為了實現媽媽遺願，我成為了女校男生: 雪晴之反擊(1)

 
聖誕過後嘅返學日，正正係我地準備去舊校嘅日子，當我地幾個一出校門果陣，寒冷刺骨嘅空氣再一次出現
 
雖然果日係比較凍，但果種寒氣並唔係一般嘅寒氣
 
我地五個人回頭一睇，係契媽
 
「媽….媽咪…」「Miss孔…」「契媽」「奶奶」
 
「你地五個去邊呀?打牌呀?突左隻腳喎」




 
「呀…我地一齊行街者…」
 
「阿風你行街會著軍Boot架咩?」
 
佢地四個同時一望我對腳
 
「你又想去郁手打人呀?」睇黎契媽已經收到風，我地放學會去做乜野
 
「五個跟我黎!!!」




 
「係…」
 
「上車!!」契媽以命令口吻叫我地上佢屋企部八人車
 
「你地今日唔好郁手知道未」
 
「媽咪…我地只係…」
 
「妳仲講!!兩年前嘅事妳唔記得呀?」




 
「係…」
 
「林雪晴!!」
 
「係…契媽…」雪晴俾契媽嘅氣嚇窒左
 
「妳知道自己做錯左D咩未?」
 
「我…我…」雪晴第一次咁樣俾契媽問
 
「答我!」契媽用半成都冇嘅獅哮功就已經令到雪晴震哂
 
「我…唔應該咁快同男仔拍拖…」
 




「妳跟妳家姐叫得我做契媽，妳即係知道妳個細家姐兩年前做過d咩架啦」
 
「我…我知…」
 
「咁妳係咪想試一次!」
 
「唔..唔係…我下次唔敢啦契媽…」
 
「周家寶!!」估唔到Ivana都有份
 
「係…」
 
「妳係呢個圈子中最大嘅姐姐，點解妳發覺左問題唔同學校講!」
 
「我…希望自己解決…」




 
「解決到咩?如果雪晴唔小心俾人呃左自己最寶貴果樣野走，妳負得起責任咩?妳點同Jessie交代?點同林醫生交代!」
 
「係…我知道錯啦…」
 
「Jasmine!!!」
 
「係…媽咪…」
 
「妳都係!!!妳明明有哂經驗知道要點做，點解唔阻止個妹!!」
 
「因為……」
 
「妳答唔到呀?因為而家妳仲係有其他學校男仔追緊!!高主教F.4果個Leo係唔係呀!」
 




「係…媽咪…不過我冇…」
 
「契媽算啦…詩敏今次好聽話，冇亂黎，雪晴都冇做錯D咩…」
 
「我仲未鬧你呀!!你18歲啦!!再俾人拉就唔係勞教中心，係直接入監獄，黃警司唔再救得你幾多次!你上次打個king屎仔，你話你俾班軍裝便裝追左幾耐!」
 
「係…我明…」
 
「林雪凝!!」
 
「係…奶奶…」
 
「今次係得妳一個比較做得啱，但點解妳發現唔到今日阿風又準備郁手打人?妳點做人女朋友?」
 
「係…我冇留意佢…」




 
「如果唔係逸怡通知我，今朝個細佬對軍boot唔見左，我仲點阻妳地幾個」
 
「契媽…我又冇話郁手…而且唔洗我郁手」
 
「總之一句，唔好俾我見到你郁手」
 
「知道」
 
契媽嘅恐怖之處，係你永遠估唔到佢知道D咩，幾時會出現