為了實現媽媽遺願，我成為了女校男生: 詩敏的甜蜜回憶(4)

「妳唔好自己再呃自己啦好嘛?我都唔想再呃自己呃落去啦，以前就話有阿風係到….因為妳鍾意佢，妳想等佢，但而家佢已經搵返Jessie…咁妳可唔可以考慮下妳身邊嘅人?有個傻仔係妳身邊幾年，佢由妳F.1果陣已經鍾意妳到而家，仍然冇變過」
 
佢咁樣講一講之後，我伸手攬實佢
 
「嗯…」然後我再點一點頭
 
我好怕俾媽咪知道我又拍拖嘅事，但係去到眼前呢一刻我已經唔諗咁多，我用一對有淚水嘅眼望實佢，然後將自己對眼合上，之後就感覺到我同佢個咀痴埋左，彷彿世界上得返我同佢
開始佢慢慢將個咀啜下啜下咁樣，我都開始跟住佢咁做，估唔到我第一次錫哥哥以外嘅男仔，就係咁樣，直到我地聽到一d聲音
 
“PC 9527，PC7086，灣仔會展附近有死車，麻煩去睇睇咩事”




 
我地聽到聲音就立即坐返好，原來著校服拍拖，偷偷地拍拖就係咁嘅感覺，我用手肘撞一撞條羚羊
 
「唔!」「做咩呀?」
 
「唔!你…咁算係咩喎…就咁樣就算呀?最重要果樣你都未講…」
 
佢再一次攬實我「詩敏，我係妳F.1果陣就鍾意左妳，妳介唔介意同我呢個大哥哥拍拖?做我女朋友?」
 
我係佢懷中笑得好開心，有眼淚流出黎「你唔驚恐怖雞咩?媽咪嘅獅哮功係出哂名架喎，佢連我呢個獨生女都可以趕出門口，你同佢心肝寶貝拍拖，佢唔知會唔會殺左你喎」




 
「如果咁樣都怕嘅話，我將來點同妳屋企講要娶妳做老婆?」
 
「喂…我未應承你架喎」但係我已經笑得好甜好甜
 
「咁妳鍾唔鍾意我?」佢雙眼直線望實我
 
「喂呀…咪咁望住人啦…我都會怕羞架…」
 
「咁妳又唔答我」




 
「你咁蠢架…我都俾你錫左囉…如果唔鍾意你嘅話，點會俾你攬實喎」
 
「咁妳即係應承我?」
 
「係啦!!應承你啦!!」
 
「真係?」
 
「你呀…要對我好D呀!你見到上次呃雪晴個細路，仲有上次佔我便宜個king屎仔下場係點架啦」
 
佢緊緊拖實我隻手，我覺得好有安全感
 
「其實前年，阿風係幫我頂罪，打人果個係我，唔係佢」
 




「點解哥哥要咁做?」我好驚訝原來呢個先係真相
 
「因為佢話我係白紙一張，唔好出任何事，佢唔想妳將來個男朋友同佢一樣俾人警司警誡」
 
「咁點解你仲要去郁手?」
 
「因為果個人佔妳便宜，所以唔可以原諒」
 
「而家你唔洗再嬲啦…我係你身邊啦…」
 
「以後…我點叫妳?」
 
「你…唔係真係想叫我豬西呀?」
 
「直接叫妳個名，詩敏，因為妳屋企都係咁叫妳」




 
「嗯」
 
就係咁，小恐怖雞係F.3果年就俾人私有化左啦