為了實現媽媽遺願，我成為了女校男生: 壓力爆煲

臨近大考，我地F.6班除左要追課程之外，仲要不停操past paper，練oral之外。我亦都要準備考車牌。
 
所以當時我嘅壓力係超大超大，所以我又開始失眠，為左補眠，我會係lunch time瞓覺，但係我差唔多成個星期冇瞓過。雪凝知唔知?佢自己都忙到唔得閒，佢有時都會俾功課壓力迫到發脾氣。因為壓力關係，我又開始頭痛，再開始食止痛藥。
 
果日我太攰，所以小息果時，我就趴係檯到瞓，一直瞓
 
打開眼….我見返爸爸媽媽….佢地向我揮手，我同佢地去公園玩，同家姐爭玩具。家姐玩槍、我玩公仔嘅時光。突然間，一團光將爸爸媽媽帶走左，然後個天不停向下壓，將我壓….一直壓…然後我跌左落黑洞入邊
 
「呀!!!!!!!!!!!!!!!!!!!!!!!!!!!!」我成個人彈起左
 




果陣準備上中化堂，我突然咁樣彈起，全班29人望實我
 
「程逸風，你…冇事嘛?」
 
當時我只係聽到聲音，而我以為俾人玩，熄哂燈
 
「邊條友玩野，熄哂燈?」
 
我一咁講，全班都好驚訝，而雪凝應該立即走埋我身邊摸住我塊臉，我聽得出佢開始喊緊
 




「阿b呀…你做咩事呀?唔好嚇我啦」
 
「我見到爸爸媽媽同家姐….之後…就睇唔到野….我係咪盲左呀?我爸爸媽媽係咪帶我走啦?」
 
「唔係呀…你冇事架……你冇…事…架….」雪凝果時喊到收唔到聲
 
「去搵Miss孔同Miss Wong，快d!!仲有張Sir」教中化嘅Miss Chan非常緊張
 
Ivana一出門口就向操場大叫「張Sir!!!!Miss孔!!!程逸風有事呀!!!!我地處理唔到呀!!!!」
 




好快，係操場嘅張sir立即跑到上黎幫手扶住我， Ivana把聲真係好勁。就係因為咁，好多同學都走出黎睇咩事
 
同一時間，我個鼻開始流血，開始冇力要坐低
 
「呀!!!血呀!!!!阿風你流緊鼻血呀!!!」我下意識摸一摸，真係唔係鼻水喎
 
「阿b呀…你唔好有事呀…..」雪凝喊聲愈來愈大
 
同一時間，契媽趕到黎，雪凝唔理呢到係學校就叫出左平時叫法
 
「奶奶!!!阿b佢….佢…..」
 
「Ivana妳帶Jessie坐低先」契媽不愧係訓導主任，見慣大場面
 
「阿風，我係契媽呀!!你望一望我先啦」




 
「契媽….我見到爸爸媽媽….佢地係咪黎接我走啦?」
 
「冇事架…冇事….你乖乖地留低係契爺契媽身邊，乖仔啦，唔好跟爸爸媽媽走啦…Sally…Tony…唔好帶個仔走啦..…阿女妳黎未呀!!!」契媽用十成獅哮功搵詩敏黎
 
「契媽…我睇唔到野…我好凍…我係咪要搵爸爸媽媽啦?」
 
「冇事架乖仔….你唔會有事架….張詩敏!!!!!阿哥要瞓啦!!!妳去左邊到呀?」
 
「風仔冇事，喂……醒一醒，我地仲要一齊打波」張sir愈來愈緊張，係咁拍我塊面
 
呢個時候，隔離班嘅Joanne已經帶左詩敏同雪晴黎
 
「阿哥!!!!!做咩呀!!!!唔好瞓呀!!!!!」
 




「詩敏!!打俾家姐同daddy，張Sir叫白車」
 
電話通左，另一邊傳出左家姐把聲
 
「阿風?做咩事呀??」家姐非常緊張
 
「逸怡?妳去瑪麗急症室等，我地送阿風入醫院，佢最近有冇亂食藥?」
 
「佢…..屋企最近d止痛藥去得好快….佢可能……頭痛又發作，佢仲有……食薄血丸減血壓」
 
「Karen!!叫爸爸去定醫院!!!」
 
「知…知道…」
 
「詩敏!!過黎陪住阿哥攬實佢，唔好俾佢瞓著!!」




 
「阿哥呀……你唔好瞓呀……」
 
五分鐘後，有白車到場，幫我插氣喉，同送我上車
 
「我跟白車，張sir你幫我車佢地幾個去瑪麗」
 
直送A&E，直入R房，因為我意識開始減弱，去到R房前…我瞓左