為了實現媽媽遺願，我成為了女校男生: 詩敏的回憶(5)

唔知道我仲要煩住哥哥同家姐幾耐，我真係好掛住屋企間房，雖然每日都可以同哥哥朝夕相對，但對得太耐只會令自己更加鍾意佢
 
係，我由懂事果日就鍾意左呢個大哥哥，我一直都想嫁俾佢做佢新娘，就算早年佢經常俾人拉上警署，我對佢都冇變過，不過可惜，我知佢有心上人，係佢小學同班同學，而我F.1第一日返學就認得果位大姐姐。佢真係非常溫柔、非常靚。為左扮佢，我開始扎麻花辮，不過當我意識到風哥哥唔會揀我果陣，我唯有搵個男仔去忘記佢，點知，我又跌返落呢個深坑入邊。
 
「家姐…媽咪仲未嬲完呀?」
 
「詩敏，妳闖個太大嘅禍啦，妳係女仔黎架嘛，點可以俾人亂摸架?」
 
「我…我只係想有個男朋友可以陪下我、錫下我」
 




「點解呢?妳只係F.1咋喎」
 
「我…我自己鍾意果個人又唔會揀我，佢只係當我妹妹咁睇…」
 
「唉…傻妹，家姐有眼睇嘅，妳鍾意我細佬，我同契媽都知道，妳想嫁俾佢我都知，但我細佬佢心中有一個女仔，係佢小學同學」
 
「我知佢係邊個，我第一日升中學已經係學校見到佢」
 
「果個女仔，係妳師姐?」
 




「係!連續3年全級第一，優等模範生」
 
「妳乖乖地，做好自己，可能細佬會揀妳呢，妳今次咁樣，係佢心中一定扣分架啦」
 
「我知啦…」
 
差唔多一個月後，有一日準備食lunch之際，我俾人叫左去校長室
 
「校長…Miss Lee…」
 




「Jasmine，妳知妳今次闖左個好大嘅禍出黎嘛」
 
「我知…」
 
「妳俾媽咪趕左出黎有冇好好反省過?定係妳成個月係HKU student hall住得好開心?」
 
其實日日睇住班大學生好瘋狂咁玩，真係幾開心架
 
「我知道……我唔應該咁樣俾男仔佔便宜…我冇好好保護自己」
 
「妳知道妳媽咪成個月都喊左好多次嘛?我地d老師都唔知點安慰佢，妳契媽Sally姨姨又已經唔係到，學校有幾個老師係妳媽咪嘅學生，佢地當妳親生妹妹咁睇，佢地都好傷心點解妳會咁唔自愛」
 
「係…我係不孝女…」
 
「當年妳媽咪流產左幾次先陀到妳，到妳兩個幾月果陣又差d流產，到妳7個幾月妳又心跳好慢，好彩妳福大命大，妳媽咪唔肯放棄妳，為左妳佢食好多藥保住妳，妳先出到世，妳媽咪有幾錫妳知唔知?妳媽咪食咁多藥好傷身架」




 
「我知…」
 
「妳而家青春期想識男仔，係好正常，但點解妳唔識保護妳自己?妳媽咪尋日去埋人地學校投訴，轉個頭果個男仔就無啦啦自己”跌親”，妳明白咩意思架啦」
 
「明白……」
 
「妳知道Sally姨姨個仔再俾警察拉多次會點啦，上少年法庭，入勞教中心受苦。妳哥哥知道後果會咁佢都照去幫妳出氣，妳係咪想佢俾警察拉多一次?」
 
「係我唔啱……校長我真係知錯啦…」
 
「Jasmine希望妳今次可以汲取到教訓，Miss Lee麻煩妳帶佢出去」