為了實現媽媽遺願，我成為了女校男生: 一齊面對

「姐夫!!拎藥!!藥水每日4次，每次1格，呢到收鼻水、感冒、消炎、化痰，飽肚食藥，幫你打左電話俾Miss Wong同恐怖雞啦，走得!!」
 
「下?唔洗俾錢咩」
 
「家屬呀!你係女婿呀!!呀!!」雪晴又俾家姐用雜誌打左下
 
「返去煮野俾姐夫食啦!呀!」然後又俾雪凝媽媽打左下頭
 
行返屋企時，雪凝Q實我隻手，而且眼有淚光
 




「你左膝咩事?快d答我!」
 
「跑步受傷者，冇咩事」
 
「你細個講大話就係咁嘅樣，快d答我啦…始終我都係你嘅…你嘅…」
 
「我嘅咩呀?」
 
「女朋友掛…」雪凝耷低頭好怕羞咁講
 




「呼…妳有冇試過…10年內冇左爸爸媽媽?」
 
「冇」
 
「有冇試過，自己夜晚一個人係屋企，冇人陪自己，屋企得4邊牆，又望住自己全家幅笑得好開心個樣?」
 
「冇」
 
「有冇試過背負住父母遺願，去迫自己乜都要做到最好?」
 




「我都冇」
 
「但我全部都有，為左媽媽遺願，F.3開始我讀書好似讀到痴線咁，我連背默咁簡單都可以突然夜晚2點彈起身背一次出黎，我已經幾年冇好好瞓一覺，bb豬…」我望住佢，果時佢眼中已經有眼淚
 
「我好攰…」
 
「我陪你」
 
呢三個字由雪凝口中講出
 
「但係…我唔可以係學校入邊…我怕妳會…妳明架」
 
「唔洗一定要同你拍拖先可以係你身邊架，我同你都知問題係邊…」
 
「但妳會冇名份…」




 
「都係『女朋友』三個字者，你咪當…我唔應承你住…處於果兩個字嘅關係囉」
 
「妳唔介意?」
 
「我都等左你5年…唔爭左等多年半，不過首先你要醫好左膝頭先」
 
果日雪凝同我去約物理治療，同埋佢煲粥俾我食，感覺上，我開始有返屋企人，仲要係有一個老婆嘅感覺