為了實現媽媽遺願，我成為了女校男生: 你問我答Vol.2 (1)

「有請我地今年”你問我答”嘅嘉賓，連續7年學校嘅模範生，全校最幸福嘅同學，7B Jessie Lam，林雪凝!!!」
 
「大家好」我係好多掌聲之下走到台上坐低，今年嘅MC係細我一年級嘅Vivian
 
「Jessie，妳真係好叻啦，連續7年成為學校嘅模範生」
 
「其實我承蒙老師嘅厚愛，好多同學比我更乖、成績更好」
 
「好啦好啦，咁大家都知Jessie妳呢，係我地學校男神嘅『好朋友』啦，『好朋友』到日日出雙入對，連學校都批准妳地咁『好朋友』啦」
 




呢d問題我已經預左會問
 
「其實……妳唔洗講得咁含糊，學校立場係，唔好影響學業同埋小心處理問題，唔好影響校譽就冇問題嘅」
 
「咁呀……學生會，麻煩放多張椅，然後同我捉Jessie男朋友上台」
 
Vivian講完呢句說話，阿b立即俾一大班同學圍住，然後由張Sir押上台坐低，果時佢好無奈
 
「有請我地特別嘉賓!!!程逸風同學!!」現場有大量掌聲
 




「咁Jessie，妳可能真係唯一一個經過學校批准公開拍拖嘅同學啦」
 
「唔係!妳地大把人拍拖啦，我夜晚落街跑步都見呀…呢…Joanne同佢男朋友拖手散步架」阿b開始拖其他人落水，不過係台上，我地都係坐低拖住手咁
 
「Joanne係女神，點同呢，想問問兩位先，你地真係小學開始鍾意對方?」
 
「係…果陣係課外活動，整麵包，我唔小心將麵粉整左上塊面到，佢見到就幫我抹一抹面」
 
「就係咁就鍾意左人啦?」Vivian問得好開心
 




「係呀….小學生咩都唔識…好易對同學動情…」我講果時面紅紅
 
「咁Anthony呢?點解會俾Jessie吸引到架?」
 
「其實佢呢…小學三年班果陣就已經生得好靚，咁我就讀D班，佢就C班，有一次我個水壺碌左過去佢腳邊，佢幫我執返。果陣雪凝嘅笑容就好甜，仲有對梨窩，加埋對麻花辮，我就係佢對我笑果下，俾佢吸走左」
 
「咁果陣你知唔知佢叫咩名架?」
 
「唔知架，我係有一日去裝佢書包先知佢叫咩名」
 
「咁小學果時呢，妳地有咩難忘經歷架?」
 
講得小學難忘，一定係Last day果日，但阿b就答左另一樣野。估唔到佢就係咁樣而更加鍾意我