為了實現媽媽遺願，我成為了女校男生: 旅行日的校巴

我地班嘅旅行地點幾遠下，係黃金海岸蝴蝶灣果一邊，係學校搭車一個鐘左右就到左，由於我地係大姐姐關係，我地班係會搭住一班低form一齊去，所以，我地班主任揀左雪晴果班，或多或少都因為我嘅關係嘅……但係阿風變相就要拎我地兩姊妹d野。係車上邊，我同Ivana繼續孖公仔咁坐，而阿風就自己一個坐係前面
 
「喂…前晚…妳地兩個點呀?」
 
「下…有咩點姐…佢咪氹返我囉」我又係擰埋一邊面講，但講果時塊面係好紅
 
「冇啦?有冇下文?」
 
「都算…有嘅」
 




「點呀」「點呀」身邊其他同學一陣好八咁圍過黎
 
「佢同妳表白呀?」「有冇咀咀呀?」「妳應承左佢啦?」
 
「佢未表白…不過…」
 
「不過咩呀?」
 
「佢錫左我額頭一下，同埋拖住送我返屋企咋」
 




我紅住面咁講佢地知，然後佢地成班就依嘩鬼叫
 
「好羨慕呀!!!」「咁都仲唔係一齊左呀?」
 
「咁佢又未開口要我做佢女朋友…」
 
「咁返到屋企點呀?」
 
「佢…佢咪打黎氹我瞓覺囉」
 




“eeeeeeewaawaawaa!!!!” 佢地不停大叫尖叫
 
「好幸福呀妳!!」「我又想要呀」
 
我好怕羞咁望住車頭嘅阿風，再計一計時間，佢應該差唔多架啦
 
「喂，借借啦，我要出一出去」
 
「有人怕羞呀!!」
 
因為我同過阿風三年同班，我好清楚知道佢搭長途車會點，所以我拎定枝白花油出黎以防萬一，正當我去到佢身邊果陣
 
「咦?」
 
「咦?」




 
「你唔係夠鐘暈車浪要嘔啦咩?」
 
「哈哈哈哈!!!喂，我而家幾多歲呀?下個月18歲啦，妳估仲係小學雞果陣坐長途車就嘔咩」
 
「我…我點知你喎」
 
“嘩!!好閃呀妳地”
 
「我返去先啦」
 
世事往往就係咁巧合，司機係呢個時候轉左個大靚彎，而我就企唔穩成個跌左落阿風到。所以各位請記住緊握扶手。跌落去果時，放心，我地冇好似電視劇咁咀咀左，而係…阿風攬實左我…佢隻手，掂住我個胸。我地兩個呆望對方之際，已經有好多相機同電話不停影相。
 
「sor…sorry呀…」
 




「唔…唔緊要喎」
 
我地好尷尬咁分開，然後我面紅哂咁返埋位到坐