳叫Sita，啱唔啱？」
「係呀。」
「係喇，咁靚女我無理由記錯！」陳生講：「妳返工？」
「係呀，我返工。」
「妳做咩工嫁？」陳生講：「我爭個秘書，不如妳過嚟幫手吖？」
「唔喇，多謝。」Sita有禮婉拒，陳生仲死纏爛打，搞到Sita要坐的士避開佢。
當Sita落的士行返公司，沿途都係目光焦點。佢無去理會，亦都無加快腳步，仍舊好高雅咁行。
隨住行路時高踭鞋聲，Sita步入升降機，消失於人羣眼中。
升降機去到公司樓層，Sita返到去見同事。部門清一色女性，無圍觀目光Sita都放鬆。
雖然頭先衆人目光對Sita無影響，但係始終都唔係咁好。
好快到咗Lunch Time，文員apple同Sita講：「我哋去食潭仔，妳啱唔啱？」
「潭仔？唔好意思呀，我今日想食沙津，妳哋去食吖。」
「食沙津，咁唔阻妳。」apple正想離去時，講：「係喎，今日唔見妳男朋友嘅？」
男朋友？
「妳誤會喇，佢唔係我男朋友喔。」
「唔係男朋友又會日日嚟同妳食lunch。」apple望住Sita奸笑，Sita俾佢搞到面都紅哂。
「佢真係唔係我男朋友呀。」Sita有啲焦急解釋，apple講：「咁介紹佢俾我吖，佢咁靚仔。」
「妳都識講人哋靚仔喇，人哋吼Sita幾時輪到妳吖！」芳姐搭嘴。
「我知Sita靚女，妳都唔駛咁直接呀！」apple抗議！
「玩吓啫，唔好嬲。」芳姐講：「最多陣間妳請食飯。」
「妳攞我嚟玩仲要我請？！」
「咪咁孤寒喇！」另一同事bb拉住apple出門口，成班嘻嘻哈哈去哂食飯，淨低Sita一個。
apple，妳真係誤會哂喇。
佢係我表弟，我哋點會有嘢呀。
佢可能同其他男人一樣，對我好啫…
其他男人一樣…
一樣？
Sita諗起志明，一個好似袁文傑咁高大靚仔表弟，佢的而且確成日搵佢食飯，親密程度就同情侶無乜分別…
佢想點，Sita心中有數不過唔敢相信。
Sita一路諗、一路行去想買沙津時，有個人從後攬住佢：「咪郁！強姦！」
佢話強姦，但係都嚇唔到Sita。
「小姐，妳玩咩呀？」Sita擰轉身對攬住佢果個人講。哩個人矮Sita大半個頭，紥起玫瑰棕顏色頭髮，面尖尖眼大大，嘴唇鮮紅色成個韓妹打扮。
哩個韓妹，就係Sita細妹Jacky。
「咩玩呀，搵妳食飯呀！」
「咁好搵我食飯？」
「係呀，山窮水盡時，家姐是最好！」
「妳又用哂啲錢呀？」
「無辦法喇，我讀緊書零收入，好慘嫁…」Jacky雙手合十，扁哂嘴想喊咁。Sita見佢咁，搖搖頭嘆嘆氣攞咗啲錢俾佢。
「慳住駛呀。」
「Thank You！！」Jacky收咗錢就笑哂口，Sita無佢辦法：「咁仲食唔食嘢呀？」
「梗係食喇！」講完兩姊妹就一齊去食嘢，兩個行緊時，途人就望到佢哋眼都唔眨，甚至圍觀咁滯。行咗兩條街Jacky忍唔住講：「真後悔同妳去食飯。」
「吓？點解呀？」
「小姐呀，妳唔係唔知妳啲仙氣幾強喇！」Jacky講：「妳去到邊惹到邊，我哩個學界女神都唔夠妳撼呀！」
「唔好咁誇張喇，我係人邊有仙氣喎。」
「妳唔信？」Jacky左望望，見到有個四眼仔响旁邊，就拉佢埋嚟講：「你話佢有無仙氣？」
俾Jacky拉埋嚟，四眼仔近距離望Sita。突然有個毒男望住自己，Sita微微張口想叫Jacky唔好玩，不過未講出口時眨眨眼，長長睫毛响動人眼睛上發出魅力…
充滿仙氣嘅Sita令到四眼仔面都紅哂，垂低頭唔敢望。
佢羞怯神情，已經將答案公佈咗。
「嗱，都話喇！」Jacky講：「妳仙氣超大！」
「咁…」Sita唔知點回應，嚟個時候有男聲傳出。
「原來妳响度，頭先去妳公司唔見妳，好彩咁都搵到。」
男聲傳出，兩姊姊都望向哩個男人。見到哩個男人，就係Jacky表哥、Sita表弟嘅志明。
「Hello。」
「Hi。」
「你嚟搵家姐？」
「係呀，搵Sita食飯。」志明講：「一齊吖。」
「我嚟？」Jacky陰陰嘴笑：「阻唔阻住妳哋先？」
Jacky話阻唔阻住，Sita聽到塊面勁紅！
「咩阻唔阻住呀。」Sita講：「我哋兩姊妹有緊要事傾，唔同閒得你食飯。」
「咁唔緊要，接妳收工？」
吓？
接我收工？
志明咁大膽，Sita塊面紅上加紅…
「我…收工要同呀妹返屋企。」Sita講：「bye bye。」
「咁好喇，聽日再嚟陪妳食飯。」
志明再約，Jacky講：「我有無份先？」
「OK吖，一齊食囉。」
「咁係囉喎！」Jacky答應咗志明約食飯，Sita覺得超尷尬，拖住Jacky急急走。
「家姐，妳怕醜呀？」
「妳唔好亂講喇，志明係表弟嚟嫁，妳咪亂諗喇。」
「唓，粵語長片表哥娶表妹都經常有，妳咪咁土喇！」
「粵語長片還粵語長片，同表弟拍拖就唔得。」Sita講：「妳鍾意既，咪嫁俾佢囉。」
「佢咁靚仔，拍吓拖都唔錯呀！」
「妳個衰妹！」俾Jacky搞到唔知好嬲定好笑，Sita笑住搣佢面珠懲罰。
「痛，痛呀！」
「痛咩？仲敢唔敢亂講？」
「妳係仙女嚟嫁，當街搣個妹無哂形象嫁！」
「蝦，妳仲嚟！」Sita鬆手無搣，谷住啖氣响口扮哂嬲。Jacky見到Sita鼓氣泡鰓，就講：「妳真係唔考慮？」
「No。」
「真唔明妳，憑妳條件應該仔多到巴士坐唔哂，點解仲係一個人嫁？」
我應該仔多到巴士坐唔哂…
點解仲係一個人？
俾Jacky咁問，Sita答唔出。
「我…」Sita講：「妳估我係妳咩，男朋友多到走馬燈咁轉唔停。」
「有本錢就自然大把有得揀喇！」Jacky講：「妳怕醜嘅，駛唔駛我幫手？」
「蝦，妳咁鍾意玩志明嘅？」
「我講幫手啫，無話一定係志明喎。」Jacky又奸笑：「妳發姣？」
「講嘢咁粗俗，俾爸爸聽到打死妳呀！」
「咁妳係咪發姣先？」
「無…」Sita見到好多人圍觀，尷尬到即刻閃走。
「咪走喇，仲要去食嘢嫁！」
「咁妳仲講，快啲行喇！」
「哈哈。」
志明鍾意我？
Jacky呀，妳有無諗過後果呀？
爸爸哩頭話介紹人俾我，轉個頭就同表弟拍拖？
邊有面見人呀…
我同佢，點可能發展呀。
妳都唔好貪人靚仔，就亂諗一通呀。
Sita對於志明Jacky，心中有哩個分析，有哩個決定。
仙氣の表姐Sita @ 2完